काठमाडौँ । नेपाल राष्ट्र बैंकले बुधबारका लागि विदेशी मुद्राको विनिमयदर सार्वजनिक गरेको छ। आज अमेरिकी डलरको मूल्यमा वृद्धि देखिएको छ।

राष्ट्र बैंकका अनुसार, अमेरिकी डलर एकको खरिददर १४९ रुपैयाँ ११ पैसा र बिक्रीदर १४९ रुपैयाँ ७१ पैसा कायम गरिएको छ। त्यस्तै, युरोपियन युरो एकको खरिददर १७५ रुपैयाँ ९८ पैसा र बिक्रीदर १७६ रुपैयाँ ६९ पैसा तोकिएको छ। युके पाउण्ड स्ट्रलिङ एकको खरिददर २०२ रुपैयाँ ३७ पैसा र बिक्रीदर २०३ रुपैयाँ १९ पैसा निर्धारण गरिएको छ।

स्वीस फ्रयाङ्क एकको खरिददर १९१ रुपैयाँ १७ पैसा र बिक्रीदर १९१ रुपैयाँ ९४ पैसा रहेको छ भने अष्ट्रेलियन डलर एकको खरिददर १०५ रुपैयाँ २७ पैसा र बिक्रीदर १०६ रुपैयाँ ७० पैसा कायम गरिएको छ। क्यानेडियन डलर एकको खरिददर १०८ रुपैयाँ ४३ पैसा र बिक्रीदर १०८ रुपैयाँ ८७ पैसा तथा सिङ्गापुर डलर एकको खरिददर ११७ रुपैयाँ ३२ पैसा र बिक्रीदर ११७ रुपैयाँ ७९ पैसा तोकिएको छ।

त्यसैगरी, जापानी येन १० को खरिददर ९ रुपैयाँ ३९ पैसा र बिक्रीदर ९ रुपैयाँ ४३ पैसा रहेको छ भने चिनियाँ युआन एकको खरिददर २१ रुपैयाँ ८८ पैसा र बिक्रीदर २१ रुपैयाँ ९६ पैसा निर्धारण गरिएको छ। साउदी अरेबियन रियाल एकको खरिददर ३९ रुपैयाँ ७३ पैसा र बिक्रीदर ३९ रुपैयाँ ८९ पैसा तथा कतारी रियाल एकको खरिददर ४० रुपैयाँ ९० पैसा र बिक्रीदर ४१ रुपैयाँ ६ पैसा कायम गरिएको छ।

यस्तै, थाइ भाट एकको खरिददर ४ रुपैयाँ ६६ पैसा र बिक्रीदर ४ रुपैयाँ ६७ पैसा, युएई दिराम एकको खरिददर ४० रुपैयाँ ६० पैसा र बिक्रीदर ४० रुपैयाँ ७६ पैसा तथा मलेसियन रिङ्गेट एकको खरिददर ३७ रुपैयाँ ७४ पैसा र बिक्रीदर ३७ रुपैयाँ ८९ पैसा रहेको छ।

अन्य मुद्रातर्फ, दक्षिण कोरियन वन १०० को खरिददर १० रुपैयाँ १४ पैसा र बिक्रीदर १० रुपैयाँ १८ पैसा, स्वीडिस क्रोनर एकको खरिददर १६ रुपैयाँ २८ पैसा र बिक्रीदर १६ रुपैयाँ ३५ पैसा तथा डेनिस क्रोनर एकको खरिददर २३ रुपैयाँ ५५ पैसा र बिक्रीदर २३ रुपैयाँ ६४ पैसा तोकिएको छ।

त्यस्तै, हङकङ डलर एकको खरिददर १९ रुपैयाँ ४ पैसा र बिक्रीदर १९ रुपैयाँ ११ पैसा रहेको छ। कुवेती दिनार एकको खरिददर ४८६ रुपैयाँ ७३ पैसा र बिक्रीदर ४८८ रुपैयाँ ६९ पैसा, बहराइन दिनार एकको खरिददर ३९५ रुपैयाँ २६ पैसा र बिक्रीदर ३९६ रुपैयाँ ८५ पैसा तथा ओमानी रियाल एकको खरिददर ३८७ रुपैयाँ २९ पैसा र बिक्रीदर ३८८ रुपैयाँ ८५ पैसा कायम गरिएको छ।

