काठमाडौं: असार ३१ गते नियुक्त भएका प्रधानमन्त्री केपी शर्मा ओलीले आगामी डिसेम्बर महिनामा छिमेकी राष्ट्र चीनको राजकीय भ्रमण गर्ने तय भएको छ।

सामान्यतः नेपालका प्रधानमन्त्रीले पहिलो विदेश भ्रमण भारतबाट गर्ने परम्परा भए पनि यसपटक प्रधानमन्त्री ओलीको पहिलो विदेश भ्रमण चीनबाटै हुने पक्का भएको छ। यो निर्णयसँगै प्रधानमन्त्री ओलीको चीन भ्रमणप्रति चासो र चर्चा बढेको छ।

प्रधानमन्त्री ओलीले आफ्नो पहिलो विदेश भ्रमण भारतबाट नै होस् भन्ने चाहना राखेका थिए र त्यसका लागि विभिन्न माध्यमबाट प्रयाससमेत गरेका थिए। तर, त्यो सफल नभएपछि ओलीले चीन भ्रमणको तयारी सुरु गरेका हुन्।

ओलीको चीन भ्रमण पक्का भएपछि, भ्रमणका दौरान कुनै ठूला सम्झौता नगर्नका लागि सरकारले अप्रत्यक्ष दबाव महसुस गरेको देखिन्छ।

उच्च स्रोतका अनुसार, प्रधानमन्त्रीको भ्रमणका क्रममा बिआरआई सम्बन्धि पाँच विषयमा सम्झौता गर्ने तयारी छ। यी परियोजनाका लागि अर्थ मन्त्रालयले चीनसँग सम्झौताको खाका तयार पारेको भए पनि विस्तृत जानकारी खुलाइएको छैन। यी सबै परियोजनाहरू चीनको अनुदानमा निर्माण हुने गरी तयारी गरिएको बताइएको छ।

नेपाल सरकारले चीनसँग पाँच परियोजनामा सम्झौता गर्ने तयारी गरेपछि त्यसलाई रोक्न सरकारले अप्रत्यक्ष दबावको सामना गरिरहेको स्रोतले जनाएको छ। यसमा भारतले चीनसँग कुनै सम्झौता नगर्न दबाव दिएको अनुमान गरिएको छ।

सूत्रका अनुसार केही दिनअघि भारतीय प्रधानमन्त्री नरेन्द्र मोदीको कार्यालयका सुरक्षा अधिकारीहरूको टोली नेपाल आएको थियो। यस टोलीले नेपालका उच्च सुरक्षा अधिकारीहरू र अन्य प्रमुख व्यक्तिहरूसँग भेटघाट गरेको थियो। भेटमा प्रधानमन्त्री ओलीको चीन भ्रमणका क्रममा रणनीतिक सम्झौता नगर्न अप्रत्यक्ष सुझाव दिएको बताइन्छ।

प्रधानमन्त्री ओलीले भारतीय दबावलाई कूटनीतिक रूपमा अस्वीकार गरेका छन्। सार्वभौम राष्ट्रको कार्यकारी प्रमुखले निर्णय लिन स्वतन्त्र हुनुपर्ने भन्दै उनले भारतीय दबावलाई अस्वीकार गरेको स्रोतको दाबी छ।

प्रधानमन्त्री ओलीले चीनसँग अनुदान सम्बन्धि सम्झौता गर्ने संकेत देखिएपछि भारतीय पक्षले नेपालको विकासमा भारतले सबै प्रकारको सहयोग गर्ने कुरा राखेको छ। प्रधानमन्त्रीले भने कूटनीतिक रूपमा जवाफ दिँदै निर्णय स्वविवेकमा आधारित हुने बताएका छन्।

चितवन: नारायणगढ–मुग्लिन सडकखण्डको सत्र किलोमा आज बिहान भएको दुर्घटनामा चार जनाको मृत्यु भएको छभने ६ जना घाइते भएका छन् ।

