काठमाडौँ । पछिल्लो एक महिनामा खाना पकाउने तेलको मूल्य अस्वाभाविक रूपमा बढेको छ। पश्चिम एसियामा जारी द्वन्द्वका कारण अन्तर्राष्ट्रिय बजारमा कच्चा पदार्थको मूल्य बढेको भन्दै व्यापारीहरूले प्रतिलिटर २० देखि ५० रुपैयाँसम्म मूल्य वृद्धि गरेका हुन्।

माघ अन्तिम सातातिर प्रतिलिटर २५० देखि २७५ रुपैयाँमा पाइने सनफ्लावर तेल फागुन मध्यसम्म आइपुग्दा प्रतिलिटर २९० रुपैयाँभन्दा माथि पुगेको छ।

सरकारी स्वामित्वको खाद्य व्यवस्था तथा व्यापार कम्पनी लिमिटेडले भने बजारभन्दा केही सस्तोमा तेल बिक्री गरिरहेको जनाएको छ। कम्पनीको वेबसाइटअनुसार भटमासको तेल प्रतिलिटर २४० रुपैयाँ, सनफ्लावर तेल २७५ रुपैयाँ र विभिन्न ब्रान्डका तोरीका तेल २५५ देखि ३६० रुपैयाँसम्ममा उपलब्ध छन्। तर निजी क्षेत्रका खुद्रा पसलहरूमा भने मूल्य वृद्धि निकै उच्च देखिएको छ।

नेपाल चामल, तेल, दाल उद्योग संघका कार्यसमिति सदस्य विभोर अग्रवालका अनुसार अन्तर्राष्ट्रिय बजारमा डलरको मूल्य वृद्धि र ढुवानी मार्गमा देखिएको अवरोधले तेलको मूल्य बढेको हो। उनका अनुसार अर्जेन्टिना र इन्डोनेसियाबाट कच्चा तेल बोकेर आउने ठूला जहाजहरू ढुवानी मार्गमा अवरोधका कारण बाटोमै रोकिएका छन्। यसले आपूर्ति घटाउँदा ढुवानी खर्चसमेत बढेको उनले बताए।

अग्रवालका अनुसार धान र चामल भारतबाट सहजै आयात हुने भए पनि खाने तेलका लागि नेपालले तेस्रो मुलुकमा निर्भर रहनुपर्ने बाध्यता छ। अन्तर्राष्ट्रिय स्तरमा भइरहेका युद्धका कारण ढुवानी सेवा प्रभावित हुँदा कच्चा पदार्थको मूल्य बढेको र त्यसको असर नेपाली बजारमा परेको उनले बताए।

हाल अन्तर्राष्ट्रिय बजारमा कच्चा पाम तेल प्रतिटन ९५० देखि १ हजार डलरसम्म कारोबार भइरहेको छ। सोयाबिन तेल प्रतिटन ९८० देखि १ हजार ५० डलर र सूर्यमुखी तेल प्रतिटन ९०० देखि ९५० डलरको हाराहारीमा पुगेको छ। नेपाल राष्ट्र बैंकले सार्वजनिक गरेको माघ महिनाको तथ्याङ्कअनुसार घ्यू तथा तेलको मूल्यमा ७.६१ प्रतिशत वृद्धि भएको छ, फागुनमा यो वृद्धि दर अझै बढ्ने अनुमान गरिएको छ।

यसैबीच, बजारमा खाने तेलको अनियन्त्रित मूल्यवृद्धि र कालोबजारीको गुनासो बढेपछि वाणिज्य, आपूर्ति तथा उपभोक्ता संरक्षण विभागले अनुगमनलाई तीव्र बनाएको छ। विभागका निर्देशक नरहरि तिवारीले मूल्यवृद्धिको वास्तविक कारण बुझ्न सूक्ष्म अध्ययन र सत्यापन भइरहेको जानकारी दिए।

उनका अनुसार बजारमा खाने तेलको मौज्दात पर्याप्त भए पनि कृत्रिम अभाव सिर्जना गर्ने वा मिलेमतोमा मूल्य बढाउनेहरूलाई कारबाही गरिने चेतावनी दिइएको छ। विभागले विशेषगरी तेलको मूल्य र मौज्दातलाई केन्द्रित गरेर बजार निरीक्षण गरिरहेको जनाएको छ।

