काठमाडौँ: नेपाल विद्युत् प्राधिकरणले राजधानी काठमाडौँका विभिन्न स्थानमा आज बिहान १०ः३० देखि मध्याह्न १२ः०० बजेसम्म बिजुली कटौती गर्ने भएको छ ।

प्राधिकरणले एक सूचनामार्फत बलम्बु सबस्टेशनअन्तर्गत थानकोट फिडरअन्तर्गत पर्ने नैकाप, बलम्बु, चुनदेवी, खहरे, दशचोकलगायत क्षेत्रमा प्राविधिक जडान कार्यका लागि बिजुली कटौती हुने भएको छ ।

प्राधिकरणले सो फिडरअन्तर्गत उक्त स्थानलगायत सम्पूर्ण क्षेत्रका ग्राहक वर्गमा पर्न गएको असुविधाप्रति क्षमा मागेको छ । तोकिएको कार्य निर्धारित समयअगावै सम्पन्न भएमा तोकिएको अवधिभन्दा पहिल्यै बिजुली प्रवाह हुने सूचनामा उल्लेख छ ।

लिस्बन (पोर्चुगल):पोर्चुगलमा विद्युतीय राहदानी (ई–पासपोर्ट) वितरणका लागि आएको फ्रान्सस्थित नेपाली दूतावासको टोलीले कन्सुलर सेवा पनि सुरु गरेको छ।

टोलीले बुधबारदेखि लिस्बनस्थित ओलाइसमा सञ्चालनमा रहेको घुम्ती शिविरमार्फत कागजात प्रमाणीकरणलगायत कन्सुलर सेवाहरू दिन थालेको हो। पहिलो दिन १०५ प्रहरी चारित्रिक प्रमाणपत्र (प्रहरी रिपोर्ट) र ३९ अन्य कागजात प्रमाणीकरण गरिएको दूतावासले जनाएको छ। साथै, थप ३७ प्रहरी चारित्रिक प्रमाणपत्र प्रमाणीकरणका लागि सङ्कलन गरिएको छ।

पोर्चुगलका लागि गैरआवासीय नेपाली राजदूत तथा फ्रान्सका लागि नेपाली राजदूत सुधीर भट्टराईले प्रहरी रिपोर्ट र अन्य कागजात प्रमाणीकरणसम्बन्धी समस्यामा परेका नेपालीहरूको सहजताका लागि शिविर अवधि थप गरी कन्सुलर सेवा प्रदान गर्न थालिएको जानकारी दिए। उनले टोलीले अधिकृत वारेसनामा प्रमाणीकरण बाहेक प्रहरी चारित्रिक प्रमाणपत्र, शैक्षिक प्रमाणपत्र, नाता प्रमाणित, जन्मदर्ता, विवाह दर्तालगायत सबै प्रकारका कागजात प्रमाणीकरणसम्बन्धी सेवा प्रदान गरिरहेको बताए।

शिविरमार्फत १२ डिसेम्बरदेखि सुरु भएको राहदानी वितरण कार्यक्रमअन्तर्गत बुधबारसम्म २,४१० विद्युतीय राहदानी वितरण गरिएको छ। बाँकी रहेका राहदानी वितरण प्रक्रिया जारी रहेको राजदूत भट्टराईले जानकारी दिए।

दूतावासले टोलीले डिसेम्बर २१ सम्म लिस्बनमै रहेर कन्सुलर सेवा प्रदान गर्ने जनाएको छ। घुम्ती शिविरमार्फत राहदानीसहित कन्सुलर सेवा पाउँदा विशेषतः आवास अनुमतिपत्र (रेसिडेन्सी कार्ड)का लागि बायोमेट्रिक प्रक्रियामा रहेका नेपालीहरू बढी लाभान्वित भएका छन्।

