बाजुरा । आगामी फागुन २१ गते हुने प्रतिनिधि सभा निर्वाचनलाई लक्षित गर्दै बाजुरामा मतदाता शिक्षा कार्यक्रम प्रभावकारी रूपमा सञ्चालन भइरहेको छ। जिल्ला निर्वाचन कार्यालय बाजुराले मतदातालाई सही तरिकाले मताधिकार प्रयोग गर्न सक्षम बनाउन जिल्लाका नौवटै स्थानीय तहमा अभियान तीव्र पारेको हो।

निर्वाचनको माहोल तातिँदै जाँदा जिल्लाका हरेक वडा र गाउँबस्तीमा मतदाता शिक्षकहरू सक्रिय देखिएका छन्। प्रत्येक वडामा एक–एक जना मतदाता शिक्षक नियुक्त गरी मतदान प्रक्रिया, मतपत्रमा सही छाप लगाउने तरिका, बदर मत हुन नदिन अपनाउनुपर्ने सावधानी तथा मतदान समयबारे घरदैलोमै पुगेर जानकारी दिइँदैछ।

बडीमालिका नगरपालिका–७ का स्थानीय मनसुर पाध्यायले मतदाता शिक्षकबाट प्रत्यक्ष जानकारी पाएपछि ढुक्क भएर मतदान गर्न सक्ने विश्वास बढेको बताए। उनका अनुसार यसअघि यस्ता कार्यक्रम नहुँदा केही अन्योल रहने गरे पनि अहिले घरमै सिक्ने अवसरले सहजता थपिएको छ।

जिल्ला निर्वाचन कार्यालय बाजुराका प्रमुख निर्वाचन अधिकारी भीमबहादुर शाहीका अनुसार मतदाता शिक्षा कार्यक्रम प्रभावकारी ढंगले सञ्चालन भइरहेको छ। यसले बदर मत घटाउने र निर्वाचन प्रक्रिया थप व्यवस्थित बनाउने अपेक्षा गरिएको उनले बताए।

निर्वाचनका लागि आवश्यक मतपत्रसहित सम्पूर्ण सामग्री जिल्लामा पुगिसकेको छ। बाजुरामा एक स्वतन्त्र उम्मेदवारसहित सात दल चुनावी प्रतिस्पर्धामा छन्। जिल्लाका ७७ मतदानस्थलमा ११८ मतदान केन्द्र तोकिएका छन्।

तीमध्ये ६२ मतदान केन्द्र अतिसंवेदनशील, १२ संवेदनशील र बाँकी सामान्य श्रेणीमा वर्गीकृत गरिएका छन्। जिल्लामा कुल ८७ हजार ८६१ मतदाता रहेका छन्, जसमध्ये ४२ हजार ४३१ महिला, ४२ हजार ४२८ पुरुष र दुई जना अन्य रहेको जिल्ला निर्वाचन कार्यालयले जनाएको छ।

रौतहट । नेपाली कम्युनिष्ट पार्टी (एकीकृत समाजवादी) का सह–संयोजक तथा पूर्वप्रधानमन्त्री माधव कुमार नेपालले सक्रिय चुनावी राजनीतिबाट बाहिरिने घोषणा गरेका छन्। बिहीबार आफ्नो गृहजिल्ला रौतहटको गौरमा आयोजित पत्रकार सम्मेलनमा उनले अब कुनै पनि निर्वाचनमा उम्मेदवार नबन्ने दृढ निर्णय सार्वजनिक गरेका हुन्।

नेपालले वर्तमान निर्वाचनलाई आफ्नो जीवनको अन्तिम चुनावी मैदानका रूपमा लिएको स्पष्ट पारे। उनले आफ्नो अन्तरात्माको आवाजलाई सम्मान गर्दै आगामी दिनमा चुनावी प्रतिस्पर्धाबाट विश्राम लिने निष्कर्षमा पुगेको बताए।

उनले अबको समय अध्ययन, लेखन, देश–विदेश भ्रमण तथा सामाजिक सेवामा समर्पित गर्ने योजना रहेको जानकारी दिए। लामो राजनीतिक यात्रापछि समाजसेवा र बौद्धिक क्षेत्रमा योगदान दिने सोचका साथ आफूले नयाँ अध्याय सुरु गर्न लागेको उनको भनाइ थियो।