उपभोक्ता अधिकारकर्मीहरूले भने अन्तर्राष्ट्रिय बजारमा मूल्य बढ्नुभन्दा पहिल्यै मौज्दात रहेको तेललाई पनि नयाँ मूल्य तोकेर बेच्ने प्रवृत्ति बढेको भन्दै सरकारले कडा कदम चाल्नुपर्ने माग गरेका छन्।

भन्सार विभागका अनुसार चालु आर्थिक वर्षको सात महिनामा (माघ मसान्तसम्म) नेपालले ९३ अर्ब ७५ करोड ४६ लाख रुपैयाँ बराबरको खाने तेल आयात गरेको छ। यसमध्ये ७८ अर्ब १९ करोड ६२ लाख रुपैयाँ बराबरको निर्यात भएको उल्लेख छ।

नेपालमा भटमास, सूर्यमुखी, पाम, जैतुन र तोरीलगायत विभिन्न प्रकारका तेल अर्जेन्टिना, इन्डोनेसिया, युक्रेन, चीन, ब्राजिल, थाइल्याण्ड, भारत, कुवेत र ओमानलगायत मुलुकबाट आयात हुँदै आएको छ।

काठमाडौं । म्याग्दी क्षेत्र नम्बर १ बाट प्रतिनिधिसभा सदस्यमा निर्वाचित महावीर पुनले निर्वाचन आयोगमा आफ्नो निर्वाचन खर्चको विवरण पेस गरेका छन्।

पुनले निर्वाचन अवधिभरि कुल २८ लाख ६८ हजार ८६८ रुपैयाँ खर्च भएको विवरण आयोगमा बुझाएका हुन्।

पेस गरिएको विवरणअनुसार होटलमा खाना र बसाइका लागि सबैभन्दा धेरै १३ लाख ७ हजार ६१९ रुपैयाँ खर्च भएको उल्लेख छ।

त्यस्तै चालक ज्यालामा करिब १ लाख ४० हजार रुपैयाँ, यातायात खर्चमा ६ लाख ६० हजार ९९८ रुपैयाँ र डिजेलमा ३ लाख ६० हजार ४९९ रुपैयाँ खर्च भएको विवरणमा जनाइएको छ।

काठमाडौं । नेकपा एमालेका अध्यक्ष केपी शर्मा ओलीका पिता मोहनप्रसाद ओलीको निधन भएको छ।

९७ वर्षको उमेरमा आज बिहान गठ्ठाघरस्थित अस्पतालमा उनको निधन भएको पारिवारिक स्रोतले जनाएको छ।

उनको पार्थिव शरीरलाई भक्तपुरको गुण्डुस्थित ओली निवासमा लैजाने तयारी गरिएको छ। त्यहाँ श्रद्धाञ्जलीपछि आजै काठमाडौंको पशुपति आर्यघाटमा दाहसंस्कार गरिने बताइएको छ।

काठमाडौं । नेपाल वायुसेवा निगमले चट्याङ लागेर न्यारोबडी जहाजको शार्कलेटमा क्षति पुगेको घटनाबारे छानबिन गर्न आन्तरिक समिति गठन गरेको छ।

निगमका नायब प्रबन्ध निर्देशक डोलेश्वर कोइरालाको अध्यक्षतामा गठन गरिएको समितिले घटनाको क्रम, जहाजको प्राविधिक अवस्था तथा उडान सुरक्षासम्बन्धी पक्षबारे विस्तृत अध्ययन गरी प्रतिवेदन बुझाउने बताइएको छ।

स्रोतका अनुसार हङकङमै ग्राउन्डेड गर्नुपर्ने जहाज यात्रुसहित काठमाडौं फर्काइएको विषयलाई सुरक्षाका दृष्टिले गम्भीर रूपमा हेरिएको छ। यस घटनापछि फागुन २६ गते हङकङ उडानमा संलग्न ककपिट क्रुलाई तत्कालका लागि उडानबाट रोक लगाइएको छ। साथै उनीहरूलाई घटनाबारे विस्तृत लिखित प्रतिवेदन पेश गर्न निर्देशन दिइएको छ।

चट्याङ लागेर नेपाल एयरलाइन्सको न्यारोबडी जहाज नाइन–एन–एकेएक्स को एउटा शार्कलेटमा क्षति पुगेको थियो। फागुन १२ गते काठमाडौंबाट हङकङ उडेको जहाज उडान भरेको केही समयपछि बनेपामाथि आकाशमा पुगेका बेला चट्याङ परेको थियो। त्यसपछि जहाजले करिब चार घण्टाको उडान पूरा गर्दै हङकङमा सुरक्षित अवतरण गरेको थियो।

