म्याग्दी: रघुगंगा गाउँपालिका-७ मा रहेको प्राकृतिक र धार्मिक महत्त्वले भरिएको सुनछहरा पर्याप्त पूर्वाधार र प्रचारको अभावमा ओझेलमा परेको छ। पदमार्गको अभाव र झोलुंगे पुल नहुँदा पर्यटकलाई यो क्षेत्रसम्म पुग्न कठिनाइ भइरहेको छ।

स्थानीय बासिन्दा ललित गर्बुजाले सुनछहराको प्रचारप्रसार नहुँदा यसको विशेषता स्थानीय स्तरमै सीमित भएको बताए। “धौलागिरि हिमालको आधार शिविर क्षेत्रअन्तर्गत पर्ने सुनछहरामा धार्मिक र पर्यटकीय सम्भावना हुँदाहुँदै पनि विकासको पर्खाइमा छ,” उनले भने।

भारतीय सेनामा कार्यरत गर्बुजाको नेतृत्वमा मण्डली युवा क्लबका पदाधिकारी, पर्यटन व्यवसायी, र सञ्चारकर्मीहरूको टोलीले हालै सुनछहरा पुगेर सम्भावनाबारे अध्ययन गरेको थियो।

धार्मिक कथा र नामको उत्पत्ति
परम्परागत कथनअनुसार एक बाजा बजाउने व्यक्ति ध्यान गर्न झरनामा पुगेपछि भगवान प्रशन्न भई सुनको वरदान दिन तयार भएका थिए। झरनाको गुफाबाट जति चाहे त्यति सुन लैजान अनुमति पाएका ती व्यक्तिले लालच गर्दा बाढी आएर सबै बगाएको र त्यसपछि यो स्थानको नाम ‘सुनछहरा’ रहेको जनविश्वास छ।

गुफाका भित्ताहरू पहेँलो देखिने र विभिन्न देवीदेवता तथा जनावरको आकृतिले भरिएको गुफाभित्र हिर्काउँदा बाजाको आवाज सुनिने स्थानीय वडा अध्यक्ष थकबहादुर पाईजाले बताए।

पूर्वाधार विकासको खाँचो
धौलागिरि आधार शिविर जाने पदमार्ग विस्तार थालिएको र सुनछहरा जाने बाटोमा पर्ने रघुगंगा नदीमा झोलुंगे पुल निर्माणको पहल भइरहेको वडा अध्यक्ष पाईजाले बताए।

हिउँदयाममा सुनछहराको पानी जमेर हिउँमा परिणत हुने दृश्य यहाँको थप आकर्षण हो। करिब १५ मिटर अग्लो यो झरनाको भित्र पाँच मिटर लामो गुफा छ। दर्शन र पूजापाठ गरेमा मनोकांक्षा पूरा हुने जनविश्वास रहेको छ।

पर्यटन प्रवर्द्धनको सम्भावना
पोखराका पर्यटन व्यवसायी तारा गर्बुजाले सुनछहरा पुग्ने पदमार्ग व्यवस्थित गर्न र झोलुंगे पुल निर्माण गर्न सके पर्यटकको आकर्षण बढ्ने बताए। “झोलुंगे पुल नहुँदा राहुघाट वारपार गर्न जङ्घार तर्नुपर्ने बाध्यता छ,” उनले भने।

सुरक्षित पदमार्ग नहुँदा भिरमा जोखिमपूर्ण यात्रा गर्नुपर्ने र संकेत चिन्हहरूको अभावले पर्यटक हराउने जोखिम रहेको अध्ययन टोलीका सदस्य सुरेन गुरुङले बताए। सुनछहराबाट रिखार, धौलागिरि आधार शिविरको अस्ट्रेलियन क्याम्प, कालीबराह हुँदै मुस्ताङसम्म पुग्न सकिने उनले बताए।

नोट: बेनीदेखि चिमखोला हुँदै सुगुरथला पुग्न चार घण्टा सवारी यात्रा गर्नुपर्छ। त्यहाँबाट एक दिनको पैदल यात्रापछि सुनछहरा पुगिन्छ। सुगुरथलासम्म मात्र होटल सुविधा रहेकाले त्यसभन्दा माथि बन्दोबस्तीका सामान आफैँ बोक्नुपर्ने बाध्यता रहेको स्थानीयले बताएका छन्।

वीरगञ्ज: मधेश प्रदेशकै सर्वाधिक धनराशिको दोस्रो वीरगञ्ज गोल्डकप फुटबल प्रतियोगिता आगामी फागुन १७ देखि २४ गतेसम्म वीरगञ्जको आदर्शनगर रंगशालामा हुने भएको छ। भेट्रान सिटी क्लब वीरगञ्जको आयोजनामा हुने प्रतियोगितामा राष्ट्रिय तथा अन्तर्राष्ट्रिय आठ फुटबल टोली सहभागी हुनेछन्।

