काठमाडौं । सम्पत्ति शुद्धीकरण सम्बन्धी कसुरमा अनुसन्धानका लागि दीपक भट्ट र सुलभ अग्रवाललाई काठमाडौं जिल्ला अदालतले थप सात दिन हिरासतमा राख्न अनुमति दिएको छ।
न्यायाधीश तिलक बहादुर कार्कीको इजलासले सम्पत्ति शुद्धीकरण अनुसन्धान विभागको निवेदन तथा दुवै पक्षका अधिवक्ताहरूको बहस सुनेपछि उक्त आदेश जारी गरेको हो।
विभागले अनुसन्धान अन्तिम चरणमा पुगेको जनाउँदै अझै केही प्रक्रिया बाँकी रहेको भन्दै ३० दिनको म्याद माग गरेको थियो। तर अदालतले हालका लागि सात दिन मात्र थप गरेको हो।
सम्पत्ति शुद्धीकरण निवारण ऐन, २०६४ को दफा १७ उपदफा (४) अनुसार म्याद थप गरिएको अदालतले जनाएको छ।
यसअघि प्रतिवादीतर्फबाट वरिष्ठ अधिवक्ताहरू कृष्ण प्रसाद सापकोटा, सविता भण्डारी बराल तथा अधिवक्ताहरू सुरेन्द्र कुमार महतो, रमण कुमार कर्णलगायतले बहस गरेका थिए। विभागको तर्फबाट पनि अनुसन्धान अधिकृतहरूले आफ्नो पक्ष प्रस्तुत गरेका थिए।
अदालतले बाँकी अनुसन्धान कार्य छिटो सम्पन्न गरी रायसहितको प्रतिवेदन पेश गर्न विभागलाई निर्देशन दिएको छ।