जहाज मर्मतका लागि मलेसिया पठाउने तयारी गरिए पनि आवश्यक स्वीकृति नआएकाले हाललाई उडान स्थगित गरिएको निगम स्रोतले जनाएको छ। एयरबसबाट औपचारिक निर्देशन आएपछि यात्रु नबोकी विशेष उडानमार्फत जहाज मलेसिया पठाइने तयारी गरिएको छ।

काठमाडौं । निर्वाचन आयोगले प्रतिनिधि सभाको समानुपातिकतर्फ राजनीतिक दलहरूले पाउने सिट संख्या टुंगो लगाएको छ।

प्रतिनिधि सभामा समानुपातिक प्रणालीतर्फ कुल ११० सिट रहने व्यवस्था छ। सोही अनुसार दलहरूले प्राप्त गरेको मतका आधारमा आयोगले सिट बाँडफाँटको अन्तिम टुंगो लगाएको हो।

आयोगका अनुसार समानुपातिकतर्फ सिट पाउने दलहरूले अब तोकिएको समयसीमाभित्र आफ्नो बन्दसूचीबाट प्रतिनिधि सभाका सदस्यहरूको नाम सिफारिस गर्नुपर्नेछ।

सिफारिस गरिएका नामहरू समावेशी सिद्धान्त र कानुनी प्रावधानअनुसार भए–नभएको आयोगले परीक्षण गर्नेछ। त्यसपछि आयोगले प्रतिनिधि सभा सदस्यको अन्तिम नामावली सार्वजनिक गर्ने प्रक्रिया अघि बढाउनेछ।

प्रतिनिधि सभाको प्रत्यक्षतर्फको मतगणना लगभग टुंगिएसँगै अब समानुपातिकतर्फको सिट बाँडफाँटले संसद्को अन्तिम स्वरूप स्पष्ट हुने भएको छ।

काठमाडौं । अमेरिकी सरकारको एक गोप्य प्रतिवेदनले इरानको वर्तमान शासन चाँडै पतन हुने सम्भावना कम रहेको निष्कर्ष निकालेको छ।

अन्तर्राष्ट्रिय समाचार संस्था रोयटर्सका अनुसार अमेरिकी गुप्तचर एजेन्सीहरूले तयार पारेका विभिन्न प्रतिवेदनहरूमा इरानी सरकार अझै पनि सशक्त अवस्थामा रहेको र देशमाथि आफ्नो नियन्त्रण कायम राखेको उल्लेख गरिएको छ।

प्रतिवेदनमा फेब्रुअरी २८ मा अमेरिका र इजरायलको आक्रमणमा इरानका सर्वोच्च नेता अली खामेनीको मृत्यु भएको दाबी गरिए पनि त्यसपछि पनि सरकार सत्तामा कायम रहेको जनाइएको छ।

यसैबीच एक इजरायली अधिकारीले पनि वर्तमान युद्धले इरानी शासनको पतन गराउने कुनै निश्चित ग्यारेन्टी नभएको स्वीकार गरेका छन्।

काठमाडौं । अमेरिका, इजरायल र इरानबीच १३ दिनसम्म चलेको तनावपूर्ण युद्धबीच पनि इरानले भारतीय जहाजहरूलाई हर्मुजको जलडमरूमार्ग हुँदै आवतजावत गर्न अनुमति दिएको बताइएको छ।

समाचार एजेन्सी एएनआईले स्रोतलाई उद्धृत गर्दै इरानी सरकारले भारतीय जहाजहरूको आवतजावतमा अवरोध नगर्ने संकेत दिएको जनाएको छ। भारतीय आपूर्ति श्रृंखला निरन्तर राख्ने उद्देश्यले दिइएको यो अनुमतिले नेपाललाई पनि अप्रत्यक्ष रूपमा फाइदा पुग्ने देखिएको छ, किनकि नेपालले ग्यास र पेट्रोलियम पदार्थ मुख्यतः भारतबाटै आयात गर्छ।

यद्यपि अन्तर्राष्ट्रिय समाचार एजेन्सी रोयटर्सले इरानी स्रोतलाई उद्धृत गर्दै भारतीय जहाजलाई विशेष छुट दिएको भन्ने दाबी पुष्टि नभएको जनाएको छ।

