काठमाडौं । देशभर प्रतिनिधिसभा निर्वाचनका लागि उत्साहपूर्ण रूपमा मतदान भइरहेका बेला रुपन्देही जिल्ला क्षेत्र नम्बर २ मा भने राजनीतिक तनाव बढेको छ। राष्ट्रिय स्वतन्त्र पार्टी (रास्वपा) का उम्मेदवार सुलभ खरेलसहित नेता–कार्यकर्तामाथि आक्रमण भएको भन्दै पार्टीले घोर भर्त्सना गरेको छ।
रास्वपाका अनुसार निर्वाचनको पूर्वसन्ध्यामा रुपन्देहीस्थित होटल नमोबुद्धमा निर्वाचन परिचालन समितिको बैठक चलिरहेकै बेला आक्रमण भएको हो।
रास्वपा रुपन्देही जिल्ला समितिले नेकपा (एमाले) का जिल्ला उप–सचिव बाबुराम पन्थी र युवा संघका अध्यक्ष कृष्ण कुमालसहितको टोलीले उम्मेदवार खरेल, पूर्व मेयर चित्रबहादुर कार्की र सचिव बाबुराम अर्याललगायतमाथि हातपात गरेको आरोप लगाएको छ।
रास्वपा जिल्ला सभापति डा. बुद्धिप्रसाद शर्मा र सचिव विष्णु प्रसाद पौडेलले संयुक्त विज्ञप्ति जारी गर्दै हारको मानसिकताले आक्रमण गरिएको दाबी गरेका छन्। साथै दोषीमाथि तत्काल कानुनी कारबाही गर्न र मतदानको दिन पूर्ण सुरक्षा व्यवस्था मिलाउन प्रशासनसँग माग गरेका छन्।