यसैबीच, आफूविरुद्ध विशेष अदालतमा विचाराधीन पतञ्जली योगपीठको जग्गा प्रकरणलाई उनले राजनीतिक प्रतिशोधको संज्ञा दिएका छन्। नेपालले नेकपा एमालेका अध्यक्ष केपी शर्मा ओलीले आफूलाई सिध्याउने उद्देश्यले षड्यन्त्र रचेको आरोप लगाए। उनले ओलीले आफ्ना राजनीतिक विरोधीहरू, राष्ट्रिय स्वतन्त्र पार्टी (रास्वपा) लगायत अन्य दलहरूप्रति पनि संकुचित सोच राखेको टिप्पणी गरे।

माधव नेपाल हाल रौतहट निर्वाचन क्षेत्र नम्बर १ बाट प्रतिनिधि सभा सदस्य पदका लागि प्रतिस्पर्धामा रहेका छन्।

काठमाडौं । अमेरिका र इरानबीचको तनाव तीव्र बन्दै गएको छ। अमेरिकी समाचार माध्यम Axiosका अनुसार यदि अमेरिकाले सैन्य कारबाही गर्छ भने त्यो सीमित वा प्रतीकात्मक नभई हप्तौँसम्म चल्ने व्यापक अभियान हुन सक्छ। ह्वाइट हाउसका एक अधिकारीलाई उद्धृत गर्दै रिपोर्टमा आगामी हप्ताहरूमा आक्रमणको सम्भावना उच्च रहेको उल्लेख गरिएको छ।

रिपोर्टका अनुसार सम्भावित कारबाही इजरायलसँगको सहकार्यमा हुन सक्ने र लक्ष्य इरानको आणविक तथा क्षेप्यास्त्र पूर्वाधार हुन सक्ने आकलन गरिएको छ। इजरायलका पूर्व सैन्य गुप्तचर प्रमुख आमोस याडलिनले द्वन्द्वको सम्भावना बढ्दै गएको बताए पनि कूटनीतिक विकल्प पूर्ण रूपमा समाप्त नभएको संकेत दिएका छन्।

यसैबीच, अमेरिकी राष्ट्रपति डोनाल्ड ट्रम्पले आणविक कूटनीतिसँगै मध्यपूर्वमा सैन्य उपस्थिति उल्लेखनीय रूपमा बढाएका छन्। दुई विमानवाहक पोत, करिब एक दर्जन युद्धपोत, सयौँ लडाकु विमान र हवाई प्रतिरक्षा प्रणाली तैनाथ गरिएको जनाइएको छ।

ट्रम्प प्रशासनका प्रतिनिधिहरूले जेनेभामा इरानी विदेशमन्त्री अब्बास अराघचीसँग वार्ता गरेका छन्। दुवै पक्षले केही प्रगति भएको बताए पनि प्रमुख मुद्दामा सहमति अझै टाढा रहेको संकेत गरिएको छ। अमेरिकी उपराष्ट्रपति जे.डी. भान्सले कूटनीति प्रयास जारी रहे पनि इरानले केही “रातो रेखा” स्वीकार नगरेको बताएका छन्।

यसबीच, इरान र रुसले ओमान सागर र उत्तरी हिन्द महासागरमा संयुक्त नौसैनिक अभ्यासको घोषणा गरेका छन्। इरानले होर्मुज जलडमरूमध्य नजिक सैन्य अभ्यास गरेपछि क्षेत्रीय तनाव थप बढेको छ।

होर्मुज जलडमरूमध्य विश्व ऊर्जा आपूर्तिका लागि अत्यन्त संवेदनशील मार्ग हो। विश्वको करिब २० प्रतिशत तेल आपूर्ति यही मार्गबाट ओसारपसार हुन्छ। यस क्षेत्रमा अस्थिरता बढेमा विश्व ऊर्जा बजारमा प्रत्यक्ष असर पर्ने विश्लेषण गरिएको छ।

समग्रमा, सैन्य तयारी र कूटनीतिक प्रयास समानान्तर रूपमा अघि बढिरहेकाले आगामी केही हप्ता क्षेत्रीय र अन्तर्राष्ट्रिय सुरक्षाका दृष्टिले निर्णायक हुन सक्ने देखिएको छ।

काठमाडौँ । बेलायतका पूर्व राजकुमार एन्ड्रयू माउन्टबेटन–विन्डसरलाई सार्वजनिक पदको दुरुपयोग गरेको आरोपमा पक्राउ गरिएको छ। उनी बेलायतका राजा चार्ल्स तृतीयका भाइ हुन्।

थेम्स भ्याली प्रहरीले यौन अपराधी जेफरी एपस्टीनसँग गोप्य जानकारी साझा गरेको आशंकामा अनुसन्धान सुरु गरेपछि उनलाई पक्राउ गरिएको जनाएको छ। एन्ड्रयूले भने आफूले कुनै पनि गलत कार्य नगरेको दाबी गर्दै आएका छन्।

