रौतहट । प्रहरीले नक्कली सुनलाई सक्कली भन्दै ठगी गर्ने गिरोहका चार सदस्यलाई पक्राउ गरेको छ। विशेष सूचनाको आधारमा इलाका प्रहरी कार्यालय चन्द्रनिगाहपुरबाट खटिएको टोलीले चन्द्रपुर नगरपालिका–५ स्थित एक होटलबाट उनीहरूलाई नियन्त्रणमा लिएको हो।
प्रहरी नायब उपरीक्षक रूपा लाबुङ्गको नेतृत्वमा मंगलबार दिउँसो होटलको कोठा नम्बर १०२ मा छापा मारिएको थियो। अवैध सुन किनबेच भइरहेको सूचनापछि पुगेको प्रहरी टोलीले खानतलासी गर्दा नक्कली सुनका टुक्रा र सम्बन्धित उपकरण बरामद गरेको जनाएको छ।
प्रहरीका अनुसार पक्राउ पर्नेहरूमा नुवाकोट तारकेश्वर गाउँपालिका–३ का ३७ वर्षीय अशोक तामाङ, चन्द्रपुर नगरपालिका–१० का ३० वर्षीय अरविन्द चौधरी, रौतहट बौधीमाई नगरपालिका–६ का ३८ वर्षीय रुपकेश राय यादव र भारत पश्चिम बङ्गाल (मिलिगुडी) का ३० वर्षीय संजोक बस्नेत रहेका छन्।
जिल्ला प्रहरी कार्यालय रौतहटका प्रवक्ता डीएसपी विष्णु प्रदीप बस्यालका अनुसार उनीहरूको साथबाट सुनजस्तो देखिने पहेँलो धातुका चार टुक्रा, पोलेर कालो बनाइएको धातु एक थान, पोलेर टुक्रा पारिएको धातु दुई थान, एक थान दूरबिन र छ वटा मोबाइल बरामद गरिएको छ।
प्रारम्भिक अनुसन्धानमा उनीहरूले नक्कली सुनलाई सक्कली भन्दै सर्वसाधारणलाई झुक्याएर बिक्री गर्ने योजना बनाएको खुलेको प्रहरीले जनाएको छ।
पक्राउ परेकामाथि ठगी सम्बन्धी कसुरमा मुद्दा दर्ता गरी थप अनुसन्धान अघि बढाइएको छ। घटनामा संलग्न हुन सक्ने अन्य व्यक्तिहरूको खोजी कार्य समेत जारी रहेको प्रहरीले जनाएको छ।
