रुसले सीमा क्षेत्रमा १ लाख सेना जम्मा गरेपछि बेलायतले युक्रेनलाई ‘आत्मरक्षा’ छोटो दुरीको एन्टी ट्यांक मिसाइल पठाउने भएको छ । रक्षा सचिव बेन वालेसले सांसदहरुलाई बेलायतले युक्रेनको सेनालाई प्रशिक्षण दिन बेलायती सेनाको सानो टुकडी पनि त्यहाँ जाने जानकारी दिएका हुन् ।
उनले भने, ‘रुसको सेनालाई आक्रमणका लागि प्रयोग गर्न सक्ने देखिएको छ । यो चिन्ताको विषय हो ।’ तर रुसले भने आक्रमणको कुनै पनि योजना नरहेको बताउँदै पश्चिमा मुलुकहरु आक्रामक बनिरहेको आरोप लगाएको छ । सन् २०१५ यता दर्जनौँ बेलायती सैनिकहहरु युक्रेनमा पुगेर त्यहाँका सैनिकहरुलाई प्रशिक्षण दिइसकेको छ । सन् २०१४ मा रुसले क्रिमियालाई गाभेपछि बेलायतले युक्रेनको पुनर्निमाणमा सहयोग गर्ने बताएको थियो ।
वालेसले रुसको ‘बढ्दो धम्कीपूर्ण व्यवहार’ बीच बेलायतले युक्रेनलाई थप सहयोग प्रदान गर्ने पनि जिकिर गरे । हतियारको पहिलो खेप सोमबार पठाइएको उनले जानकारी दिए पनि कस्तो प्रकारको हतियार पठाइयो भन्ने चाहिँ खुलाएनन् ।
