सुर्खेत । १६ वर्षीया इनिशा विकको बलात्कारपछि हत्या भएको भनिएको घटना अदालतमा प्रवेश गरेको छ। सरकारी वकिलको कार्यालयले आइतबार जिल्ला अदालत सुर्खेतमा अभियोग पत्र दायर गर्दै घटनालाई ‘सामूहिक बलात्कारपछि हत्या’ को रूपमा प्रस्तुत गरेको हो।
यसअघि प्रहरीले घटनालाई एकल जबरजस्ती करणीका रूपमा निष्कर्ष निकालेको थियो। तर सरकारी वकिलले अनुसन्धानका विभिन्न प्रमाणहरूका आधारमा घटनामा एकभन्दा बढी व्यक्तिको संलग्नता रहेको दाबी गरेको छ।
अभियोग पत्रअनुसार चार जना नाबालकले पूर्वयोजना बनाएर इनिशालाई जनजागरण सामुदायिक वनमा लगेर सामूहिक रूपमा जबरजस्ती करणी गरी हत्या गरेका हुन्। पीडितलाई प्रेमको जालमा पारेर घटनास्थलमा पुर्याइएको पनि अभियोगमा उल्लेख छ।
फागुन २३ गते बिहान ट्युसन पढ्न जाने भन्दै घरबाट निस्किएकी इनिशा वीरेन्द्रनगर–४ स्थित सामुदायिक वनमा अचेत अवस्थामा फेला परेकी थिइन्। उनलाई अस्पताल पुर्याउँदा चिकित्सकले मृत घोषणा गरेका थिए।
पोस्टमार्टम रिपोर्टअनुसार जबरजस्ती करणीका क्रममा संवेदनशील अङ्गमा गम्भीर चोट लागी अत्यधिक रक्तस्राव हुँदा मृत्यु भएको देखिएको छ। शरीरका अन्य भागमा पनि संघर्षका चिन्ह भेटिएको उल्लेख गरिएको छ।
घटनास्थलबाट कण्डम, रगतका दाग, कपडाहरू र अन्य भौतिक प्रमाणहरू फेला परेका थिए। साथै मोबाइल लोकेसन, कल डिटेल र सिसिटिभी फुटेजले पनि अभियुक्तहरूबीच समन्वय भएको संकेत गरेको अभियोगमा उल्लेख छ।
डिजिटल प्रमाणअनुसार घटनाको दिन बिहानैदेखि अभियुक्तहरूबीच निरन्तर सम्पर्क भएको र घटनास्थल आसपासमा उनीहरूको उपस्थिती देखिएको छ।
पीडित परिवारले सुरुदेखि नै सामूहिक बलात्कारपछि हत्या भएको दाबी गर्दै अन्य व्यक्तिहरूको संलग्नता बारे उजुरी दिएका थिए।
सरकारी वकिलले मुलुकी अपराध संहिता २०७४ अन्तर्गत सामूहिक जबरजस्ती करणी र कर्तव्य ज्यान मुद्दामा आजीवन कैद सजाय माग गरेको छ।
अब उक्त घटनाको अन्तिम टुंगो अदालतको फैसला पछि लाग्नेछ।