प्रतिवेदनहरूका अनुसार अमेरिका र इजरायलसँग प्रत्यक्ष सम्बन्ध नरहेका जहाजहरूलाई हर्मुज जलडमरूमार्ग प्रयोग गर्न अनुमति दिइने सम्भावना रहेको बताइएको छ। यसअघि इरानले उक्त मार्ग हुँदै आवतजावत गर्ने जहाजहरूमा आक्रमण गर्न सक्ने चेतावनी दिएको थियो।

यसैबीच इरानले बुधबार राति फारसी खाडी क्षेत्रमा “सेफासी विष्णु” नामक अमेरिकी तेल ट्याङ्करमा आक्रमण गरेको बताइएको छ। उक्त आक्रमणमा एक भारतीय नागरिकको मृत्यु भएको खबर छ, तर मृतकको पहिचान सार्वजनिक गरिएको छैन।

समाचार एजेन्सी पीटीआईका अनुसार आक्रमणमा आत्मघाती डुङ्गा प्रयोग गरिएको थियो। मार्शल टापुको झण्डामुनि सञ्चालन भइरहेको जहाजमा सवार बाँकी २७ जनालाई भने सकुशल उद्धार गरिएको बताइएको छ।

काठमाडौं । भारतको राजस्थान राज्यको ग्रामीण जयपुर क्षेत्रमा एक हृदयविदारक घटनाले स्थानीयवासी स्तब्ध बनेका छन्। एक पुरुषले आफ्नी श्रीमती र ८ वर्षीया छोरीलाई तरवार प्रहार गरी हत्या गरेका छन्।

भारतीय सञ्चारमाध्यमका अनुसार मोखमपुरा प्रहरी चौकी अन्तर्गत पर्ने बिचुन गाउँमा बिहीबार बिहान करिब ६ बजे सुरजित नामका व्यक्तिले आफ्नी श्रीमती सरोज देवी र छोरी वंशिकामाथि तरवारले आक्रमण गरेका थिए। आक्रमण अत्यन्त घातक भएकाले दुवैको घटनास्थलमै मृत्यु भएको प्रहरीले जनाएको छ।

घटनाका बेला श्रीमती भर्खरै ब्यूँझिएकी थिइन् भने छोरी सुतिरहेको अवस्थामा थिइन्। अचानक भएको यो घटनाले गाउँमा त्रास र शोकको वातावरण सिर्जना गरेको छ।

घटनापछि आरोपी भाग्नुको सट्टा घरबाट निस्केर सिधै मोखमपुरा प्रहरी चौकी पुगेका थिए। उनले आफूले श्रीमती र छोरीको हत्या गरेको भन्दै प्रहरीसमक्ष आत्मसमर्पण गरेका थिए। आरोपीको बयान सुनेपछि प्रहरी पनि स्तब्ध भएको बताइएको छ।

सूचना पाएपछि प्रहरी टोली तुरुन्तै घटनास्थलमा पुगेको थियो। प्रहरीले दुवै शवलाई नियन्त्रणमा लिएर पोस्टमार्टमका लागि डुडु उप–जिल्ला अस्पतालको शवगृहमा राखेको छ। साथै घटनास्थलमा पुगेको फरेन्सिक टोलीले अनुसन्धानका लागि महत्वपूर्ण प्रमाणहरू संकलन गरेको छ।

मोखमपुरा प्रहरी चौकीका अधिकारी सुरेश गुर्जरका अनुसार प्रारम्भिक अनुसन्धानमा पति–पत्नीबीच लामो समयदेखि घरेलु विवाद र आर्थिक समस्याका कारण तनाव रहेको देखिएको छ। बिहीबार बिहान उक्त विवाद झन् बढेपछि घटना भएको अनुमान गरिएको छ।

यद्यपि घटनाको वास्तविक कारण पत्ता लगाउन प्रहरीले विस्तृत अनुसन्धान अघि बढाएको जनाएको छ।

काठमाडौं । प्रतिनिधि सभाको निर्वाचनको अन्तिम मतपरिणाम आउने क्रममा सर्वोच्च अदालतमा पनि नेतृत्व परिवर्तनको अवस्था बनेको छ। प्रधानन्यायाधीश प्रकाशमानसिंह राउतले इजलासमा बस्न छाडेका छन् भने उनको अवकाश चैत १८ गते हुने तय भएको छ।