उनको राजकुमार उपाधि गत वर्ष हटाइएको थियो र त्यसपछि उनले विन्डसरस्थित रोयल लज छोडेका थिए। हाल उनी नोरफोकको स्यान्ड्रिङ्घम क्षेत्रमा बस्दै आएको बताइएको छ। पक्राउ कहाँबाट गरिएको हो भन्ने खुलाइएको छैन, तर नोरफोक क्षेत्रमा प्रहरीको सङ्केत नभएका सवारी साधन देखिएको जनाइएको छ।

थेम्स भ्याली प्रहरीले विज्ञप्ति जारी गर्दै ६० वर्षभन्दा माथिका एक व्यक्तिलाई सार्वजनिक कार्यालयमा दुव्र्यवहारको शंकामा नोरफोकबाट पक्राउ गरिएको र बर्कशायर तथा नोरफोकका ठेगानामा खोजी भइरहेको जनाएको छ। ती व्यक्ति हाल प्रहरी हिरासतमा छन्।

प्रहरीले राष्ट्रिय निर्देशिकाअनुसार पक्राउ परेकाको नाम सार्वजनिक नगर्ने जनाएको छ। सहायक प्रमुख प्रहरी अधिकारी ओलिभर राइटले अनुसन्धानको निष्पक्षता र न्याय कायम राख्दै विस्तृत अनुसन्धान अघि बढाइएको बताए।

बिबिसीका अनुसार एन्ड्रयूमाथि सार्वजनिक पदको दुरुपयोग सम्बन्धी आरोपमा अनुसन्धान जारी छ।

काठमाडौँ । नेपाली कांग्रेसले सुशासनलाई मुख्य प्राथमिकतामा राख्दै निर्वाचनपछि सरकारमा गएमा कार्यान्वयन गर्ने विभिन्न योजना सार्वजनिक गरेको छ। फागुन २१ गते हुने प्रतिनिधिसभा निर्वाचनका लागि तयार गरिएको प्रतिज्ञापत्रबारे आयोजित ‘हाम्रो प्रतिज्ञा, तपाईंको प्रश्न’ अन्तरक्रिया कार्यक्रममा सभापति गगन कुमार थापाले सुशासन स्थापना र मुलुकको रूपान्तरणबारे आफ्नो धारणा प्रस्तुत गरेका हुन्।

कार्यक्रममा सभापति थापाले संविधान संशोधन, मन्त्रालय संख्या घटाउने, भ्रष्टाचार निर्मूल गर्ने र सेवा प्रवाहलाई प्रभावकारी बनाउने विषयमा विस्तृत व्याख्या गरे। उनले कांग्रेस बहुमतमा गएर सरकार गठन गरे पनि नगरे पनि प्रतिज्ञापत्रका प्रतिबद्धताबाट पछि नहट्ने स्पष्ट पारे।

कांग्रेसले २०७२ असोज ३ गते जारी भएको वर्तमान संविधानप्रति पूर्ण प्रतिबद्धता जनाएको छ। तर, विद्यमान निर्वाचन प्रणालीका कारण कुनै एक दलले स्पष्ट बहुमत ल्याउन कठिन हुने भएकाले निर्वाचन प्रणाली संशोधन गर्नुपर्ने प्रस्ताव प्रतिज्ञापत्रमा समेटिएको छ।

सभापति थापाले भने, “संविधान संशोधन गरेर निर्वाचन प्रणाली परिवर्तन गर्ने हाम्रो तयारी छ। एउटा दलले बहुमत ल्याउन सक्ने व्यवस्था बनाउनुपर्छ। संशोधन गर्दा समावेशितालाई अझै बलियो बनाउने हाम्रो योजना छ।”

काठमाडौं। राष्ट्रिय स्वतन्त्र पार्टी (रास्वपा)का सभापति रवि लामिछानेले सबै दललाई एक भएर रास्वपासँग भिड्न चुनौती दिएका छन्। बिहीबार सुर्खेतमा आयोजित ‘हामी आयौं’ परिवर्तन उद्घोष सभामा उनले भने, “चुनावमा भिड नभई मतपत्र भिडाउने हो। भिड गर्न हामीलाई जरुरी छैन, निर्वाचनबाट भाग्य बदल्ने काममा लागेको छौं। जनताले भोटबाट आफ्नो तागत देखाउने अवसर छ।”