भारतीय रुपैयाँ १०० को खरिददर १६० रुपैयाँ र बिक्रीदर १६० रुपैयाँ १५ पैसा निर्धारण गरिएको राष्ट्र बैंकले जनाएको छ।

काठमाडौं । साबिक विजेता मछिन्द्र फुटबल क्लब १६औं इटहरी गोल्डकप फुटबल प्रतियोगिताको सेमिफाइनलमा प्रवेश गरेको छ। मंगलबार राति सम्पन्न दोस्रो क्वाटरफाइनल खेलमा झापा ११ फुटबल क्लबलाई सडेनडेथमा ८–७ गोल अन्तरले पराजित गर्दै मछिन्द्रले अन्तिम चारमा स्थान बनाएको हो।

इटहरी रंगशालामा भएको प्रतिस्पर्धात्मक खेल निर्धारित ९० मिनेटमा १–१ को बराबरीमा सकिएको थियो। त्यसपछि निर्णयका लागि पेनाल्टी सुटआउटमा जाँदा दुवै टोलीले ५–५ गोल गरेपछि खेल सडेनडेथमा पुगेको थियो। सडेनडेथमा झापाका विशाल मादीको प्रहार आकाशिएपछि मछिन्द्रको जित सुनिश्चित भयो।

मछिन्द्रका लागि देवेन्द्र तामाङ, सनिस श्रेष्ठ, दीपेश गुरुङ, मिलन राई, सौरभ लिम्बु, एलिक श्रेष्ठ, विशाल भण्डारी र रोहित चन्दले पेनाल्टीमा गोल गरेका थिए। यद्यपि पेमा तामाङको प्रहार झापाका गोलकिपर मौषम मगरले बचाएका थिए।

झापा ११ का प्रसान्त लिम्बु, निशान बस्नेत, बाबा टुण्डे, स्मार्टा मिउटु सलोमन किंग, राजेश दाहाल र किरण सुमारले पेनाल्टीमा गोल गरे। तर निर्णायक क्षणमा गोलकिपर मौषम मगरको प्रहार असफल हुँदा टोली पराजित भयो।

यसअघि खेलको ५५औं मिनेटमा बाबा टुण्डेको गोलबाट झापाले अग्रता लिएको थियो। तर ४३औं मिनेटमा डि–एरियाभित्र योगेश गुरुङको ह्यान्ड भएपछि रेफ्री उमेश बिडारीले मछिन्द्रलाई पेनाल्टी दिएका थिए, जसलाई सनिस श्रेष्ठले सदुपयोग गर्दै बराबरी गोल फर्काएका थिए।

बाँकी समयमा थप गोल हुन नसकेपछि खेल पेनाल्टी हुँदै सडेनडेथमा पुगेको हो। उत्कृष्ट प्रदर्शन गरेका सनिस श्रेष्ठ प्लेयर अफ द म्याच घोषित हुँदै नगद १० हजार रुपैयाँ प्राप्त गरे।

अब मछिन्द्रले सेमिफाइनलमा शुक्रबार युवा समाज मोरङसँग प्रतिस्पर्धा गर्नेछ। युवा समाजले उद्घाटन खेलमै जस्टजोन एफसी नाइजेरियालाई हराउँदै अन्तिम चारमा स्थान सुरक्षित गरिसकेको छ।

इटहरी गोल्डकपमा दोस्रो सहभागिता जनाइरहेको मछिन्द्र र झापा ११बीच अघिल्लो संस्करणमा पनि क्वाटरफाइनलमै भेट भएको थियो, जहाँ मछिन्द्र १–० ले विजयी भएको थियो।

प्रतियोगिताअन्तर्गत बुधबार हुने तेस्रो क्वाटरफाइनलमा आयोजक राष्ट्रिय जागृति क्लबले सातदोबाटो युथ क्लब, ललितपुरसँग प्रतिस्पर्धा गर्नेछ। प्रतियोगिता वैशाख ७ गतेसम्म सञ्चालन हुनेछ, जसमा विजेताले १० लाख र उपविजेताले ५ लाख रुपैयाँ पुरस्कार प्राप्त गर्नेछन्।

