काठमाडौं: दिल्लीस्थित विशेष अदालतको आदेशपछि भारतको राष्ट्रिय अनुसन्धान एजेन्सी (एनआईए) ले २६/११ मुम्बई आक्रमणका आरोपी तहव्वुर हुसेन राणालाई १८ दिनको हिरासतमा लिएको छ।
अमेरिकाबाट सुपुर्दगी गरिएको राणालाई बिहीबार पटियाला हाउसस्थित एनआईए विशेष अदालतमा पेश गरिएको थियो। अदालतले अनुसन्धानका लागि उनलाई १८ दिन एनआईएको हिरासतमा राख्न अनुमति दिएको हो।
एनआईएले एक विज्ञप्ति जारी गर्दै अदालतको आदेश अनुसार राणालाई हिरासतमा लिइएको जानकारी दिएको छ। एजेन्सीले हिरासत अवधिमा २००८ को मुम्बई आतंकवादी आक्रमणको योजनाबारे राणासँग विस्तृत रूपमा सोधपुछ गरिने जनाएको छ।
उक्त आक्रमणमा १६६ जनाको मृत्यु भएको थियो भने २३८ भन्दा बढी घाइते भएका थिए।
राणाका कानुनी प्रतिनिधि पियुष सचदेवले सञ्चारकर्मीहरूसँग कुरा गर्दै भने, “एनआईएले २० दिनको प्रहरी हिरासत मागेको थियो। अदालतले सबै पक्षको सुनुवाइपछि १८ दिनको हिरासत स्वीकृत गरेको छ। यदि थप समय आवश्यक भयो भने एनआईएले पुनः निवेदन दिन सक्छ।”
उनका अनुसार अदालतले राणालाई हिरासतमा पठाउनु अघि र फेरि पेश गर्नु अघिको दिन, दुबैपटक उनको पूर्ण स्वास्थ्य परीक्षण गर्न आदेश दिएको छ।
