तानसेन (पाल्पा): उपप्रधानमन्त्री एवं अर्थमन्त्री विष्णुप्रसाद पौडेलले अर्थतन्त्र सुधारका लागि उच्चस्तरीय आर्थिक सुधार सुझाव आयोगले पेश गरेका सुझावहरू कार्यान्वयन गरिने बताएका छन्।

नेपाल पत्रकार महासंघ पाल्पा शाखाले तानसेनमा आयोजना गरेको पत्रकार भेटघाट कार्यक्रममा बोल्दै अर्थमन्त्री पौडेलले आयोगको प्रतिवेदनलाई गम्भीर रूपमा अध्ययन गरी तत्काल कार्यान्वयन गर्न सकिने बुँदामा सरकार अघि बढ्ने बताएका हुन्।

“अर्थतन्त्रलाई चलायमान बनाउने र सुधारतर्फ लैजाने सुझावहरूलाई कार्यान्वयनको चरणमा लैजान्छौं। अनुशासित ढंगले स्रोत व्यवस्थापन गर्दै आगामी आर्थिक वर्ष २०८२/८३ को बजेट तयार गर्दैछौं,” मन्त्री पौडेलले भने।

सरकार अनुशासित ढंगले स्रोत परिचालन गर्न नसके थप चुनौती आउने चेतावनी दिँदै उनले देशलाई आर्थिक संकटमा जान नदिने प्रतिबद्धता व्यक्त गरे। आगामी बजेट प्रतिफलमुखी हुने र निजी क्षेत्र तथा उत्पादन क्षेत्रलाई प्राथमिकतामा राखिने पनि उनले जानकारी दिए।

अर्को प्रसङ्गमा, अर्थमन्त्री पौडेलले नेपाल राष्ट्र बैंकको गभर्नरमा योग्य र सक्षम व्यक्तिलाई नियुक्त गर्ने तयारी भइरहेको उल्लेख गरे। “बजारमा जस्तो चर्चा भइरहेको छ, त्यस्तो होइन। यो विषयमा अनावश्यक हल्ला चलिरहेको छ। सरकारले सकारात्मक सन्देश दिने निर्णय चाँडै ल्याउनेछ,” उनले स्पष्ट पारे।

प्रधानमन्त्री केपी शर्मा ओलीको नेतृत्वमा सरकारले ठूला पूर्वाधार विकाससहित समृद्धिको यात्रा अघि बढाइरहेको उल्लेख गर्दै उपप्रधानमन्त्री पौडेलले भ्रष्टाचार नियन्त्रण र सुशासन स्थापनामा सरकार कडाइका साथ अघि बढिरहेको दाबी गरे।

काठमाडौं: युरोपका तीन देश—हंगेरी, अस्ट्रिया र स्लोभाकिया—हाल फुट एन्ड माउथ डिजिज (एफएमडी) को प्रकोपका कारण संकटपूर्ण अवस्थामा पुगेका छन्। जनावरहरूमा देखिएको यो संक्रामक रोगले अराजकता निम्त्याउँदै सिमाना बन्द गराउने स्थिति ल्याएको छ।

हंगेरीमा ५० वर्षपछि पहिलो पटक एफएमडी को संक्रमण पुष्टि भएपछि युरोपभर त्रास फैलिएको हो। रोग जनावरबीच सर्ने भएकाले व्यापक नियन्त्रणका उपायस्वरूप हजारौं गाईवस्तु नष्ट गरिएका छन्। सरकारी अधिकारीहरूका अनुसार यो प्रकोप प्राकृतिक नभई योजनाबद्ध जैविक हमला हुन सक्ने आशंका बढ्दै गएको छ।

हंगेरीका प्रधानमन्त्री भिक्टर ओर्बानका प्रमुख सल्लाहकार गेर्गेली गुल्यासले भने, “हामीले प्राप्त गरेको जानकारीका आधारमा यो भाइरस प्राकृतिक नभई कृत्रिम रूपले सिर्जना गरिएको हुन सक्ने सम्भावना नकार्न सक्दैनौं।”

उक्त दाबी विदेशी प्रयोगशालाबाट प्राप्त प्रारम्भिक मौखिक रिपोर्टहरूमा आधारित भए पनि हालसम्म वैज्ञानिक रूपमा पुष्टि भएको छैन। यद्यपि, विश्व पशु स्वास्थ्य संगठन (WOAH) ले मार्च महिनामा हंगेरीको उत्तर–पश्चिमी सीमास्थित एक गाई फार्ममा पहिलो केस पुष्टि भएको जानकारी दिएको छ। त्यसपछि देशभर १,००० भन्दा बढी फार्महरूमा परीक्षण गरिएको थियो, जसमध्ये चारवटा फार्ममा भाइरस पुष्टि भयो।