न्यायाधीशहरूले अवकाश लिनु अघि आफूले हेरेका मुद्दाहरू अधुरो नरहून् भन्ने उद्देश्यले अवकाशभन्दा करिब एक महिना अगावै इजलास बस्न छाड्ने अभ्यासअनुसार राउतले पनि इजलास बस्न छोडेका हुन्।

प्रधानन्यायाधीश पद रिक्त हुन अझै करिब तीन साता बाँकी रहे पनि अहिले नै नयाँ प्रधानन्यायाधीश नियुक्त हुने सम्भावना कम देखिएको छ। प्रधानन्यायाधीशको नियुक्ति संवैधानिक परिषद्ले गर्ने व्यवस्था छ।

तर हाल संवैधानिक परिषद्को बैठक बस्ने अवस्था छैन। परिषद्को बैठक बस्न अध्यक्षसहित कम्तीमा चार सदस्य उपस्थित हुनुपर्ने कानुनी व्यवस्था भए पनि अहिले परिषद्मा तीन जना मात्र सदस्य छन्।

संवैधानिक परिषद्मा प्रधानमन्त्री अध्यक्ष हुन्छन् भने प्रधानन्यायाधीश, सभामुख, राष्ट्रिय सभाका अध्यक्ष, उपसभामुख र प्रतिनिधि सभामा प्रमुख प्रतिपक्षी दलका नेता सदस्य रहने व्यवस्था छ। अहिले सभामुख, उपसभामुख र प्रमुख प्रतिपक्षी दलका नेता नहुँदा परिषद्मा तीन स्थान रिक्त छन्। साथै प्रधानन्यायाधीश नियुक्ति गर्ने बैठकमा प्रधानन्यायाधीश स्वयं सहभागी हुन नपाउने भएकाले उनको स्थानमा कानुनमन्त्री सदस्यका रूपमा बस्ने व्यवस्था छ।

अब प्रतिनिधि सभाको बैठक बसेर सभामुख र उपसभामुख निर्वाचित भएपछि मात्र परिषद्को बैठक बस्न सक्ने अवस्था बन्नेछ। प्रमुख प्रतिपक्षी दलको नेता पनि प्रतिनिधि सभा गठन भएपछि मात्र निर्धारण हुने भएकाले हाल परिषद्को बैठक बस्ने सम्भावना छैन।

यस कारण अहिलेको कामचलाउ सरकारले पनि प्रधानन्यायाधीश नियुक्ति जस्तो संवेदनशील विषयमा पहल गर्ने सम्भावना न्यून मानिएको छ। त्यसैले नयाँ सरकार गठन भएपछि मात्र नयाँ प्रधानन्यायाधीश नियुक्त हुने अपेक्षा गरिएको छ।

यसैबीच प्रतिनिधि सभाको निर्वाचनमा बहुमत पाएको राष्ट्रिय स्वतन्त्र पार्टी सरकार गठनको तयारीमा रहेको छ। संविधानको धारा ७६ (१) अनुसार बहुमत प्राप्त दलको संसदीय दलको नेता प्रधानमन्त्री बन्ने व्यवस्था छ।

राष्ट्रिय स्वतन्त्र पार्टीले चुनावी अभियानका क्रममा वरिष्ठ नेता बालेन्द्र (बालेन) शाहलाई भावी प्रधानमन्त्रीका रूपमा अघि सारेकाले उनी नै संसदीय दलको नेता र प्रधानमन्त्री बन्ने सम्भावना बलियो देखिएको छ।

प्रधानमन्त्री बनेपछि संवैधानिक परिषद्को अध्यक्षको हैसियतमा नयाँ प्रधानन्यायाधीश नियुक्त गर्ने जिम्मेवारी बालेन शाहकै काँधमा आउनेछ। तर दलीय भागबण्डाको विरोध गर्दै आएका बालेनका लागि प्रधानन्यायाधीश नियुक्ति चुनौतीपूर्ण विषय बन्न सक्ने देखिन्छ।

न्यायपरिषद्ले प्रधानन्यायाधीश बन्न योग्यता पुगेका ६ जना सर्वोच्च अदालतका न्यायाधीशहरूको नाम संवैधानिक परिषद्मा सिफारिस गरिसकेको छ। नेपालको संविधानको धारा १२९ (३) अनुसार सर्वोच्च अदालतको न्यायाधीश पदमा कम्तीमा तीन वर्ष काम गरेको व्यक्ति प्रधानन्यायाधीश बन्न योग्य हुन्छ।