रसुवा, केरुङ्ग: केरुङबाट मालसामान बोक्ने कन्टेनरहरूको चाप दिनानुदिन बढ्दै गएको छ। चिनियाँ सामग्री आयातका लागि दैनिक दुई दर्जनभन्दा बढी कन्टेनर केरुङ आउने गरेको सीमासुरक्षाकर्मीले जानकारी दिएका छन्।

रसुवा भन्सार कार्यालय टिमुरेका अनुसार स्याउ, लसुन, अदुवा, स्याउपाति, ओखर, चप्पल, तयारी पोशाक, विद्युतीय सामान, जलविद्युत् आयोजनाका उपकरण, र खेलौना लगायतका सामग्री आयात भइरहेका छन्। हाल दुई सयभन्दा बढी कन्टेनर भन्सार प्रक्रियामा रहेको बताइएको छ।

प्रमुख भन्सार अधिकृत तुलसीप्रसाद भट्टराईले रसुवागढी नाकाबाट सबैभन्दा धेरै ईभी (विद्युतीय सवारीसाधन) आयात हुने जानकारी दिए। चालु आर्थिक वर्षको साउनदेखि मङ्सिर मसान्तसम्म, तीन हजार सवारीसाधन नेपाल भित्रिएको छ। सवारीसाधन नै राजस्व आर्जनको प्रमुख स्रोत बनेको बताउँदै उनले चालु आव २०८१/८२ को पहिलो चौमासिकमा करिब एक सय २४ अर्बको सामग्री आयात भई १२ अर्बभन्दा बढी राजस्व संकलन भएको जानकारी गराए।

तर, रसुवागढी नाकाबाट मालसामानको निर्यात भने अत्यन्तै न्यून रहेको छ। उपलब्ध विवरण अनुसार ऊनी गलैँचा, बक्रम कपडा, तयारी कपडा, चाउचाउ, नुडल्स, जडीबुटी, अगरबत्ती, स्टिलउड, र काठका सामग्री प्रमुख निर्यात वस्तुमा पर्दछन्।

आयाततर्फ जुत्ताचप्पल, तयारी पोशाक, र विद्युतीय सामग्री उल्लेखनीय छन्। यस्तै, सीमाक्षेत्रमा गैरकानुनी गतिविधि नियन्त्रणका लागि नेपाल प्रहरी र सशस्त्र प्रहरीको २४सै घण्टा पहरा व्यवस्थाले सीमाक्षेत्र शान्त रहेको भन्सार अधिकारीले बताएका छन्।

विसं २०७२ देखि पूर्ण रूपमा सञ्चालनमा रहेको रसुवागढी नाका सडक मर्मतको अभावका कारण मालवाहक सवारीसाधन सञ्चालनमा असहजता भइरहेको छ। स्याफ्रुबेँसी–रसुवागढी सडक खण्डका होचो-अग्लो भागलाई मर्मत गरी सम्याउन थोरै खर्चले पनि ठूला सुधार हुने सुझाव सवारी चालकहरूले दिएका छन्।

डिब्बा चालक जङ्गबहादुर तामाङले वर्षायाममा समस्या हुने स्थानहरूमा रोलर प्रयोग गरी सम्याउन सके हिउँदमा सवारीसाधन चलाउन सहज हुने सुझाव दिएका छन्। तर, सडक अधिकारीको न्यून उपस्थितिले समस्या समाधानमा प्रभावकारी काम हुन नसकेको स्थानीयले बताए।

काठमाडौं। हाल देशमा पश्चिमी वायुको सामान्य प्रभाव रहेको छ।

जल तथा मौसम विज्ञान विभाग, मौसम पूर्वानुमान महाशाखाका अनुसार हाल कर्णाली, सुदूरपश्चिम र गण्डकी प्रदेशका पहाडी भू-भागमा आंशिक बदली रही बाँकी भू-भागमा मौसम मुख्यतया सफा रहेको छ। तराई तथा उपत्यका केही स्थानहरूमा हुस्सु साथै थोरै स्थानहरुमा कुहिरोको लागेको छ।