डिसेम्बर २०२४ को तथ्यांकअनुसार हंगेरीमा करिब ८.६१ मिलियन गाईवस्तु थिए, जुन युरोपेली संघ (EU) का कुल गाईवस्तुको १.२५ प्रतिशत हो। एफएमडी फैलिन नदिन सरकारले लाखौं जनावर नष्ट गर्ने अभियान थालेको छ।

स्लोभाकियाको दक्षिणी भागमा पनि रोग तीव्र गतिमा फैलिरहेको छ। संक्रमण रोकथामका लागि अस्ट्रियाले हंगेरीसँगको २१वटा तथा स्लोभाकियासँगको दुईवटा सिमानाहरू अस्थायी रूपमा बन्द गरेको छ। यी सिमानाहरूमा कडा निगरानीसहित कीटाणु नाश केन्द्रहरू (disinfection zones) स्थापना गरिएको छ।

हंगेरीका किसान पल मिक्सनरले आफ्नो फार्ममा रहेका ३ हजार गाईवस्तु नष्ट गरिएको जानकारी दिए। “यो सत्य हुन सक्दैन जस्तो लाग्छ, सबैले रोइरहेका छन्,” उनले भावुक हुँदै भने। यद्यपि, उनले पुनः निर्माणका लागि संकल्प लिएको बताउँदै दुई हप्ताभित्र चारा सङ्कलन सुरु गर्ने योजना बनाएको खुलाए।

एफएमडी मानिसहरूका लागि खतरनाक नभए पनि गाईवस्तु, भेडा र बाख्राजस्ता जनावरहरूमा अत्यन्त छिटो फैलिन्छ। यसले ती जनावरहरूमा ज्वरो, मुख र खुट्टामा घाउ, थकान, दूध उत्पादनमा गिरावटजस्ता लक्षण देखाउँछ।

विशेषज्ञहरूका अनुसार यो रोग आर्थिक दृष्टिले अत्यन्त विनाशकारी हुन्छ। पशुपालनमा आश्रित किसानको जीवनयापन नै संकटमा पार्ने खालको रोग भएकोले यसप्रति समयमै ध्यान दिनु अत्यावश्यक छ।

युरोपेली संघका अन्य सदस्य राष्ट्रहरूले पनि उच्च सतर्कता अपनाउन थालेका छन्। संक्रमित देशहरूबाट जनावर वा पशुजन्य उत्पादन आयातमा प्रतिबन्ध लगाउने तयारी भइरहेको छ।

यदि रोगको उत्पत्ति कृत्रिम रूपमा भएको प्रमाणित भयो भने यसले जैविक हतियार सम्बन्धी अन्तर्राष्ट्रिय कानुन तथा सम्बन्धहरूमा ठूलो बहस सिर्जना गर्नेछ।

काठमाडौँ: शिक्षा ऐन जारी गर्न माग गर्दै आन्दोलनरत शिक्षकहरूले आफूहरूको माग पूरा नभएसम्म विद्यालय नफर्किने अडान लिएका छन्। शनिवार काठमाडौँको माइतीघर मण्डलामा भएको प्रदर्शनका क्रममा उनीहरूले यस्तो बताएका हुन्।

चैत २० गतेदेखि सुरु भएको आन्दोलन शनिवार ११ औँ दिनमा पुगेको छ। शिक्षक महासंघको नेतृत्वमा भइरहेको आन्दोलन शिक्षा ऐन जारी गर्नुपर्ने मुख्य मागसहित अघि बढाइएको हो। आन्दोलनकै क्रममा महासंघ सरकारसँग वार्तामा पनि बसेको छ।

नेपाल शिक्षक महासंघ राष्ट्रिय कार्यसमिति सदस्य गंगा ढुंगानाले सरकार र महासंघबीच विगतमा भएको सहमति अनुसार शिक्षा ऐन जारी नगरेकाले आन्दोलन गर्नुपरेको बताइन्। उनले करिब एक लाख शिक्षक सडकमा उत्रँदा पनि सरकारले शिक्षा क्षेत्रप्रति बेवास्ता देखाएको आरोप लगाइन्।

ढुंगानाले संसद्को नियमित अधिवेशन, विशेष अधिवेशन वा अध्यादेशमार्फत शिक्षा ऐन जारी गर्नुबाहेक विकल्प नभएको बताउँदै, शिक्षकहरूको माग बेवास्ता भएमा शिक्षा क्षेत्र दशकौँसम्म प्रभावित हुन सक्ने चेतावनी दिइन्।

राष्ट्रिय शिक्षक मञ्च नेपालका अध्यक्ष कुमोदकुमार सिंहले ११ दिनको आन्दोलनपछि पनि सरकार गम्भीर नभएको उल्लेख गर्दै माग तत्काल सम्बोधन गर्नुपर्ने बताए। आन्दोलन अराजकतातर्फ मोडिएमा त्यसको जिम्मेवारी सरकारले लिनुपर्ने उनको भनाइ छ।

