गोरखा । हालै सम्पन्न प्रतिनिधिसभा सदस्य निर्वाचनमा गोरखामा नेकपा एमालेका उम्मेदवार मिलन गुरुङ (चक्रे मिलन) सहित १९ जना उम्मेदवारको जमानत जफत भएको छ। दुई वटा निर्वाचन क्षेत्र रहेको गोरखामा कुल २५ जनाले उम्मेदवारी दिएका थिए।
जिल्ला निर्वाचन कार्यालयका अनुसार खसेको सदर मतको १० प्रतिशत मत प्राप्त गर्न नसक्दा उनीहरूको जमानत जफत भएको हो।
गोरखा–२ मा कुल ५७ हजार १५६ मत खसेको थियो, जसमा ५४ हजार १४७ सदर मत रहेको थियो। जमानत जोगाउन कम्तीमा ५ हजार ४१५ मत आवश्यक भए पनि एमालेका मिलन गुरुङले ३ हजार ८७ मत मात्र प्राप्त गरे।
त्यसैगरी उज्यालो नेपाल पार्टीका बलराम तामाङले ६३९, राप्रपाका कुलबहादुर बस्नेतले २९२, मंगोल नेशनल अर्गनाइजेसनका सोमबहादुर गुरुङले २९०, नेपाल कम्युनिस्ट पार्टी (माओवादी) का टेकबहादुर प्रधानले १३०, नेशनल रिपब्लिक नेपालका प्रसाद गुरुङले १११ मत प्राप्त गरे।
स्वतन्त्र उम्मेदवार चुडाप्रसाद ढकालले ८०, आम जनता पार्टीकी कल्पना कुमालले ४१, नेपाल मजदुर किसान पार्टीका रामशरण बुढाथोकीले ३० र स्वतन्त्र उम्मेदवार हरि पोखरेलले १४ मत प्राप्त गरेका थिए। १० प्रतिशत मत नपुगेकाले उनीहरूको पनि जमानत जफत भएको हो। गोरखा–२ मा कुल १३ जनाले उम्मेदवारी दिएका थिए।
यता गोरखा–१ मा १२ जना उम्मेदवारमध्ये १० जनाको जमानत जफत भएको छ। एमालेका रामचन्द्र लामिछानेले ३ हजार ७३२, उज्यालो नेपाल पार्टीका रामकाजी राना मगरले ४८९, राप्रपाका केदारमणी खनालले ३१०, संयुक्त नागरिक पार्टीका जितबहादुर घलेले १६५ मत प्राप्त गरे।
त्यस्तै मंगोल नेशनल अर्गनाइजेसनका देवबहादुर थापाले १४२, नेपाल कम्युनिस्ट पार्टी (माओवादी) का विष्णुप्रसाद रिजालले ५७, नेशनल रिपब्लिक नेपालका आकाश राना मगरले ३५, स्वतन्त्र उम्मेदवार कविता भट्टराईले २३ र नेपाल मजदुर किसान पार्टीकी मनुकुमारी श्रेष्ठले १९ मत प्राप्त गरेका छन्।
गोरखा–१ मा कुल ६३ हजार ६०९ मत खसेको थियो, जसमा ६१ हजार ३९० सदर मत रहेको थियो। जमानत जोगाउन कम्तीमा ६ हजार १३९ मत आवश्यक पर्नेमा ती उम्मेदवारले आवश्यक मत प्राप्त गर्न नसक्दा जमानत जफत भएको हो।