काठमाडौं । हाल देशभर पश्चिमी तथा स्थानीय वायुको आंशिक प्रभाव देखिएको छ। यसका कारण नेपालको हिमाली क्षेत्रमा सामान्यतया बदली, पहाडी क्षेत्रमा आंशिक बदली तथा तराई क्षेत्रमा मौसम प्रायः सफा रहेको छ।

हाल कोशी प्रदेशका पहाडी र हिमाली भूभागसँगै बागमती, गण्डकी र कर्णाली प्रदेशका हिमाली क्षेत्रका एक–दुई स्थानमा हल्का वर्षा र हिमपात भइरहेको मौसम पूर्वानुमान विभागले जनाएको छ।

आज दिउँसो कोशी प्रदेशको पहाडी क्षेत्रसहित देशका हिमाली भूभागमा सामान्य बदली रहनेछ भने अन्य पहाडी क्षेत्रमा आंशिक बदली रहनेछ। तराई क्षेत्रमा भने मौसम प्रायः सफा रहने अनुमान गरिएको छ। कोशी प्रदेशका पहाडी तथा हिमाली क्षेत्रका केही स्थान र गण्डकी प्रदेशका पहाडी भूभागसहित अन्य हिमाली क्षेत्रका एक–दुई स्थानमा मेघगर्जन र चट्याङसहित हल्का वर्षा तथा हिमपातको सम्भावना रहेको छ।

त्यस्तै, आज राति कोशी, बागमती र गण्डकी प्रदेशका हिमाली भूभागमा सामान्य बदली रहनेछ भने अन्य हिमाली र पहाडी क्षेत्रमा आंशिक बदली रहनेछ। तराई क्षेत्रमा मौसम मुख्यतः सफा रहनेछ। यी प्रदेशका हिमाली क्षेत्रका एक–दुई स्थानमा हल्का वर्षा र हिमपात हुने सम्भावना पनि रहेको मौसम विभागले जनाएको छ।

काठमाडौं । तीन महिनादेखि सुस्ताएको नेपाली फिल्मको व्यापार नयाँ वर्षसँगै पुनः चलायमान हुन थालेको देखिएको छ।

माघ १६ गते रिलिज भएको ‘आबाट आमा’ले नेपालमा १३ करोड १३ लाख रुपैयाँभन्दा बढी ग्रस कमाइ गर्दै उल्लेखनीय सफलता हासिल गरे पनि त्यसपछि प्रदर्शनमा आएका अधिकांश नेपाली फिल्मले अपेक्षाअनुसार व्यापार गर्न सकेका थिएनन्। ‘कुमारी’, ‘रमिताको पिरती’, ‘बिगुल’, ‘श्री बुकुरो’, ‘शिवांस’, ‘प्रवासी जीवन’, ‘लालीमा’, ‘हामी तीन भाइ’ लगायत फिल्महरू बक्स अफिसमा कमजोर सावित भएका थिए।

यसैबीच, नयाँ वर्षको अवसर पारेर गत शुक्रबार रिलिज भएको ‘राम नाम सत्य’ले पछिल्ला फिल्महरूको तुलनामा राम्रो सुरुआत गरेको छ। पहिलो चार दिनमै सुखद् व्यापार गरेको यो फिल्मले नयाँ वर्षको पहिलो दिन मंगलबार देशभर उत्साहजनक दर्शक उपस्थिति देखाएको छ।

आधिकारिक बक्स अफिस रिपोर्ट सार्वजनिक नभए पनि उपलब्ध शोहरूमा उच्च अकुपेन्सी देखिएको छ। वितरक गोविन्द शाहीका अनुसार बिहानदेखि रातिसम्मका धेरै शो हाउसफुल रहे। पाँचौं दिनसम्म आइपुग्दा दर्शक संख्या बढ्नु सकारात्मक संकेत मानिएको छ।

हल भिजिटमा रहेका अभिनेता विराज भट्ट ले फिल्मले अपेक्षाअनुसार प्रतिक्रिया पाइरहेको बताए। उनले नयाँ वर्ष लक्षित रिलिज सफल भएको र ‘वर्ड अफ माउथ’ पनि सकारात्मक रहेको उल्लेख गरे।