नेपाल शिक्षक महासंघ संखुवासभा जिल्ला अध्यक्ष शेरबहादुर पुरीले परिवर्तित राज्य व्यवस्थामा शासन र नीति नियम असंगत ढंगले चलिरहेको बताए। उनले पञ्चायती शासनकालको शिक्षा ऐन अहिलेसम्म विस्थापित नहुनु दुःखद भएको भन्दै संविधानअनुसार नयाँ शिक्षा ऐन जारी गर्नुपर्नेमा जोड दिए।

एक सामाजिक शिक्षकले सरकार र महासंघबीच भएको विगतको सहमति तत्काल कार्यान्वयन गर्नुपर्ने बताए। विद्यार्थी भर्नाको समय भएकाले शिक्षकहरूलाई विद्यालय फर्काउन शिक्षा ऐन तुरुन्त जारी गर्नुपर्ने उनको भनाइ थियो।

नेपाल शिक्षक संघ खाँदबारीका जिल्ला सचिव सन्तोष श्रेष्ठले शिक्षा ऐन जारी गर्नु सरकारको दायित्व भएको भन्दै आन्दोलनका कारण सरकार सञ्चालनमा अवरोध आए त्यसको जिम्मेवारी सरकारले लिनुपर्ने चेतावनी दिए।

शिक्षकहरूले शिक्षा ऐन जारी नभएसम्म विद्यालय नफर्किने अडान दोहोर्याएका छन्। उनीहरूले सरकार सामुदायिक विद्यालयलाई कमजोर बनाउन चाहेको आरोप पनि लगाएका छन्।

काठमाडौँ: नेपाल क्रिकेट सङ्घ (क्यान)ले आगामी मे महिनामा थाइल्याण्डमा आयोजना हुने आईसीसी महिला विश्वकप एसिया छनोट प्रतियोगिताका लागि दोस्रो चरणको बन्द प्रशिक्षणमा २० खेलाडीलाई बोलाएको छ।

क्यानका प्रवक्ता छुम्बी लामाका अनुसार दोस्रो चरणको तयारीलाई लक्षित गर्दै यी खेलाडीहरूलाई प्रशिक्षणमा सहभागी हुन बोलाइएको हो।

बन्द प्रशिक्षणमा बोलाइएका खेलाडीहरू:

इन्दु वर्मा

बिन्दु रावल

सम्झना खड्का

रुबिना छेत्री

रोमा थापा

कविता जोशी

यशोदा बिष्ट

रुबी पोद्दार

राजमती ऐरी

काजल श्रेष्ठ

पूजा महतो

कविता कुँवर

सबनम राई

ईश्वरी बिष्ट

सोमु बिष्ट

मनीषा उपाध्याय

रचना चौधरी

सिता राना मगर

सिमाना केसी

रिया शर्मा

क्यानले छनोट गरिएका खेलाडीहरूमध्ये अन्तिम टोली छान्नका लागि थप अभ्यास र मूल्याङ्कन गरिने जनाएको छ।

लेखनाथ (कास्की): होटल सङ्घ पोखराको आयोजनामा २०औँ फेवा नव वर्ष महोत्सव–२०८२ आजदेखि पोखरामा सुरु भएको छ। महोत्सव वैशाख १ गतेसम्म सञ्चालन हुनेछ।

पर्यटक लक्षित महोत्सवअन्तर्गत पोखराका सङ्घअन्तर्गतका सदस्य होटलहरूले आफ्नो प्रकाशित दररेटमा २० प्रतिशत छुट दिने भएका छन्। शुक्रवार आयोजित पत्रकार सम्मेलनमा सङ्घका अध्यक्ष तथा महोत्सव संयोजक लक्ष्मण सुवेदीले जानकारी दिँदै भक्तपुरको प्रसिद्ध बिस्केट जात्रा यसपटकको विशेष आकर्षण हुने बताए।

महोत्सवको विशेषता:

गण्डकी प्रदेशका ११ जिल्लाको मौलिक संस्कृति प्रदर्शन

बाजा, भजन, रत्यौली, र लोक दोहोरी कार्यक्रम

प्रदेशस्तरीय परम्परागत खाना प्रदर्शन

मनोरञ्जनात्मक खेलकुद, पर्यटक दौड, र व्याडमिन्टन कप प्रतियोगिता

पोखराको खहरेचोकदेखि ड्यामसाइड सम्मको करिब तीन किलोमिटर सडक क्षेत्रमा आयोजना

निःशुल्क प्रवेश

सङ्घका अध्यक्ष सुवेदीका अनुसार हाल पोखराका होटलहरूमा ६० प्रतिशत अकुपेन्सी रहेको छ, जुन महोत्सवको कारण ९० प्रतिशतसम्म पुग्ने अपेक्षा गरिएको छ।

महोत्सवको प्रवर्द्धकमा नेपाल पर्यटन बोर्ड गण्डकी प्रदेश र पोखरा महानगरपालिका रहेका छन्।