दिउँसो हिमाली र पहाडी क्षेत्रमा मुख्यतया सफा रहने सम्भावना रहेको छ। तराई क्षेत्रमा मुख्यतया सफा रहने सम्भावना रहेको छ। राति भने हिमाली र पहाडी क्षेत्रमा मुख्यतया सफा रहने सम्भावना रहेको छ ।तराई क्षेत्रमा मुख्यतया सफा रहने सम्भावना रहेको छ।

बिहानको समयमा तराई तथा उपत्यका केही स्थानहरूमा हुस्सु साथै थोरै स्थानहरुमा कुहिरोको सम्भावना रहेकोले दैनिक जनजीवन,पर्यटन, पर्वतारोहण, यातायात तथा हवाई उड्डयनमा असर पर्न सक्ने हुनाले आवश्यक सतर्कता अपनाउन महाशाखाले अनुरोध गरेको छ।

त्रिवेणी (नवलपरासी): कुनै समय दुर्गम मानिएको सर्दी क्षेत्र दुम्किबास–सर्दी कालोपत्रे सडकले जोडिएपछि अब सुगम बनेको छ। विनयी त्रिवेणी गाउँपालिकाले गौरवको योजनाका रूपमा अघि बढाएको यो सडकले घण्टौँको कठिन यात्रा गर्नुपर्ने बाध्यता अन्त्य गरेको छ।

गाउँपालिका अध्यक्ष घनश्याम गिरीका अनुसार दशकौँदेखिको सडक समस्या समाधान भएपछि अन्य विकासका गतिविधि पनि तीव्र भएका छन्। “दुम्किबास–डाँडाजोर–सिद्रे हुँदै कोल्टाडी जोड्ने झन्डै १४ किलोमिटर लामो सडकलाई कालोपत्रे बनाइएको छ। दशकौँदेखि निर्माण हुन नसकेको यो सडक चुनावी प्रतिबद्धता पूरा गर्दै सम्पन्न भएको छ। अब सर्दीसम्मको यात्रा केही समयमै सहजै सम्भव छ,” उहाँले बताउनुभयो।

पालिकाका इन्जिनियर शम्भु केसीले झन्डै रु १७ करोडको लागतमा यो सडक स्तरोन्नति भएको जानकारी दिनुभयो। उहाँका अनुसार यो सडकले स्थानीय बासिन्दाको जनजीवनलाई सहज बनाउनुका साथै अन्य गतिविधिमा पनि उल्लेखनीय वृद्धि गरेको छ।

स्थानीय विष्णुमाया भुजेलले सडक निर्माणपछि वर्षौँदेखिको दुःख अन्त्य भएको बताउनुभयो। “पहिले घण्टौँ पैदल हिँड्नुपर्थ्यो। बिरामी पर्दा समयमै अस्पताल पुग्न नसक्दा ज्यानै जाने घटना हुन्थ्यो। अहिले भने सडकले हाम्रो जीवनमा धेरै सुविधा थपेको छ,” उहाँले अनुभव साझा गर्नुभयो।

यो सडकले विनयी त्रिवेणी गाउँपालिकाको वडा नं १, २, ३, ४ र ५ का बासिन्दालाई विशेष रूपमा लाभ पुर्‍याएको छ। मुख्य रूपमा वडा नं ३, ४ र ५ का स्थानीयलाई दुम्किबाससम्म पुग्न सहज भएको छ। अब सर्दी–दुम्किबास यात्रा २० मिनेटमै पूरा हुने भएको छ।

गाउँपालिका अध्यक्ष गिरीले सडक विकासलाई अन्य गतिविधिको आधार मानेर प्राथमिकताका साथ यो परियोजना सम्पन्न गरिएको बताउनुभयो। “पालिकाको महत्वपूर्ण लक्ष्य पूरा भएको छ। आगामी दिनमा सबै वडालाई राजमार्ग र पालिकासँग सुविधासम्पन्न सडकले जोड्ने योजना कार्यान्वयन गर्दैछौँ,” उहाँले जानकारी दिनुभयो।

