काठमाडौं। राष्ट्रिय स्वतन्त्र पार्टी (रास्वपा)का सभापति रवि लामिछानेले सबै दललाई एक भएर रास्वपासँग भिड्न चुनौती दिएका छन्। बिहीबार सुर्खेतमा आयोजित ‘हामी आयौं’ परिवर्तन उद्घोष सभामा उनले भने, “चुनावमा भिड नभई मतपत्र भिडाउने हो। भिड गर्न हामीलाई जरुरी छैन, निर्वाचनबाट भाग्य बदल्ने काममा लागेको छौं। जनताले भोटबाट आफ्नो तागत देखाउने अवसर छ।”
लामिछानेले अहिले चुनाव नहुँदा वा सार्नुपर्छ भन्ने बहसको प्रतिकृया दिँदै भने, “लोकतन्त्रको ठूलो तागत जनताको हो। रोडबाट भए रोडबाट, भोटबाट भए भोटबाट आउनुहोस्। हामी भोटबाट परिवर्तन चाहन्छौं।”
सभापतिले लोकतन्त्रलाई खतरा भएकाहरू हेलिकप्टर चढेर भागेको उल्लेख गर्दै, सिंहदरबार वा बालुवाटारमा आएपछि मात्र खतरा उत्पन्न हुने टिप्पणी गरे। उनले थपे, “परिवर्तनको आगो र जनताको चेतनालाई कसैले रोक्न सक्दैन। लोकतन्त्र जोगाउन ठेक्का कुनै नेता वा पार्टीले लिनु पर्दैन, जनताले नै बचाउँछन्।”