त्यस्तै, मंगलबारबाट रिलिज भएको ‘पहाड’ले पनि राम्रो सुरुआत गरेको देखिएको छ। पहिलो दिनमै कतिपय शोहरू हाउसफुल भएको निर्माण पक्षले जनाएको छ। निर्देशक तुलसी घिमिरे ले फिल्मप्रति दर्शकको प्रतिक्रिया उत्साहजनक रहेको बताएका छन्।

अभिनेता विपिन कार्की का अनुसार बिहान केही सुस्त देखिए पनि दिउँसोपछि हलहरूमा राम्रो माहोल बनेको थियो।

नेपाली फिल्म उद्योगका लागि नयाँ वर्ष व्यापारका हिसाबले महत्वपूर्ण समय मानिन्छ। बिदा, उत्सव र पारिवारिक घुमफिरका कारण यस अवधिमा हलहरूमा दर्शकको चाप बढ्ने अपेक्षा गरिन्छ।

‘राम नाम सत्य’ माइकल चन्द निर्देशित एक्सन ड्रामा हो, जसमा विराज भट्ट, सुशील श्रेष्ठ, सुनिल थापा, सुपुष्पा भट्ट, दिव्या रायमाझी, आयुष सिंह ठकुरी, खुसी कार्की लगायत कलाकारहरूको अभिनय रहेको छ।

‘पहाड’ भने तुलसी घिमिरे निर्देशित सामाजिक ड्रामा हो, जसमा मदनकृष्ण श्रेष्ठ, सुनिल थापा, शिव श्रेष्ठ, विपिन कार्की, रवीन्द्र सिंह बानियाँ, अरूण क्षेत्री र पञ्चमी घिमिरे लगायत कलाकारहरूको अभिनय रहेको छ।

काठमाडौं । पाकिस्तानले इरान र अमेरिका बीचको अर्को चरणको वार्ता चाँडै सुरु हुन सक्ने संकेत दिएको छ।

पाकिस्तानका रक्षामन्त्री ख्वाजा आसिफ ले निरन्तर युद्धविराम र सकारात्मक अवस्थालाई ध्यानमा राख्दै दुई देशबीच वार्ता अघि बढ्ने अपेक्षा व्यक्त गरेका छन्।

इस्लामाबाद स्थित संसद भवन बाहिर पत्रकारहरूसँग कुरा गर्दै उनले भने, “हालैका वार्तापछि सन्तोषजनक वातावरण बनेको छ र अहिलेसम्म कुनै नकारात्मक परिस्थिति देखिएको छैन,” बीबीसी फारसी ले जनाएको छ।

उनले थपे, “वर्तमान अवस्था सामान्य छ र यसले कूटनीतिक प्रयासहरू सही दिशामा अघि बढिरहेको संकेत गर्दछ।”

यसअघि पाकिस्तानका प्रधानमन्त्री शाहबाज शरीफ ले पनि दुई पक्षबीचको युद्धविरामले वार्ताको सम्भावना बलियो बनाएको बताएका थिए।

उल्लेखनीय छ कि पहिलो चरणको वार्ता इस्लामाबाद मा सम्पन्न भएको थियो, जहाँ इरान र अमेरिकाका प्रतिनिधिहरू सहभागी भए पनि कुनै ठोस निष्कर्ष निस्किएको थिएन।

काठमाडौं । बालेन्द्र शाह नेतृत्वको वर्तमान सरकारले नेपाल कम्युनिस्ट पार्टी (एमाले) नेतृत्वको अघिल्लो सरकारले सुरु गरेको ‘सगरमाथा संवाद’लाई निरन्तरता दिने भएको छ।

सरकारले सार्वजनिक गरेको नीतिगत प्रतिबद्धतापत्रमा यस बहुपक्षीय संवादलाई नेपालको ‘प्रमुख कूटनीतिक औजार’का रूपमा विकास गर्ने उल्लेख गरिएको छ।

जलवायु परिवर्तन र हिमाली क्षेत्रका समस्याबारे विश्वको ध्यान आकर्षित गर्ने उद्देश्यले सन् २०१९ मा केपी शर्मा ओली नेतृत्वको सरकारको पालामा यो अवधारणा अघि सारिएको थियो। वर्तमान सरकारको निर्णयलाई राजनीतिक वृत्तमा सकारात्मक निरन्तरताका रूपमा हेरिएको छ।