प्रतियोगिता नकआउट चरणमा खेलाइनेछ। भेट्रान सिटी क्लबका अध्यक्ष सबिन बस्नेतले मधेश प्रदेशमा फुटबलको विकासका लागि यो प्रतियोगिता आयोजना गर्न लागिएको जानकारी दिनुभयो। उहाँले भन्नुभयो, “पछिल्लो समय वीरगञ्जमा फुटबलका गतिविधि सुस्ताएपछि यो प्रतियोगिता पुनः खेलकुदको विकासमा टेवा पुर्याउन आयोजना गर्न लागिएको हो।”

प्रतियोगितामा संकटा फुटबल क्लब, मछिन्द्र फुटबल क्लब, बागमती युथ क्लब सर्लाही, नेपाल पुलिस क्लब, गरवाल डाइमण्ड फुटबल क्लब दिल्ली, एपीआई चर्च ब्वाइज युनाइटेड काठमाडौं, सलहेश फुटबल क्लब सिरहा र आयोजक वीरगञ्ज युनाइटेड क्लबले प्रतिस्पर्धा गर्नेछन्।

प्रतियोगिताको विजेता टोलीलाई नगद ११ लाख ११ हजार १११ रुपैयाँ, ट्रफी, मेडल र प्रमाणपत्र प्रदान गरिनेछ भने उपविजेता टोलीलाई नगद पाँच लाख ५५ हजार ५५५ रुपैयाँसहित ट्रफी, मेडल र प्रमाणपत्र प्रदान गरिने क्लबका कोषाध्यक्ष तथा प्रतियोगिता संयोजक सुबोधकुमार श्रीवास्तवले जानकारी दिनुभयो।

प्रतियोगिता सञ्चालनका लागि आदर्शनगर रंगशालाको मैदान मर्मत कार्य अन्तिम चरणमा पुगेको श्रीवास्तवले जानकारी दिनुभयो। “दुई महिनादेखि मैदानको मर्मत कार्य तिव्र रुपमा भइरहेको छ,” उहाँले बताउनुभयो।

दर्शकलाई लक्षित गर्दै करिब दुई हजार दर्शक अट्ने अस्थायी प्याराफिट निर्माणको कार्य तीव्र रुपमा भइरहेको छ। ग्राउन्डमा थप तीन हजार दर्शक अटाउने क्षमता रहेको आयोजकले जनाएको छ।

प्रतियोगिता संयोजक श्रीवास्तवले वीरगञ्जमा फुटबल गतिविधि फेरि जुर्मुराउन प्रतियोगिता आयोजना गरिएको बताउनुभयो। “विगतमा सहिद तेजबहादुर अमात्य गोल्डकप र विशाल मेमोरियल गोल्डकपजस्ता प्रतियोगिता हुँदै आएका थिए। स्थानीय फुटबल खेलाडीको प्रतिभा प्रकट गर्न यो प्रतियोगिताले महत्वपूर्ण प्लेटफर्म दिनेछ,” उहाँले थप्नुभयो।

प्रथम वीरगञ्ज गोल्डकप २०८० को कात्तिकमा आयोजना गरिएको थियो। उक्त संस्करणमा नेपाल पुलिस क्लब विजेता र नेपाल आर्मी क्लब उपविजेता बनेका थिए।

काठमाडौँ: पाथिभरा क्षेत्रको केबलकार निर्माणमा उत्पन्न विवाद समाधान गर्न सरकारी पक्ष र आन्दोलनरत समूहबीच भएको वार्ता बिना निष्कर्ष टुंगिएको छ। सरकारले वार्तामार्फत समस्या समाधान गर्न पुनः आग्रह गरेको छ।
सरकारी वार्ता टोलीका संयोजक तथा गृह मन्त्रालयका सहसचिव प्रेमप्रसाद भट्टराईले भन्नुभयो, “वार्ता निष्कर्षमा पुग्न सकेन। हामीले वार्ताका माध्यमबाट समस्याको समाधान गर्न अनुरोध गरेका छौँ।”

गृह मन्त्रालयले आज राति जारी गरेको विज्ञप्तिमा सरकारको वार्ता टोली समस्याको समाधानका लागि संवाद गर्न सदैव तयार रहेको उल्लेख गरिएको छ। मन्त्रालयले विवाद वार्तामार्फत समाधान गर्न पुनः आग्रह गरेको छ।

यसैबीच, आन्दोलनरत पक्षको प्रतिनिधित्व गरेको वार्ता टोलीले अब कर्मचारीस्तरको वार्ता नगर्ने स्पष्ट पारेको छ। “भोलि गृहमन्त्री रमेश लेखकसँग छलफल हुनेछ,” वार्ता टोलीका सदस्य सरस्वता सिङ्गक (सरु) ले राससलाई जानकारी दिनुभयो।

काठमाडौं। अमेरिकाका एक संघीय न्यायाधीशले एलन मस्कलाई ट्रेजरी विभागमा राखिएका लाखौं अमेरिकीहरूको व्यक्तिगत वित्तीय तथ्यांकमा पहुँच गर्नबाट रोक लगाएका छन्।

अमेरिकी जिल्ला न्यायाधीश पल ए. एन्जेलमेयरले शनिबार जारी गरेको प्रारम्भिक आदेशअनुसार मस्क र उनको टोलीलाई यी रेकर्डहरूको कुनै पनि प्रतिलिपि तुरुन्तै नष्ट गर्न आदेश दिइएको छ।