हाल सो योग्यता पुगेका न्यायाधीश संख्या सीमित भएकाले सिफारिस भएका ती ६ जनामध्येबाटै नयाँ प्रधानन्यायाधीश नियुक्त गर्नुपर्ने बाध्यकारी अवस्था रहेको छ।

सुर्खेत। बलात्कारपछि हत्या गरिएकी १६ वर्षीया इनिशा विकको शव आफन्तले नबुझ्दा ६ दिनदेखि कर्णाली प्रादेशिक अस्पतालको शवगृहमा राखिएको छ।

सुर्खेतको उषा बालवाटिका विद्यालयमा कक्षा ११ मा अध्ययनरत इनिशाको हत्या प्रकरणमा दोषीलाई कारबाही हुने सुनिश्चित वातावरण नबनेसम्म शव नबुझ्ने अडान आफन्तले लिएका छन्। आफन्तले सामूहिक बलात्कारपछि हत्या गरिएको दाबी गर्दै दोषीलाई हदैसम्मको कारबाही गर्नुपर्ने माग गरेका छन्।

जिल्ला प्रहरी कार्यालय सुर्खेतले प्रारम्भिक अनुसन्धान पूरा गरेपछि थप अनुसन्धानका लागि केन्द्रीय अनुसन्धान ब्युरो (सीआईबी) को टोली वीरेन्द्रनगर पुगेको छ। टोलीले थप प्रमाण संकलन गर्दै अनुसन्धान अघि बढाउने तयारी गरेको प्रहरीले जनाएको छ।

पोस्टमार्टम रिपोर्टअनुसार बलात्कारपछि अत्यधिक रक्तस्रावका कारण इनिशाको मृत्यु भएको पुष्टि भएको छ। जबरजस्ती करणीका क्रममा संवेदनशील अंग च्यातिँदा अत्यधिक रक्तस्राव भई मृत्यु भएको पोस्टमार्टम रिपोर्टमा उल्लेख रहेको भेरी अस्पताल नेपालगन्जका वरिष्ठ फरेन्सिक विभाग अधिकृत डा. अर्विन शाक्यले जानकारी दिएका छन्।

प्रहरी नियन्त्रणमा रहेका इनिशाका प्रेमी भनिएका युवकले भने सहमतिमै यौन सम्पर्क भएको र त्यसपछि अचानक इनिशा बेहोस भएको बयान दिएका छन्। उनले विगत दुई वर्षदेखि प्रेम सम्बन्धमा रहेको र घटनाको दिन पनि दुवैको सहमतिमा शारीरिक सम्पर्क भएको बताएका छन्। सम्पर्कपछि यौनाङ्गबाट रगत आएपछि इनिशा बेहोस भएर ढलेको उनको दाबी रहेको अनुसन्धानमा संलग्न प्रहरी अधिकारीले बताएका छन्।

घटनापछि सहयोगका लागि साथीहरूलाई बोलाएको र तीन जनासँग सहयोग मागेको पनि उनले बयान दिएका छन्।

जिल्ला प्रहरी कार्यालय सुर्खेतका प्रवक्ता डीएसपी मोहनजंग बुढथापाका अनुसार घटनामा संलग्न रहेको आरोपमा १६ वर्षीय एक किशोरसहित चार जनालाई पक्राउ गरी जबरजस्ती करणी र कर्तव्य ज्यानसम्बन्धी मुद्दा दर्ता गरेर थप अनुसन्धान भइरहेको छ।

फागुन २३ गते इनिशा सामुदायिक वन क्षेत्रमा मृत अवस्थामा फेला परेकी थिइन्। सुर्खेतको गुर्भाकोट–बडाखाली घर भएकी इनिशा अध्ययनका लागि वीरेन्द्रनगरमा बस्दै आएकी थिइन्।

घटनाको दिन शनिबार बिहान ‘प्रयोगात्मक कक्षा’ छ भन्दै घरबाट निस्किएकी उनी बिहान ८ बजेसम्म फर्किने बताएकी थिइन्। तर ९ बजेसम्म पनि घर नफर्किएपछि परिवारले खोजी सुरु गरेको थियो।