थप दुई वर्षका लागि सम्झैता नविकरण गरेको नेपाली फुटबलका मुख्य प्रशिक्षक अब्दुल्लाह अल्मुताइरीले आफ्नो अबको लक्ष्य अर्को आगामी साफ च्याम्पियनसिपको उपाधि जित्नु भएको बताएका छन् ।
शनिबार राति नेपाल फर्किएका अल्मुताइरीले त्रिभुवन विमानस्थलमा सञ्चारकर्मीसँग कुरा गर्दै अबको लक्ष्य अर्को साफ च्याम्पियनसिपको उपाधि जित्नु रहेको बताएका हुन् ।
‘‘पछिल्लो तीन महिना धेरै उतार चढाव भए । हामीले अब त्यसलाई विर्सिनुपर्छ,’’ अल्मुताइरीले भने, ‘‘हाम्रो लक्ष्य अब आउने साफ च्याम्पियनसिपको उपाधि जित्नु हो । एसियन कप २०२३ को छनोट पनि खेल्दैछौं । तर त्यसमा छनोट हुन्छौं भनेर म अहिल्यौं भन्न सक्दिनँ । तर हामी राम्रो प्रदर्शन गर्छौं । २०२७ मा नेपाल छनोट हुनसक्छ होला, तर मेरो सम्झैता अबको तीन वर्षका लागि मात्र छ ।’’
अल्मुताइरीले नेपालसँग सेप्टेम्बर २०२२ सम्मका लागि सम्झैता गरेका थिए । तर माल्दिभ्समा सम्पन्न साफ च्याम्पियनसिपको फाइनलमा स्थान बनाएपछि प्रशिक्षक अल्मुताइरीले अप्रत्यासित रुपमा पद छाड्ने घोषणा गरेका थिए ।
उनले साफ च्याम्पियनसिपको फाइनल खेल आफ्नो नेपालका प्रशिक्षकका रुपमा अन्तिम भएको र कहिल्यै नेपाल नफर्किने घोषणा गरेका थिए ।
