काठमाडौं । धनुषा–१ को रोकिएको मतपरिणामबारे निर्णय फागुन २९ गते हुन सक्ने भएको छ।
यस निर्वाचन क्षेत्रमा राष्ट्रिय स्वतन्त्र पार्टी (रास्वपा) का उम्मेदवार किशोरी शाह ‘कमल’ ले सबैभन्दा धेरै मत ल्याएपछि पनि निर्वाचन आयोगले मत परिणाम घोषणा रोकेको छ। आयोगले उनको उम्मेदवारी बदर गरेपछि उनले सो निर्णयविरुद्ध सर्वोच्च अदालतमा रिट दायर गरेका थिए।
उनको उम्मेदवारी खारेजीविरुद्ध दायर रिटमा अन्तरिम आदेश जारी गर्ने वा नगर्ने विषयमा सर्वोच्च अदालतले फागुन २९ गतेका लागि छलफलको मिति तोकेको छ।
सोमबार न्यायाधीश नृपध्वज निरौलाको इजलासले निर्वाचन आयोगको पक्ष पनि सुन्नुपर्ने भन्दै छलफलका लागि बोलाएको हो।
अदालतले फागुन २९ गतेको छलफलमा उपस्थित हुँदा उम्मेदवारी खारेज गर्ने फागुन १८ गतेको निर्णयसहित सम्बन्धित फाइल पनि साथमा ल्याउन निर्वाचन आयोगलाई आदेश दिएको छ।
