काठमाडौँ :नेपाल उद्योग वाणिज्य महासङ्घ र कोरिया इम्पोर्टर्स एशोसिएसन (कोइमा)बीच नेपाली उत्पादनको बजार प्रवर्द्धन र लगानी विस्तारका लागि समझदारीपत्रमा हस्ताक्षर भएको छ।
दक्षिण कोरियाको राजधानी सोलमा बिहीबार आयोजित कार्यक्रमको दौरान महासङ्घका अध्यक्ष चन्द्रप्रसाद ढकाल र कोइमाका अध्यक्ष वुवाङ्ग कुवान किमले समझदारीपत्रमा हस्ताक्षर गरे। कोइमा, दक्षिण कोरियामा औद्योगिक कच्चा पदार्थ र त्यहाँ उत्पादन नहुने सामग्री आयात गर्ने उद्देश्यले स्थापना भएको संस्था हो, जसले औद्योगिक वातावरण प्रवर्द्धन गर्दै सर्वसाधारणलाई सामग्री सहज रूपमा उपलब्ध गराउँदै आएको छ।
महासङ्घले कोइमासँगको सहकार्यले नेपाली उत्पादनलाई दक्षिण कोरियामा विस्तार गर्न मद्दत पुग्ने विश्वास लिएको छ। यसले नेपाल र कोरियाबीचको व्यापार घाटा कम गर्ने अपेक्षा गरिएको छ, जुन हाल करिब रु सात अर्ब बराबर रहेको छ।
हाल नेपालबाट फेल्ट, गलैंचा, धागो जस्ता परम्परागत सामान कोरियामा निर्यात भइरहेकामा कोइमासँगको सहकार्यले औद्योगिक कच्चा पदार्थ र अन्य सामग्रीको बजारसमेत खोज्न मद्दत पुर्याउने विश्वास महासङ्घले व्यक्त गरेको छ।
नेपाल–कोरिया दौत्य सम्बन्ध स्थापनाको ५० वर्षका अवसरमा आयोजित कार्यक्रममा महासङ्घका अध्यक्ष ढकालले नेपाल र कोरियाबीच आर्थिक सम्बन्ध थप सुदृढ गर्न विशाल सम्भावना रहेको बताए।
सोही अवसरमा सोलस्थित नेपाली दूतावासले आयोजना गरेको ‘नेपालमा व्यापार र लगानीका अवसरहरू’ विषयक कार्यक्रममा उद्योग वाणिज्य तथा आपूर्तिमन्त्री दामोदर भण्डारी प्रमुख अतिथिको रूपमा सहभागी थिए। अध्यक्ष ढकालले कार्यक्रममा नेपालका ऊर्जाशील युवा जनशक्ति, प्राकृतिक स्रोत र ठूला बजारसँगको नजिकाइ कोरियाली लगानीकर्ताहरूका लागि आकर्षक हुने बताए।
ढकालले नेपालमा लगानीमैत्री वातावरण निर्माणका लागि गरिएका सुधारबारे जानकारी गराउँदै, महासङ्घको सक्रिय संलग्नतामा हालै भएका प्रगतिहरूको चर्चा गरे। सरकारद्वारा लगानीसम्बन्धी आठ कानुन संशोधन गरिएको र द्विपक्षीय लगानी सम्झौता ढाँचा अनुमोदन गरिएको उल्लेख गर्दै, उनले विदेशी लगानी सहज बनाउन चालिएका कदमहरूबारे जानकारी दिए।
नेपालका अनुकूल आर्थिक सूचकाङ्कहरूबारे जानकारी गराउँदै ढकालले नेपालको विदेशी मुद्रा सञ्चिति १७ अर्ब डलर पुगेको र पहिलोपटक नेपालले क्रेडिट रेटिङ प्राप्त गरेको जानकारी दिए। उनले नेपालको क्रेडिट रेटिङ दक्षिण एसियामा सन्तोषजनक रहेको बताए।
कार्यक्रमको क्रममा ढकालले कोरियाली व्यवसायिक समुदायलाई नेपालमा व्यापार र लगानीका अवसरहरूको खोजी गर्न आह्वान गर्दै महासङ्घको विदेशी लगानी सहायता डेस्कमार्फत पूर्ण सहयोगको प्रतिबद्धता जनाए।