जिल्ला प्रहरी कार्यालयका प्रहरी प्रवक्ता भेषराज रिजालका अनुसार आज बिहान ३ः०० बजे मुग्लिनबाट नारायणगढतर्फ आइरहेको विद्युतीय वाहन र नारायणगढबाट मुग्लिनतर्फ गइरहेको बस एकापसमा ठोक्किँदा विद्युतीय वाहनमा सवार गोरखा आरुघाट गाउँपालिका–१ का ४२ वर्षीय राजबहादुर गुरुङ, परिचय नखुलेका ४० वर्षीया महिला, ३२ वर्षीय र ३५ वर्षीय पुरुषको मृत्यु भएको हो ।

दुर्घटनामा अन्य छ जना घाइते भएका छन् । घाइतमध्ये दुई जनाको भरतपुर अस्पताल र चार जनाको चितवन शिक्षण अस्पतालमा उपचार भइरहेको छ ।

चितवन: नेपाली कांग्रेसका प्रवक्ता डा प्रकाशशरण महतले सरकारको कामलाई प्रभावकारी बनाउनका लागि सत्तासाझेदार दलहरुबीचको संयन्त्र बनाइएको बताउनुभएको छ ।

यहाँ पत्रकारहरुसँग कुराकानी गर्दै प्रवक्ता डा महतले सङ्घीय, प्रदेश र स्थानीय तहमा समझादरी बढाउन संयन्त्र अवश्यक भएको बताउनुभयो । उहाँले भन्नुभयो, “धेरैभन्दा धेरै परिणाम प्राप्त हुन सकोस् र जनताको अपेक्षा पूरा गर्न सकियोस् भन्ने उद्देश्यले संयन्त्र बनाइएको हो ।”

देशको अर्थतन्त्रलाई चलायमान बनाउन युवाशक्तिलाई देशमै अवसर छ भन्ने विश्वास दिलाउन आवश्यक रहेको प्रवक्ता डा महतको भनाइ थियो । अर्थतन्त्रमा सुधार ल्याउन प्रधानमन्त्रीले पार्टीको स्वार्थभन्दा माथि देश र जनतालाई राखेर काम गर्नुपर्ने बताउनुभयो । उहाँले भन्नुभयो, “देशभित्रै अवसर छ । विदेश मात्रै जान खोज्नु हुँदैन भन्ने सन्देश दिन सक्नुपर्छ ।”

धनगढी: धनगढी उपमहानगरपालिका–३ चटकपुर निवासी धर्मसिंह–माधवी ऐर दम्पतीलाई हिजोआज निद्रा पर्दैन । घरै अगाडि रहेको नेपाल आयल निगमको इन्धन डिपोका कारण ऐर दम्पतीमात्र होइन, डिपो वरपरका मानिस निर्धक्क भएर सुत्न सकेका छैनन् । डिपोका कारण सधैँ त्रासमा रहनुपरेको उनीहरूको गुनासो छ ।

स्थानीय धर्मसिंह डिपो स्थानान्तरणका लागि पटकपटक आग्रह गरिए पनि कुनै सुनुवाइ नभएको दुखेसो गर्नुुहुन्छ । पेट्रोलियम पदार्थ भण्डारण गरिएका ठ्ुल्ठूला ट्याङ्क नजिकै भएको र डिपोबाट इन्धन ‘लोडअनलोड’ भइरहँदा घरमा आगो बाल्न पनि त्रसित हुनुपरेको चटकपुरका स्थानीयको गुनासो छ । “घरमा आगो बाल्न डराउनुपर्ने अवस्था छ”, माधवीले भन्नुभयो, “डरले रातभर निद्रा पर्दैन, निगमले डिपो अन्यत्र सारेर स्थानीयलाई निर्धक्क जिउन दिनुपर्छ ।”

केही वर्ष पहिले जङ्गल रहेको डिपो आसपास अहिले बाक्लो बस्ती छ । डिपो अगाडि नै रहेको धनगढी–अत्तरिया सडकमा दैनिक हजारौँ सवारीसाधन गुड्छन् । नजिकै धनगढी नेत्रालय, सिपी अस्पतालसहित अन्य स्वास्थ्य संस्था, विद्यालय र व्यापारिक ‘कम्प्लेक्स’ सञ्चालनमा छन् ।

