एजेन्सी, बेइजिङ- चीनले फरक क्षमता भएका स्मार्ट रोबोटहरूको विकासमा तीव्र प्रगति गरिरहेको छ। विशेष गरी घाँस काट्ने (लन मुविङ) स्मार्ट रोबोटहरू विश्व बजारमा उल्लेखनीय सफलता हासिल गर्दै छन्।
चिनियाँ निर्माण कम्पनीहरूका अनुसार यस्ता स्मार्ट रोबोटहरूले अन्तर्राष्ट्रिय प्रतिस्पर्धामा अग्रस्थान बनाउँदै लिएका छन्। चीनमै निर्मित यस्ता रोबोटिक लन मुवरहरू विश्वव्यापी बजारमा लोकप्रिय हुँदै गएका छन्।
बेइजिङस्थित एक प्रमुख निर्माता कम्पनीले हालै प्रदर्शन गरेको घाँस काट्ने यन्त्र स्मार्टफोन वा रिमोट कन्ट्रोल मार्फत सजिलै सञ्चालन गर्न सकिन्छ। यी यन्त्रहरूमा कृत्रिम बुद्धिमत्ता (AI) आधारित असिस्ट म्यापिङ प्रणाली जडान गरिएको छ, जसले घाँस काट्ने क्रममा ल्यानको किनारा छुट्याएर सटीक रूपरेखा तयार गर्न सक्छ।
प्रयोगकर्ताहरूले मोबाइल एपमार्फत टेक्स्ट टाइप गरेर वा डिजाइन चयन गरेर यन्त्रलाई निर्देशन दिन सक्छन्, र त्यसअनुसार घाँसको आकार बनाएर काट्न सकिन्छ।
चीनको भन्सार तथ्याङ्कअनुसार, सन् २०२५ को पहिलो त्रैमासिकमा मात्रै यस्ता स्मार्ट घाँस काट्ने रोबोटहरूको निर्यात मूल्य १ अर्ब अमेरिकी डलर नाघेको छ, जुन अघिल्लो वर्षको तुलनामा लगभग ६० प्रतिशतको वृद्धि हो।
(स्रोत: सीसीटीभीप्लस)
