काठमाडौं : लेखक मौनता श्रेष्ठले निर्माण गर्न लागेको फिल्म ‘आँधी तुफान–२’ मा नेपाली फिल्म उद्योगमा अग्ला नायकको परिचय बनाएका सञ्जय खतिवडा केन्द्रीय भूमिकामा प्रस्तुत हुने भएका छन्। दक्षिण भारतीय फिल्म उद्योगका सुपरस्टार नायक प्रभासको चर्चित फिल्म ‘साहो’मा खलनायकको भूमिका निर्वाह गरेर चर्चा कमाएका नेपाली अभिनेता कनिज कोइरालालगायतका खलपात्रका बीचमा सञ्जयले एकल नायकको भूमिका निर्वाह गर्न लागेका हुन्।
एक्सन रिभेन्ज स्टोरीमा बन्ने फिल्ममा तीन नायिका र तीन खलनायक रहनेछन् भने सञ्जयले तीनै नायिकालाई कार्डको रूपमा प्रयोग गरेर बदलाको कथालाई उत्कर्षमा पुर्याउनेछन्। प्रहरी सेवामा रहेर काम गर्दा पाएको धोकाको बदला लिन एक्सन प्रधान भूमिकामा देखिएका नायिकालाई उनले प्रयोग गर्नेछन्।
लायन्स क्लबअफ काठमाडौंका अध्यक्षसमेत रहेका सञ्जयले थोरै फिल्म खेलेर नै आफ्ना विभिन्न सामाजिक क्रियाकलापमार्फत चर्चा बटुल्न सफल भएका हुन्। कोरोना महामारीपछि मौनताले निर्माण गर्न लागेको यो फिल्मका कारण उद्योगमा केही चहलपहल सुरु भएको छ। फिल्मका कलाकारका साथै यसका तीन नायिकाले गर्ने एक्सनका कारण पनि यो फिल्मप्रति चासो बढाएको छ।
फिल्म छायांकनमा जाने तयारीमा रहेको छ। एक दशकअगाडि निर्माण भएको फिल्म ‘आँधी तुफान’को सिक्वेलका रूपमा फिल्म निर्माण हुन लागेको हो। फिल्ममा आरती आचार्य, याङ्सु श्रेष्ठ, मुकुन्द थापा, ध्रुव कोइराला, पुष्कर राउत, सिवन लामा, राजाराम गौतम, गोकुल सुवेदी, पुनम गौतम, सान अधिकारी, सोनी बीसी, जोया बुढाथोकी, रूपा केसी, सरोज दाहाल, बिन्दिया ठकुरी, रमेश तामाङ, बालकलाकार अरुण कालीराजलगायतको अभिनय रहनेछ।
फिल्ममा रामशरण उप्रेतीको छायांकन, प्रेम चुल्ठेको एक्सन, सुरेश अधिकारीको संगीत, हरि उप्रेती र दिनेश सुवेदीको गीत, रानी शाक्यको स्वर, कमल राईको नृत्य रहनेछ।
अन्नपूर्णबाट साभार