नगर क्षेत्रमा हुने सार्वजनिक सुनुवाइ कार्यक्रममा पनि आफूले पटकपटक डिपोका कारण स्थानीयले निर्धक्क भएर बस्न नपाएको र बस्ती नभएको क्षेत्रमा डिपो सार्न पटकपटक आग्रह गरेको धर्मसिंह सम्झनुहुन्छ ।

चटकपुरकै स्थानीय भीम मल्ल घनावस्तीबीचको डिपोका कारण वरपरका बासिन्दा सधैँ चिन्तित रहेका सुनाउनुहुन्छ । “कतिबेला आगलागी हुन्छ, सधैँ चिन्तित छौँ”, उहाँ भन्नुहुन्छ, “आगलागीको त्रासका कारण स्थानीयले ढुक्कका साथ जीवनयापन गर्न सकेका छैनन् ।”

केही वर्षअघि डिपो नजिकै रहेको एक फर्निचरमा आगलागी हुँदा कतिपय स्थानीय घरै छाडेर हिँडेका चटकपुरवासीको सम्झनामा ताजै छ । धनगढी उपमहानगरपालिकाका प्रमुख गोपी हमाल मुख्य बजारको बीचमा रहेको डिपोका कारण सुरक्षा चुनौती थपेको बताउनुहुन्छ ।

“डिपो नजिकै अस्पताल र विद्यालय सञ्चालनमा छन्, कसैगरी ‘डिजास्टर’ भयोभने आसपास मात्र नभई सिङ्गो नगर नै प्रभावित हुनसक्छ”, प्रमुख हमालले रासससँग भन्नुभयो, “लाखौँ लिटर इन्धन भण्डारण गरिएको छ, दुर्घटनाको जोखिम छ, बस्ती नभएका क्षेत्रमा डिपो सार्नुपर्छ ।” डिपो सुरक्षित स्थानमा स्थानान्तरण गर्न निगमलाई पटकपटक आग्रह गरिएको बताउँदै उहाँले निगमका तर्फबाट पनि डिपो सार्ने प्रतिबद्धता प्राप्त भएको जानकारी दिनुभयो ।

पुनर्वासमा डिपो सार्ने योजना, कार्यान्वयनमा ढिलाइ

निगमले डिपो स्थानान्तरण गर्ने योजना तर्जुमा गरे पनि जग्गा प्राप्तिमा ढिलासुस्ती भएको छ । सरकारी स्वामित्वको राष्ट्रिय आवास कम्पनीले कञ्चनपुरको पुनर्वास नगरपालिका वडा नम्बर ३ र ५ मा रहेको २२ बिघा जग्गा निगमलाई बिक्री गर्ने प्रस्ताव गरे पनि त्यो कार्यान्वयन भएको छैन ।

निगमका उपनिर्देशक प्रदीप यादव पनि डिपो स्थानान्तरणको प्रयास भइरहेको बताउनुहुन्छ । “घना बस्तीका बीचमा डिपो छ, यसलाई स्थानान्तरण गर्नैपर्छ”, उपनिर्देशक यादवले भन्नुभयो । सुरक्षा मापदण्डअनुसारका संरचना निर्माणका लागि अहिले डिपो भएको जग्गा अपुग छ । निगमले यसअघि समिति गठन गरी डिपो स्थानान्तरणका लागि जग्गा खोजेको थियो ।

धनगढीस्थित डिपोमा संरचना निर्माण गर्न जग्गा अपर्याप्त भएकाले दैनिक कार्य सञ्चालन प्रभावित भएको निगमका प्राविधिक जगदीशप्रसाद जैसी बताउनुहुन्छ । हाल डिपो रहेको जग्गा अपर्याप्त भएकाले भण्डारण क्षमता वृद्धि गर्न तथा ट्याङ्करमा ‘लोडअनलोड’ गर्न पनि समस्या भएको उहाँले बताउनुभयो ।