प्रधानमन्त्री बालेन्द्र शाहले सार्वजनिक गरेको १०० बुँदे शासन सुधार कार्ययोजनामा परराष्ट्र नीतिअन्तर्गत ‘सगरमाथा संवाद’लाई उच्च प्राथमिकतामा राखिएको छ। परराष्ट्रमन्त्री शिशिर खनाल ले नयाँ सरकारले पुराना राम्रा नीतिहरूलाई परिष्कृत गर्दै निरन्तरता दिने धारणा व्यक्त गरेका छन्।

उनले भने, “नयाँपन भनेको पूर्ण विच्छेद होइन, राम्रो कामको निरन्तरता हो। सगरमाथा संवाद राष्ट्रिय गौरव र कूटनीतिक आवश्यकतासँग जोडिएको विषय हो, यसलाई अझ विस्तार गरिनेछ।”

यस संवादमार्फत नेपालले जलवायु परिवर्तनको असर हिमालदेखि तल्लो तटीय क्षेत्रसम्म कसरी पुगिरहेको छ भन्ने विषयमा अन्तर्राष्ट्रिय समुदायसँग ‘जलवायु न्याय’को पक्षमा आवाज उठाउने लक्ष्य राखेको छ।

एमालेले आफ्नो घोषणापत्रमा यसलाई आर्थिक कूटनीतिको माध्यम बनाउने उल्लेख गरेको थियो। सोही आधारमा वर्तमान सरकारले आगामी सन् २०२७ को संस्करणका लागि तयारी संकेत गरेको छ।

सन् २०२५ मा सम्पन्न पहिलो संस्करणपछि यस पहललाई संस्थागत गर्नुपर्ने माग बढ्दै गएको थियो। नयाँ सरकारले यसलाई अपनत्व दिएपछि नेपालको परराष्ट्र नीतिमा ‘राष्ट्रिय सहमति’को सन्देश अन्तर्राष्ट्रिय समुदायमा पुगेको विश्लेषण गरिएको छ।

विश्लेषकहरूका अनुसार, बालेन्द्र शाह ले विकास र सुशासनका केही पूर्वाधार मोडेलहरूमा निरन्तरता दिँदै आएको देखिन्छ। ‘सगरमाथा संवाद’लाई अघि बढाउने निर्णयले विभिन्न राजनीतिक धारहरूबीच नीतिगत सहकार्यको संकेत दिएको छ।

यद्यपि, यस पहललाई केवल औपचारिक छलफलमा सीमित नराखी ठोस अन्तर्राष्ट्रिय सहयोग र लगानी भित्र्याउन सक्नु सरकारका लागि मुख्य चुनौती रहनेछ। आगामी संस्करणमा विश्वस्तरीय नेतृत्वको सहभागिताले यसको प्रभावकारिता निर्धारण गर्ने अपेक्षा गरिएको छ।

काठमाडौँ । नेपाली सेनाले बिरामी भई अलपत्र परेका एक विदेशी नागरिकको उद्धार गरेको छ।

मंगलबार लाङटाङ राष्ट्रिय निकुञ्ज क्षेत्रमा भ्रमणका क्रममा गोसाईंकुण्ड गाउँपालिका–४ को रिभरसाइड इलाकामा समस्या परेका ती नागरिकलाई नेपाली सेनाको श्रीनाथ गण अन्तर्गत सुरक्षा गुल्म स्याफ्रुबेशिबाट खटिएको टोलीले सुरक्षित रूपमा उद्धार गरेको हो।

सेनाका अनुसार उद्धार टोलीले कठिन भूगोल र मौसमीय चुनौतीका बाबजुद समयमै पुगेर बिरामी अवस्थाका विदेशी नागरिकलाई सुरक्षित स्थानमा सार्न सफल भएको जनाएको छ।

काठमाडौँ । बालेन्द्र शाहको नेतृत्वमा गठित नयाँ सरकारले राष्ट्रिय मान्यता प्राप्त ६ वटा राजनीतिक दलका घोषणापत्र, वाचापत्र र प्रतिबद्धताहरूलाई समेट्दै साझा दस्तावेजका रूपमा ‘राष्ट्रिय प्रतिबद्धतापत्र’ सार्वजनिक गरेको छ।

