इटहरी (सुनसरी): सप्तकोशी नदीमा उद्धार अभ्यासका क्रममा सशस्त्र प्रहरी बलका दुई गोताखोर बेपत्ता भएका छन्। सशस्त्र प्रहरी मधेस प्रदेश कार्यालयका अनुसार सप्तरी र सुनसरीलाई छुट्याउने सप्तकोशी नदीमा अभ्यास गर्दै गर्दा उनीहरू बेपत्ता भएका हुन्।
बेपत्ता हुनेमा दन्तकाली तालिम केन्द्र, बरमजियाका प्रहरी जवान सुरज साउद र हरदेव राजवंशी रहेका छन्। उनीहरू विपद्का समयमा नदीमा फसेका व्यक्तिहरूको उद्धार कसरी गर्ने भन्ने तालिमको अभ्यासमा संलग्न थिए।
घटनापछि खोजी तथा उद्धार कार्य तीव्र पारिएको छ। जिल्ला प्रहरी कार्यालय सुनसरीका प्रवक्ता, प्रहरी नायब उपरीक्षक युवराज खतिवडाले बेपत्ता जवानहरूको खोजीमा सक्रियता बढाइएको जानकारी दिए। उनले भने, “बेपत्ताको खोजी कार्यमा तीव्रता दिइएको छ र स्थानीय प्रशासनसँग समन्वय गरेर आवश्यक सहयोग लिइँदैछ।”