हरेक प्रदेशमा कम्तीमा ९० दिनको माग धान्न सक्ने पेट्रोलियम पदार्थ भण्डारणगृह निर्माण गर्ने सरकारको योजना छ । भण्डारण क्षमता बढाउन निगमलाई चटकपुरस्थित डिपो स्थानान्तरण गर्नुपर्ने बाध्यता छ । निगमको धनगढीस्थित डिपो कुल एक बिघा आठ कठ्ठामा फैलिएको छ । उक्त डिपोमा अहिले डिजेल भण्डारणका लागि सात सय ६० किलोलिटरका दुईवटा ‘भर्टिकल ट्याङ्क’ र ७० किलोलिटरको भूमिगत ट्याङ्क तथा पेट्रोल भण्डारणका लागि सात सय ६० किलोलिटरको एक भर्टिकल ट्याङ्क र ७० किलोलिटरको भूमिगत ट्याङ्कसहितको संरचना छन् ।

उक्त मौज्दातबाट सुदूरपश्चिम प्रदेशका लागि सात दिनको मात्र माग धान्नेछ । धनगढी डिपोले सुदूरपश्चिम प्रदेशका कैलाली, कञ्चनपुर, डडेल्धुरा, बैतडी, दार्चुला, बझाङ, डोटी, अछाम र बाजुरा जिल्लामा पेट्रोलियम पदार्थ आपूर्ति गर्दै आएको छ ।

काठमाडौं: अमेरिकी चुनावमा डोनाल्ड ट्रम्पको जितपछि उनकी पत्नी मेलानिया ट्रम्पले बिहीबार बिहान अमेरिकी जनतालाई एक पोस्टमार्फत सम्बोधन गरेकी छन्।

आफ्नो एक्स खातामा मेलानियाले लेखेकी छिन्, “बहुसंख्यक अमेरिकीहरूले हामीमाथि यो महत्त्वपूर्ण जिम्मेवारीको विश्वास गरेका छन्। हामी हाम्रो गणतन्त्रको स्वतन्त्रताको रक्षा गर्नेछौं।”

उनले थप लेखेकी छिन्, “हामी आशा गर्छौं कि हाम्रो देशका नागरिकहरू फेरि एकजुट हुनेछन् र व्यक्तिगत स्वतन्त्रता, आर्थिक समृद्धि र सुरक्षाका लागि आफ्नो व्यक्तिगत विचारधाराभन्दा माथि उठ्नेछन्।”

अमेरिकाकी भावी प्रथम महिलाले आफ्नो पोस्टमा अमेरिकाको ऊर्जा, सीप र पहलले देशलाई अगाडि बढाउन उत्कृष्ट प्रतिभालाई एकसाथ ल्याउने विश्वास व्यक्त गरेकी छन्।

काठमाडौं: चुनाब जितेसँगै डोनाल्ड ट्रम्पविरुद्ध चलिरहेका मुद्दा बन्द हुन सक्छन् । सीबीएसको रिपोर्ट अनुसार न्याय मन्त्रालय र अमेरिकी विशेष काउन्सिल ज्याक स्मिथले डोनाल्ड ट्रम्पविरुद्धको संघीय आरोप हटाउने विषयमा छलफल गरिरहेका छन्।

प्रतिवेदनमा स्रोतलाई उद्धृत गर्दै यो छलफलको कारण वर्तमान राष्ट्रपतिमाथि कुनै आरोप नलाग्ने मुलुकमा लामो समयदेखि चलिरहेको नीति रहेको बताइएको छ ।

स्मिथले हाल ट्रम्पविरुद्ध धेरै मुद्दाहरूको नेतृत्व गरिरहेका छन्। ट्रम्प छिट्टै यस्ता पहिलो अमेरिकी राष्ट्रपति बन्नेछन् जसविरुद्ध धेरै मुद्दा विचाराधीन छन्।

यी मुद्दाहरूमा गोप्य कागजातहरू गलत ह्यान्डलिङ र २०२० को राष्ट्रपति चुनावको नतिजा उल्टाउने प्रयास सम्बन्धी मुद्दाहरू पनि समावेश छन्।