गत भदौको ‘जेन–जी’ आन्दोलनको परिवेश र फागुन २१ को निर्वाचनपछि गठन भएको सरकारले चैत्र १३ मा जारी गरेको शासकीय सुधारसम्बन्धी १०० बुँदे कार्यसूचीको बुँदा नं. ३ लाई आधार मानेर उक्त प्रतिबद्धतापत्र तयार पारेको हो।

राजनीतिक दलहरूबीच साझा स्वामित्व स्थापित गर्ने उद्देश्यसहित ल्याइएको यस दस्तावेजलाई आगामी आर्थिक वर्ष २०८३/८४ देखि वार्षिक नीति, कार्यक्रम र बजेटमा समावेश गरी कार्यान्वयन गरिनेछ। यसको अन्तरनिकाय समन्वय र अनुगमन प्रधानमन्त्री तथा मन्त्रिपरिषद्को कार्यालयले गर्ने जनाइएको छ।

प्रतिबद्धतापत्रमा आर्थिक स्थायित्व र सुधारलाई प्रमुख प्राथमिकतामा राखिएको छ। आगामी पाँच वर्षभित्र औसत ७ प्रतिशत आर्थिक वृद्धि हासिल गर्ने, प्रतिव्यक्ति आय ३ हजार अमेरिकी डलर पुर्‍याउने तथा अर्थतन्त्रको आकार १०० अर्ब डलर नजिक पुर्‍याउने लक्ष्य राखिएको छ। साथै, सोही अवधिमा स्वदेशमै १५ लाख रोजगारी सिर्जना गर्ने लक्ष्य पनि लिइएको छ।

कृषि क्षेत्रमा आत्मनिर्भरता बढाउँदै किसानलाई क्रेडिट कार्ड र योगदानमा आधारित पेन्सन उपलब्ध गराउने योजना समावेश गरिएको छ। पर्यटनतर्फ ‘सफा हिमालः सुरक्षित आरोहण’ अभियान सञ्चालन गरिनेछ भने ऊर्जातर्फ आगामी दशकमा ३० हजार मेगावाट विद्युत् उत्पादन गर्ने लक्ष्य राखिएको छ।

सुशासन प्रवर्द्धनका लागि सरकारी सेवाभित्रका दलीय ट्रेड युनियन खारेज गर्ने, सार्वजनिक पदधारीहरूको सम्पत्ति छानबिन गर्ने तथा मेरिटोक्रेसीका आधारमा मात्र नियुक्ति गर्ने नीति अघि सारिएको छ।

यसैगरी, शिक्षा र स्वास्थ्य क्षेत्रलाई क्रमशः निःशुल्क र गुणस्तरीय बनाउने, सूचना प्रविधिलाई रणनीतिक उद्योग घोषणा गर्दै ‘फ्रम नेपाल टु द वर्ल्ड’ अभियान सञ्चालन गर्ने, साथै सहकारी र लघुवित्त क्षेत्रको प्रभावकारी नियमन गर्दै पीडितलाई न्याय दिलाउनेलगायत १८ प्रमुख विषयगत क्षेत्रहरू प्रतिबद्धतापत्रमा समेटिएका छन्।

लन्डन । अमेरिकी राष्ट्रपति डोनाल्ड ट्रम्पले इरानका बन्दरगाहहरूमा नाकाबन्दी गर्ने योजना अघि सारे पनि नेटो आबद्ध राष्ट्रहरूले त्यसमा साथ नदिने स्पष्ट पारेका छन्।

युद्ध समाप्त भएपछि मात्रै हस्तक्षेप गर्ने प्रस्ताव राख्दै बेलायत र फ्रान्स लगायतका देशहरूले ट्रम्पको सैन्य अभियानमा सहभागी हुन अस्वीकार गरेका छन्। यसले पश्चिमी सैन्य गठबन्धनभित्रको मतभेदलाई थप गहिरो बनाएको छ।

इरानसँग ६ हप्ता लामो द्वन्द्व अन्त्य गर्न भएका वार्ता असफल भएपछि ट्रम्पले सोमबारदेखि नाकाबन्दी सुरु भएको घोषणा गरेका थिए। उनले नाकाबन्दी तोड्ने कुनै पनि इरानी जहाजलाई अमेरिकी सेनाले ध्वस्त पार्ने चेतावनी दिएका छन्।

