काठमाडौँ। अमेरिकाका विभिन्न शहरहरूमा डोनाल्ड ट्रम्प प्रशासनविरुद्ध ‘नो किंग्स’ र्यालीको तेस्रो संस्करणमा लाखौँ मानिसहरू सडकमा उत्रिएका छन्।
आयोजकहरूले ट्रम्पका नीतिहरू—इरानसँगको युद्ध, संघीय आप्रवासन प्रवर्तन, बढ्दो महँगी—को विरोधका लागि र्याली आयोजना गरिएको बताएका छन्। उनीहरूले भने, “ट्रम्प हामीमाथि तानाशाहझैं शासन गर्न चाहन्छन्, तर शक्ति जनतामा निहित छ।”
न्युयोर्क, वासिङ्टन डीसी, लस एन्जलस, मिनेसोटा र अन्य प्रमुख शहरहरूमा प्रदर्शनकारीहरूले सडक र सार्वजनिक स्थलहरूमा मार्च, नाराबाजी र पुत्ला जुलुस गरेर ट्रम्प प्रशासनविरुद्ध आफ्नो आक्रोश व्यक्त गरेका थिए।
केही स्थानमा हिंसात्मक घटना पनि भएका छन्। लस एन्जलसमा संघीय अधिकारीमाथि सिमेन्ट ब्लक प्रहार गर्दा दुई अधिकारी घाइते भएका थिए। डलास र लस एन्जलसमा प्रदर्शनकारीहरूलाई नियन्त्रणमा लिन प्रहरीले ठुलो सङ्ख्यामा पक्राउ गरेको छ।
अक्टोबरको अघिल्लो ‘नो किंग्स’ र्यालीमा झन्डै ७० लाख मानिस सहभागी भएका थिए। आलोचकहरूले ट्रम्पका कार्यकारी कदमलाई असंवैधानिक ठहराउँदै लोकतन्त्रका लागि खतरा भएको चेतावनी दिएका छन्। तर ट्रम्पले आफूलाई राजा वा तानाशाह नहुने दाबी गरेका छन्।
हालै न्यासभिल, ह्युस्टन र बोस्टनमा पनि विरोध प्रदर्शन जारी छ।