लामिछानेले अहिले चुनाव नहुँदा वा सार्नुपर्छ भन्ने बहसको प्रतिकृया दिँदै भने, “लोकतन्त्रको ठूलो तागत जनताको हो। रोडबाट भए रोडबाट, भोटबाट भए भोटबाट आउनुहोस्। हामी भोटबाट परिवर्तन चाहन्छौं।”

सभापतिले लोकतन्त्रलाई खतरा भएकाहरू हेलिकप्टर चढेर भागेको उल्लेख गर्दै, सिंहदरबार वा बालुवाटारमा आएपछि मात्र खतरा उत्पन्न हुने टिप्पणी गरे। उनले थपे, “परिवर्तनको आगो र जनताको चेतनालाई कसैले रोक्न सक्दैन। लोकतन्त्र जोगाउन ठेक्का कुनै नेता वा पार्टीले लिनु पर्दैन, जनताले नै बचाउँछन्।”

काठमाडौं। नेपाली कांग्रेसका सभापति गगन कुमार थापाले आगामी पाँच वर्षभित्र भ्रष्टाचारमुक्त नेपाल निर्माण गर्ने योजना सार्वजनिक गरेका छन्। काठमाडौंको राष्ट्रिय सभागृहमा आयोजित ‘हाम्रो प्रतिज्ञा तपाईंको प्रश्न’ कार्यक्रममा सभापतिले भ्रष्टाचारमा मुछिएका व्यक्तिको पद बच्ने छैन भनी स्पष्ट पारे।

उनले भने, “कांग्रेसले भ्रष्टाचार छानबिन गर्दा नेता वा पदको ठूलो ठाउँ हेर्ने छैन। जोसुकै भए पनि भ्रष्टाचारको प्रमाण रहे सार्वजनिक पदमा बस्ने अधिकार छैन।”

सभापति थापाले २०४७ साल यता सबै पार्टीका नेताको भ्रष्टाचार छानबिन हुने बताए। उनले नागरिक केन्द्रित सेवा प्रवाहमा जोड दिँदै भने, “कुन काम कति समयमा सकिन्छ त्यो समयमा नै हुनुपर्छ। सेवा ढिला भए नागरिकलाई क्षतिपूर्ति दिनुपर्ने व्यवस्था हुनेछ।”

थापाले डिजिटल सेवा प्रणाली मार्फत ७ दिन, २४ घण्टा सेवा सुनिश्चित गर्न र घरमै नागरिकलाई सेवा पुर्‍याउन प्रविधि र पूर्वाधार विकासको योजनाबद्ध प्रयोग हुने बताए।

काठमाडौं। राष्ट्रिय स्वतन्त्र पार्टी (रास्वपा)ले फागुन २१ गतेको चुनावका लागि आफ्नो बाचापत्र सार्वजनिक गरेको छ। पार्टी सभापति रवि लामिछाने, वरिष्ठ नेता बालेन साह, उपसभापति डिपी अर्याल, स्वर्णिम वाग्ले लगायतका नेताहरूले बिहीबार कर्णाली प्रदेशको राजधानी सुर्खेतमा आयोजित परिवर्तन उद्घोष सभामा बाचापत्र पेश गरेका हुन्।

बाचापत्रअनुसार, सरकार गठन भएको १०० दिनभित्र सहकारीमा फसेको साना बचतकर्ताको पैसा फिर्ता गरिनेछ। रास्वपाले बचत फिर्ताको पूर्ण ग्यारेन्टी र समयसीमा तोकेर, बचतकर्ताको सम्पत्ति सुरक्षित राख्दै ऋण असुली गर्ने नीति अघि सारेको छ। पार्टीले भनेको छ, “थुनेर होइन, सुनेर” समाधानको नीति अनुसार यदि सहकारी सञ्चालकसँग भरपर्दो योजना छ भने कानुनी बाटो प्रयोग गरी ‘मिलापत्र’ मार्फत फिर्ता दिने अवसर प्रदान गरिनेछ।

त्यस्तै, भाद्र २३–२४ को जेनजी आन्दोलनमा भएको बल प्रयोग घटनाको छानबिन गर्न गठित न्यायिक आयोगको सिफारिस कार्यान्वयन गर्ने प्रतिबद्धता पनि बाचापत्रमा उल्लेख गरिएको छ।

पार्टीले २०४६ सालदेखि सार्वजनिक पदमा आसीन व्यक्तिहरूको सम्पत्ति पारदर्शी रूपमा छानबिन गर्ने, अवैध सम्पत्ति जफत गर्ने र राष्ट्रियकरण गर्ने स्पष्ट कार्यविधि तयार गर्ने, साथै कुनै भ्रातृ संगठन स्थापना नगर्ने प्रतिबद्धता समेत व्यक्त गरेको छ।