सुरुमा ‘स्ट्रेट अफ होर्मुज’ हुँदै आवतजावत गर्ने सबै जहाज रोक्ने भनिए पनि पछि अमेरिकी सेनाले नाकाबन्दी इरानी बन्दरगाहमा आउने–जाने जहाजमा मात्रै लागू हुने स्पष्ट पारेको छ। यो जलमार्ग विश्वको करिब पाँचौँ हिस्सा तेल आपूर्तिसँग सम्बन्धित मानिन्छ।

ट्रम्पले अन्य देशहरू पनि नाकाबन्दीमा सहभागी हुने दाबी गरे पनि नेटोका प्रमुख सदस्यहरूले त्यसलाई अस्वीकार गरेका छन्। बेलायती प्रधानमन्त्री केयर स्टार्मरले युद्धमा नतानिने स्पष्ट अडान लिएका छन् भने फ्रान्सेली राष्ट्रपति इमानुएल म्याक्रोनले युद्धपछि मात्र सुरक्षित जलयात्राका लागि बहुराष्ट्रिय मिसन सञ्चालन गर्ने प्रस्ताव अघि सारेका छन्।

यसबीच, नेटोका महासचिव मार्क रुट्टेले युरोपेली देशहरूलाई ट्रम्पले सैन्य सहयोग खोजेको जानकारी गराए पनि सदस्य राष्ट्रहरूले इरानसँग सहमति भएपछि मात्रै कदम चाल्ने बताएका छन्।

टर्कीका विदेशमन्त्री हाकान फिदानले कूटनीतिक समाधानमै जोड दिँदै आगामी शिखर सम्मेलनमार्फत ट्रम्प र नेटोबीचको सम्बन्ध पुनः परिभाषित गर्नुपर्ने बताएका छन्।

यसैबीच, फ्रान्सको पहलमा बेलायतसहित करिब ३० देशले जलमार्गमा ढुवानी सुरक्षाका लागि स्वतन्त्र मिसन गठन गर्ने तयारी गरेका छन्, जसले कुनै पनि पक्ष नलिई केवल ट्याङ्करहरूको सुरक्षा सुनिश्चित गर्नेछ।

काठमाडौं । राष्ट्रपति रामचन्द्र पौडेलले नयाँ वर्ष २०८३ को अवसरमा सम्पूर्ण नेपालीमा शुभकामना व्यक्त गर्दै राष्ट्रिय एकता, सुशासन र समृद्धिका लागि साझा संकल्प आवश्यक रहेको बताएका छन्। मंगलबार जारी सन्देशमा उनले नयाँ वर्षलाई केवल उत्सवका रूपमा नभई विगतको समीक्षा र भविष्यका लागि मार्गनिर्देशन गर्ने अवसरका रूपमा लिनुपर्ने उल्लेख गरेका छन्।

राष्ट्रपतिले हालै सम्पन्न निर्वाचनमार्फत जनताले संघीय लोकतान्त्रिक गणतन्त्र, विधिको शासन, सामाजिक न्याय र समृद्धिप्रतिको स्पष्ट अपेक्षा व्यक्त गरेको बताएका छन्। उनले ती अपेक्षाहरू पूरा गर्न सबै राजनीतिक शक्ति र नागरिक एकताबद्ध भएर अघि बढ्नुपर्नेमा जोड दिएका छन्।

देशलाई सही दिशामा अगाडि बढाउन उनले पाँच प्रमुख संकल्प अघि सारेका छन्— लोकतान्त्रिक मूल्य र गणतन्त्रप्रति निष्ठा, सुशासन र पारदर्शिता, समावेशीकरण र सामाजिक न्याय, राष्ट्रिय स्वाधीनताको रक्षा तथा नागरिक केन्द्रित शासन व्यवस्था।

उक्त लक्ष्य हासिल गर्न दृढ संकल्प, अनुशासन र सहकार्य अपरिहार्य रहेको उल्लेख गर्दै राष्ट्रपतिले सबैलाई आफ्नो स्थानबाट जिम्मेवार भूमिका निर्वाह गर्न आह्वान गरेका छन्।