काठमाडौं । अमेरिका र इजरायलले शनिबार राति इरानको राजधानी तेहरान तथा छिमेकी अल्बोर्ज प्रान्तका पाँचवटा तेल भण्डारण केन्द्रमा संयुक्त आक्रमण गरेका छन्। आक्रमणपछि ठूलो आगलागी भएको र बाक्लो धुवाँका कारण तेहरानको आकाश ढाकिएको बताइएको छ।
प्रारम्भिक जानकारी अनुसार आक्रमणमा केही मानिसको मृत्यु भएको तथा कैयौँ घाइते भएका छन्। आइतबार साँझसम्म पनि तेहरानका विभिन्न स्थानमा धुवाँ फैलिएको र दृश्यता कम भएको स्थानीय अधिकारीहरूले बताएका छन्। शहरका केही स्थानमा थप विस्फोटको आवाज सुनिएको रिपोर्ट आए पनि ती विस्फोट कहाँ भएका हुन् भन्ने स्पष्ट हुन सकेको छैन।
स्थानीय सरकारले तेल डिपोमा लागेको आगोबाट निस्किएको प्रदूषित धुवाँ शहरभर फैलिएको चेतावनी दिएको छ। इरानी रेड क्रिसेन्ट सोसाइटीले जलेका तेल भण्डारण केन्द्रबाट निस्किएका विषालु रसायन वर्षासँग मिसिएमा खतरनाक ‘एसिड वर्षा’ हुन सक्ने चेतावनी दिएको छ।
वातावरणीय निकायले नागरिकलाई अनावश्यक रूपमा घरबाहिर ननिस्कन र आवश्यक सुरक्षा उपाय अपनाउन आग्रह गरेको छ। आक्रमणका कारण तेहरान प्रान्तमा इन्धन आपूर्ति पनि प्रभावित भएको बताइएको छ। प्रान्तीय प्रशासनका अनुसार सामान्य आपूर्ति पुनः सुरु हुन दुईदेखि तीन दिन लाग्न सक्छ।
इरानको विदेश मन्त्रालयका प्रवक्ता इस्माइल बाघाईले अमेरिका र इजरायलको आक्रमणको कडा निन्दा गर्दै यसलाई ‘युद्ध अपराध’ र ‘मानवताविरुद्धको अपराध’ बताएका छन्। उनले तेल डिपोलाई निशाना बनाउनु इरानी नागरिकमाथि गरिएको जानाजानी रासायनिक युद्धसरह भएको आरोप लगाए।
उनले इन्धन भण्डारण केन्द्रमा आक्रमण गर्दा विषालु पदार्थ हावामा फैलिएको र यसले नागरिकको स्वास्थ्य तथा वातावरणमा गम्भीर असर पारिरहेको बताएका छन्। साथै यसबाट सिर्जना हुने मानवीय तथा वातावरणीय संकट इरानको सीमाभित्र मात्र सीमित नहुने चेतावनी दिएका छन्।
यसैबीच, इरानी सशस्त्र बलको खातम अल–अनबिया केन्द्रीय मुख्यालयका प्रवक्ताले इरानका तेल पूर्वाधारमाथि आक्रमण जारी रहेमा तेहरानले क्षेत्रीय स्तरमा समान प्रकारको प्रतिकार गर्न सक्ने चेतावनी दिएका छन्। उनले क्षेत्रीय देशहरूलाई अमेरिका र इजरायललाई सचेत गराउन पनि आग्रह गरेका छन्।
इरानी रेड क्रिसेन्ट सोसाइटीका अनुसार युद्ध सुरु भएयता अमेरिका र इजरायलको आक्रमणमा इरानमा १ हजार ३३२ जनाको मृत्यु भएको छ। साथै ९ हजार ६६९ नागरिक संरचना क्षतिग्रस्त भएका छन्, जसमा करिब ७ हजार ९४३ घर र १ हजार ६१७ व्यावसायिक भवन रहेका छन्।
इरानी सुरक्षा स्रोतका अनुसार इरानसँग भारी मिसाइल, ब्यालिस्टिक मिसाइल, क्रुज मिसाइल तथा विभिन्न प्रकारका ड्रोन पर्याप्त मात्रामा रहेका छन्। उनका अनुसार इरान कम्तीमा छ महिनासम्म उच्चस्तरीय युद्ध लड्न सक्षम रहेको दाबी गरिएको छ। साथै आगामी दिनमा अझ लामो दूरीका र आधुनिक मिसाइल प्रयोग गर्ने संकेत पनि गरिएको छ।