यस विषयको जड ट्रम्प प्रशासनको निर्णयमा रहेको छ। प्रशासनले मस्कको नेतृत्वमा सञ्चालित तथाकथित ‘सरकारी दक्षता विभाग’ लाई ट्रेजरी विभागको रेकर्डमा पहुँच दिन अनुमति दिएको थियो। मस्कको विभागले ‘लागत कटौती’ अभियानमा काम गरिरहेको थियो।

तर यो कदमले विवाद निम्त्यायो। १९ राज्यका महान्यायाधिवक्ताहरूले ट्रम्प प्रशासनको उक्त निर्णयविरुद्ध मुद्दा दायर गरे। त्यसपछि न्यायाधीश एन्जेलमेयरले मस्कलाई डेटा पहुँचबाट रोक लगाउने आदेश दिएका हुन्।

न्यायाधीशले मस्कलाई ‘विशेष सरकारी कर्मचारी’ मात्र भएको र उनको ‘सरकारी दक्षता विभाग’ कुनै आधिकारिक सरकारी निकाय नभएको स्पष्ट पारे। यस्तो अवस्थामा ट्रेजरी विभागको गोप्य रेकर्डमा पहुँच संघीय कानूनको उल्लङ्घन भएको न्यायाधीशको ठहर छ।

यद्यपि, सामाजिक सञ्जाल प्लेटफर्म ‘एक्स’मा मस्कले प्रतिक्रिया दिँदै यो निर्णयलाई ‘बिल्कुल असमझदार’ भनेका छन्।

सोल। पछिल्लो समय दक्षिण कोरिया नेपाली युवायुवतीको रोजगारीका लागि आकर्षक गन्तव्य बन्दै गएको छ। यहाँको द्रुत आर्थिक विकास, आधुनिक जीवनशैली, उच्च पारिश्रमिक, सुरक्षित कार्य वातावरण र रोजगारीका अवसरहरूले लाखौँ विदेशी कामदारहरूलाई आकर्षित गरिरहेको छ।

तर कोरियामा रहेका आप्रवासी कामदारहरूको जीवन सहज मात्र छैन। श्रम शोषण, भाषा अवरोध, मानसिक तनाव, र आपसी द्वन्द्वजस्ता समस्याहरूले उनीहरूको दैनिकीलाई चुनौतीपूर्ण बनाइरहेको छ।

नेपाली कामदारहरूको बीचमा इर्ष्या, प्रतिष्पर्धा र झगडाका घटना बढ्दै गएपछि यसले कानूनी समस्या सिर्जना गर्न थालेको छ। उदाहरणस्वरूप, गोरखाका पदम आले, जो आठ वर्षअघि रोजगार प्रक्रिया प्रणालीमार्फत कोरिया आएका थिए, सहकर्मी नेपालीले मालिकसँग नकारात्मक कुरा फैलाएपछि आफ्नो कम्पनी परिवर्तन गर्न बाध्य भए।

बझाङका प्रदीप रावत पनि कम्पनीमा अन्य नेपाली ल्याउन चाहन्थे। तर केही सहकर्मीहरूले अनावश्यक भ्रम फैलाउने प्रयास गर्दा कम्पनी अवलोकन गर्न आएका नेपालीहरूले काम नगर्ने निर्णय लिएका छन्।

एक अन्य घटनामा थेगुको एक उद्योगमा दुई नेपाली कामदारबीच तलब र जिम्मेवारीका विषयमा विवाद भएपछि हातपातको स्थिति सिर्जना भयो। सहकर्मीको उजुरीपछि एक व्यक्तिलाई तीन महिनाको जेल सजाय र दुबैलाई कामबाट निकालिएको थियो।

इछन क्षेत्रमा पनि खानाको विषयमा दुई नेपाली महिलाबीचको विवाद हात हालाहालमा परिणत भयो। प्रहरीले नियन्त्रणमा लिएर कानूनी प्रक्रिया अगाडि बढाएपछि उनीहरू कामबाट बर्खास्त भई नेपाल फर्किन बाध्य भए।

सहकर्मीबीचको इर्ष्या, आर्थिक ठगी, मदिरा सेवन र व्यक्तिगत विवादले गर्दा सहकार्यको वातावरणमा कमी देखिएको छ।

दक्षिण कोरिया सरकारले कानूनी दायित्वलाई कडाइका साथ पालन गराउने भएकाले यहाँका कामदारहरूलाई कानूनी र कार्यस्थलका नियमहरूको पालना गर्न विशेष सचेत रहनुपर्ने दूतावास स्रोतले बताएको छ।

दूतावासले सहकर्मीबीचको विवादलाई सौहार्दपूर्ण संवादबाट समाधान गर्न सुझाव दिएको छ। कानूनी प्रक्रियाको पालना र सहकर्मी तथा रोजगारदातासँग सकारात्मक सम्बन्धले मात्र कामदारहरूको भविष्य सुरक्षित रहन सक्छ।