काठमाडौं: चालु आर्थिक वर्ष २०८१/८२ को दोस्रो चौमासिकसम्म सरकारको खर्च आम्दानीभन्दा बढी भएको छ। महालेखा नियन्त्रक कार्यालयको तथ्याङ्कअनुसार गत फागुन मसान्तसम्म सरकारको कुल आम्दानी रू ७ खर्ब ३८ अर्ब ८२ करोड १३ लाख भए पनि कुल खर्च रू ८ खर्ब ३९ अर्ब ३५ करोड ६० लाख पुगेको छ। यसरी सरकारको आम्दानीभन्दा खर्च रू १ खर्ब ५३ करोड ४७ लाखले बढी भएको देखिन्छ।
यस अवधिमा सरकारको विकास खर्च अत्यन्तै न्यून देखिएको छ। फागुन मसान्तसम्म पुँजीगत खर्च वार्षिक विनियोजनको २३.३७ प्रतिशत मात्रै रहेको छ। चालु आर्थिक वर्षका लागि सरकारले पुँजीगत खर्चतर्फ रू ३ खर्ब ५२ अर्ब ३५ करोड ४० लाख बजेट विनियोजन गरेकोमा हालसम्म मात्र रू ८२ अर्ब ३३ करोड ६० लाख खर्च भएको छ।
चालु आर्थिक वर्षका लागि सरकारले रू १८ खर्ब ६० अर्ब ३० करोड ३० लाखको बजेट ल्याएको थियो। फागुन मसान्तसम्म वार्षिक विनियोजनको ४५.१२ प्रतिशत अर्थात रू ८ खर्ब ३९ अर्ब ३५ करोड ६० लाख खर्च भइसकेको छ। चालु खर्चतर्फ विनियोजित रू ११ खर्ब ४० अर्ब ६६ करोड ४५ लाखमध्ये ५१.२१ प्रतिशत अर्थात रू ५ खर्ब ८४ अर्ब १२ करोड ७८ लाख खर्च भएको छ। वित्तीय व्यवस्थापनतर्फ विनियोजित रू ३ खर्ब ६७ अर्ब २८ करोड ४५ लाखमध्ये ४७.०७ प्रतिशत अर्थात रू १ खर्ब ७२ अर्ब ८९ करोड २२ लाख खर्च भइसकेको छ।
राजस्व संकलन पनि लक्ष्यअनुसार प्रभावकारी देखिएको छैन। सरकारले चालु आर्थिक वर्षका लागि रू १४ खर्ब ७१ अर्ब ६२ करोड ९५ लाख राजस्व उठाउने लक्ष्य राखेकोमा हालसम्म ५०.२ प्रतिशत अर्थात रू ७ खर्ब ३८ अर्ब ८२ करोड १३ लाख संकलन भएको छ।
कर राजस्वतर्फ लक्ष्य रू १२ खर्ब ८४ अर्ब २० करोड ९६ लाख भए पनि हालसम्म ४९.७४ प्रतिशत अर्थात रू ६ खर्ब ३८ अर्ब ७९ करोड ९० लाख मात्र संकलन भएको छ। त्यस्तै, गैरकर राजस्वतर्फ लक्ष्य रू १ खर्ब ३५ अर्ब ९ करोड ३४ लाख भए पनि हालसम्म ६०.३६ प्रतिशत अर्थात रू ८१ अर्ब ५४ करोड ७७ लाख मात्र उठाइएको छ।
वैदेशिक अनुदान संकलन झनै कमजोर देखिएको छ। चालु आर्थिक वर्षका लागि सरकारको लक्ष्य रू ५२ अर्ब ३२ करोड ६५ लाख भए पनि हालसम्म वार्षिक लक्ष्यको १७.५१ प्रतिशत अर्थात रू ९ अर्ब १६ करोड २५ लाख मात्र प्राप्त भएको छ।
