काठमाडौँ: हाल कोशी, बागमती र गण्डकी प्रदेशका केही स्थानहरूमा हल्कादेखि मध्यम वर्षा भइरहेको छ। मौसम पूर्वानुमान महाशाखाका अनुसार देशको पहाडी भू–भागमा आंशिकदेखि सामान्य बदली रहेको छ भने बाँकी भागमा आंशिकदेखि मुख्यतया सफा मौसम रहेको छ।
हाल देशमा पश्चिमी वायु, स्थानीय वायु, र अरब सागरबाट भित्रिएको जलवाष्पयुक्त हावाको संयुक्त प्रभाव देखिएको महाशाखाले जनाएको छ।
शनिबारको लागि पूर्वानुमान अनुसार:
सुदूरपश्चिम, कर्णाली र लुम्बिनी प्रदेशका साथै देशका पहाडी भू–भागका केही स्थानहरूमा मेघगर्जन र चट्याङसहित हल्कादेखि मध्यम वर्षाको सम्भावना छ।
बाँकी भू–भागका एक–दुई स्थानमा पनि यस्तै प्रकृतिको वर्षा हुन सक्नेछ।
देशको उच्च पहाडी तथा हिमाली भू–भागमा हल्का वर्षा र हिमपातको सम्भावना रहेको छ।
महाशाखाले हालसम्म देशभर देखिएको तुवाँलो क्रमशः घट्दै जाने पूर्वानुमान गरेको छ। साथै, वर्षा, चट्याङ, हिमपात आदिका कारण स्वास्थ्य, जनजीवन, कृषि, सडक तथा हवाई यातायातमा असर पर्न सक्ने भएकाले आवश्यक सतर्कता अपनाउन अनुरोध गरिएको छ।