काठमाडौं । जेनजी आन्दोलनपछि हुन लागेको प्रतिनिधिसभा निर्वाचनमा अब १४ दिन मात्र बाँकी रहेको छ। निर्वाचनको तयारीलाई तीव्र पार्दै निर्वाचन आयोग ले प्रतिनिधिसभा सदस्य निर्वाचनअन्तर्गत समानुपातिक निर्वाचन प्रणालीका लागि आवश्यक अस्थायी मतदाता नामावली संकलन तथा स्थायी मतदान प्रक्रियालाई व्यवस्थित बनाउन ‘अस्थायी मतदाता नामावलीसम्बन्धी कार्यविधि २०८२’ जारी गरेको छ।

आयोगले मतदाता नामावलीसम्बन्धी ऐन, २०७३ को दफा ४४ ले दिएको अधिकार प्रयोग गर्दै उक्त कार्यविधि लागू गरेको जनाएको छ। कार्यविधिअनुसार आयोगले स्थायी मतदाता नामावली संकलन कार्यक्रमसहितको सूचना प्रकाशन गर्नेछ। आवश्यकताअनुसार सो सूचना राष्ट्रियस्तरका सञ्चारमाध्यममार्फत प्रकाशन तथा प्रसारण गर्न सकिने व्यवस्था गरिएको छ।

नेपाल सरकार, प्रदेश सरकार र स्थानीय तहका कर्मचारी, सरकारको स्वामित्व वा नियन्त्रणमा रहेका संस्थाका कर्मचारी, सेना, प्रहरी, कारागारमा रहेका थुनुवा तथा कैदी, निर्वाचन कार्यमा खटिएका कर्मचारी र सुरक्षाकर्मी तथा संवैधानिक निकायका प्रमुख र पदाधिकारीको नाम स्थायी मतदाता नामावलीमा समावेश गरिनेछ।

कार्यविधिअनुसार कुनै व्यक्तिको नाम छुटेको वा विवरणमा त्रुटि देखिएमा सम्बन्धित व्यक्तिले प्रमाणसहित प्रमुख नाम दर्ता अधिकारीसमक्ष निवेदन दिई नाम समावेश गराउन वा त्रुटि सच्याउन सक्ने व्यवस्था रहेको आयोगले जनाएको छ।

चितवन । Bharatpur Airport मा हवाई इन्धन सेवा सुरु गरिएको छ। Nepal Oil Corporation ले बुधबारदेखि हवाई इन्धन ‘रिफिलिङ’ सेवा सञ्चालनमा ल्याएको हो।

निगमका कार्यकारी निर्देशक डा. चण्डिकाप्रसाद भट्टका अनुसार भरतपुरमा हवाई यात्रुको चाप बढ्दै गएपछि रिफिलिङ काउन्टर सञ्चालनमा ल्याइएको हो। हवाई इन्धन अभावका कारण यात्रुलाई असुविधा नहोस् भन्ने उद्देश्यले सेवा सुरु गरिएको उनले बताए।

हाल भरतपुरबाट दैनिक आठवटा उडान सञ्चालन भइरहेको र आवश्यकताअनुसार जहाजमा इन्धन भर्न सकिने व्यवस्था मिलाइएको जानकारी दिइएको छ। निगमका प्रवक्ता मनोजकुमार ठाकुरका अनुसार विमानस्थलमा दुईवटा रिफिलिङ काउन्टर स्थापना गरिएको छ, जहाँबाट दैनिक २२ हजार लिटर हवाई इन्धन आपूर्ति गर्न सकिने क्षमता रहेको छ। प्रारम्भिक चरणमा सिनामङ्गल कार्यालयका छ जना कर्मचारीमार्फत सेवा सुरु गरिएको छ।

अहिले भरतपुर–काठमाडौँ–भरतपुर दैनिक उडान तथा आंशिक रूपमा भरतपुर–पोखरा–भरतपुर उडान सञ्चालन हुँदै आएको छ। Buddha Air का स्टेसन म्यानेजर भक्तबहादुर बस्नेतले रिफिलिङ काउन्टर स्थापना भएपछि यात्रु र विमान दुवैलाई सहज भएको बताए। अब जहाजले काठमाडौँबाट अतिरिक्त इन्धन बोकेर आउनुपर्ने बाध्यता हटेकाले थप यात्रु ल्याउन सकिने उनले उल्लेख गरे।