काठमाडौं । संयुक्त राष्ट्रसंघको सुरक्षा परिषद्को बैठकमा पहिलोपटक कुनै विश्व नेताको जीवनसाथीले अध्यक्षता गरेकी छन्। अमेरिकी राष्ट्रपति डोनाल्ड ट्रम्पकी पत्नी तथा प्रथम महिला मेलानिया ट्रम्पले सोमबार न्यूयोर्कमा आयोजित बैठकमा अध्यक्षता गर्दै द्वन्द्वग्रस्त क्षेत्रमा बालबालिकाको शिक्षा र सुरक्षासम्बन्धी अधिकारको विषयमा जोड दिइन्।
उनले बालबालिकाको शिक्षा सहिष्णुता, आपसी समझदारी र विश्व शान्ति प्रवर्द्धनका लागि आधार भएको उल्लेख गरिन्। उनले द्वन्द्वका कारण प्रभावित बालबालिकाप्रति गहिरो चिन्ता व्यक्त गर्दै उनीहरूको शिक्षा र सुरक्षाको सुनिश्चितताका लागि अन्तर्राष्ट्रिय समुदायले सक्रिय भूमिका खेल्नुपर्ने बताइन्। साथै, उनले अमेरिकी सैनिकका परिवारप्रति संवेदना व्यक्त गर्दै घाइतेहरूको शीघ्र स्वास्थ्य लाभको कामना गरिन्।
मेलानियाले भनिन्, “अमेरिकी बालबालिकामात्र होइन, विश्वभरका सबै बालबालिकासँग अमेरिका उभिएको छ। चाँडै शान्ति तपाईंहरूको जीवनमा फर्कियोस् भन्ने मेरो आशा छ।”
संयुक्त राष्ट्रसंघकी सहायक महासचिव रोजमेरी डिकार्लोले द्वन्द्व सुरु हुँदा बालबालिकाहरू सबैभन्दा बढी प्रभावित हुने तथ्य दोहोर्याइन्। उनका अनुसार इजरायल, संयुक्त अरब इमिराट्स, कतार, बहराइन र ओमानका धेरै विद्यालय सैन्य कारबाहीका कारण बन्द भई वैकल्पिक माध्यमबाट पठनपाठन सञ्चालन गर्न बाध्य भएका छन्।
इरानका अधिकारीहरूले शनिबार मिनाब शहरको एक प्राथमिक विद्यालयमा भएको आक्रमणमा १५३ जनाको मृत्यु भएको दाबी गर्दै त्यसको जिम्मेवारी अमेरिका र इजरायलमाथि लगाएका छन्।
बैठक सुरु हुनुअघि संयुक्त राष्ट्रसंघका लागि इरानका राजदूत अमिर सईद इरावानीले अमेरिकाले सुरक्षा परिषद्को अध्यक्षता सुरु गर्ने पहिलो दिनमै बालबालिकाको सुरक्षासम्बन्धी बैठक बोलाउनु “लज्जास्पद र कपटपूर्ण” भएको टिप्पणी गरेका छन्।
उक्त घटनाबारे अमेरिकी सेनाले अनुसन्धान भइरहेको जनाएको छ भने इजरायली सेनाले सम्बन्धित क्षेत्रमा आफ्नो कारबाहीबारे जानकारी नभएको प्रतिक्रिया दिएको छ। अमेरिकी विदेशमन्त्री मार्को रुबियोले भने, “संयुक्त राज्यले कुनै विद्यालयलाई जानाजानी लक्ष्य बनाउने छैन” भन्दै आरोप अस्वीकार गरेका छन्।
