काठमाडौं: नेपाली कांग्रेसका महामन्त्री गगन थापाले पूर्वपदाधिकारीहरूलाई आजीवन सुविधा दिने कानुनको विरोध गरेका छन् ।
शनिबार प्रथम तुम्बेवा महोत्सव २०८१ लाई सम्बोधन गर्दै महामन्त्री थापाले राष्ट्रपति, प्रधानमन्त्री, मन्त्रीहरूले जनताको करबाट आजीवन सुविधा पाउनु न्यायसंगत नभएको बताउँदै यस्तो अनुत्पादक खर्च रोक्ने कानुन आवश्यक रहेको उल्लेख गरे ।
स्वास्थ्य मन्त्री रहँदा सरकारी खर्चमा विदेश उपचार बन्द गर्ने कानुन ल्याएका उनले जनताको ढुकुटीबाट जीवनभर सेवा सुविधा दिने कानुनको तयारीप्रति आपत्ति जनाए ।
उनले भने, ‘राष्ट्रपति, प्रधानमन्त्री, मन्त्रीहरूले जनताको करबाट आजीवन सुविधा पाउनु अन्यायपूर्ण छ । सरकार चलाउन नसके पनि कम्तीमा यस्तो अनुत्पादक खर्च रोक्ने कानुन बनाउनुपर्छ ।’
गत पुस ९ मा बसेको मन्त्रिपरिषद् बैठकले ‘पूर्वपदाधिकारीको सुविधासम्बन्धी व्यवस्था गर्न बनेको विधेयक’ को मस्यौदा तयार पार्न गृह मन्त्रालयलाई स्वीकृति दिएको थियो ।
गृह मन्त्रालयको प्रस्तावलाई मन्त्रिपरिषद्ले सैद्धान्तिक स्वीकृति दिएपछि पूर्वपदाधिकारीका लागि आजीवन सुविधा दिने विधेयकको मस्यौदा निर्माण प्रक्रिया सुरु भएको छ ।