गाउँपालिका उपाध्यक्ष भगवती वैदवारका अनुसार सडक कालोपत्रे भएपछि सर्दी क्षेत्रबाट राजमार्गसम्मको पहुँच सजिलो भएको छ। कष्टकर जीवन सामान्य बन्दै गएको उल्लेख गर्दै, उहाँले यो सडकले करिब तीन दर्जन गाउँका बासिन्दाको यात्रा सहज गर्नुका साथै कृषिउपजको बजारीकरणमा समेत सहयोग पुर्‍याएको बताउनुभयो। यस सडकले विनयी त्रिवेणी मात्र नभई पूर्वी पाल्पाका स्थानीयलाई पनि फाइदा पुर्‍याएको छ।

गण्डकी: राष्ट्रिय गौरवको आयोजना मध्यपहाडी लोकमार्गअन्तर्गत कास्कीको हरिचोक–याम्दी खण्डको स्तरोन्नतिको काम तीव्र गतिमा भइरहेको छ । हाल कालोपत्रका लागि पूर्वाधार तयारीको काम पूरा भएको छ । करिब दुई हजार दुई सय मिटर दूरीको उक्त सडक समयमा कालोपत्र नहुँदा जनगुनासो बढेको थियो ।

पर्वतस्थित लोकमार्ग आयोजना कार्यालयका इन्जिनियर किरण सुवेदीले जनगुनासो सम्बोधनका लागि स्तरोन्नतिका काम धमाधम अगाडि बढाइएको र अब कालोपत्रका लागि ‘प्लान्ट’ राख्ने काम भइरहेको बताउनुभयो । उहाँका अनुसार आगामी माघभित्र सडक कालोपत्रको काम सम्पन्न हुने गरी प्रक्रिया अगाडि बढेको छ भने नाली, पर्खाल, कल्भर्टलगायत काम करिब छन् ।

विसं २०७९ साउनमा दुई वर्षमा सक्ने गरी ठेक्का दिइएको यस खण्डमा निर्माण कम्पनीको ढिलासुस्तीका कारण काम सम्पन्न हुन सकेको थिएन । समयमा काम नभएपछि आउँदो चैतसम्मलाई म्याद थप गरिएको छ । आयोजना कार्यालयले ठेक्का तोड्ने चेतावनी दिएपछि निर्माण कम्पनीले काम तीव्रगति अगाडि बढाएका जनाइएको छ ।

यो प्रदेश राजधानी पोखरा जोड्ने मुख्य सडक हो । पर्यटकीय राजधानीसमेत रहेको पोखरा प्रवेश गर्ने मुख्य सडकमार्गमा धुलो र हिलोको समस्या हुँदा समस्या भएको भन्दै स्थानीय आक्रोसित छन् । त्यसैले छिटो सडक स्तरोन्नतिको माग गर्दै स्थानीयले पटकपटक दबाबमूलक कार्यक्रम गर्दै आएका थिए ।

इन्जिनियर सुवेदीले कालोपत्रका लागि अन्तिम तयारी भइरहेकाले अब उक्त समस्या सधैँका लागि अन्त्य हुने बताउनुभयो । पोखराको जिरो किमीदेखि हरिचोक र याम्दीदेखि फेदीसम्मको सडक तीन वर्षअघि नै कालोपत्र गरिएको थियो । पश्चिमतर्फ पर्वत, बागलुङ, म्याग्दी, मुस्ताङ, रुकुम पूर्वलगायत जिल्लाबाट लोकमार्ग हुँदै दैनिक सयौँ सवारीसाधन पोखरा आउजाउ गर्छन् ।