काठमाडौं: राजसंस्था पुनःस्थापनाका पक्षमा संघर्षरत संयुक्त जनआन्दोलन समितिका कार्यवाहक संयोजक डा. जगमान गुरुङले चैत्र १५ गतेको तीनकुने घटनामा पक्राउ परेका नेताहरूको रिहाइ नभए सामूहिक गिरफ्तारीको चेतावनी दिएका छन्।
बुधबार काठमाडौंमा आयोजित प्रतिवद्धता सभामा बोल्दै गुरुङले वैशाख २१ गतेसम्म पक्राउ परेका सबैलाई रिहा नगरे र नवराज सुवेदीको नजरबन्द नहटाए वैशाख २२ गतेदेखि सामूहिक गिरफ्तारी दिने घोषणा गरे। “यस अभियानको अगुवाइ म स्वयं गर्छु,” उनले भने।
गुरुङले आगामी आन्दोलन ‘भद्र अवज्ञा’को स्वरूपमा अघि बढ्ने बताए। “अहिलेको सन्दर्भमा सशस्त्र आन्दोलन आवश्यक छैन,” उनले प्रष्ट पारे। राजावादी आन्दोलन कमजोर भएको भन्ने हल्ला नियोजित ढंगले फैलाइएको भन्दै उनले आफूहरू योजनाबद्ध रूपमा सक्रिय रहेको जनाए। गुरुङले वैशाख २१ बाट ‘एक्सन’मा जाने दाबी गरे।
यता, राप्रपा नेपालका अध्यक्ष कमल थापाले चैत्र १५ गते तीनकुनेमा भएको घटनालाई राज्यले जानाजान हिंसात्मक बनाएको आरोप लगाए। “राजावादी आन्दोलनलाई कमजोर र बद्नाम बनाउन पूर्वराजा ज्ञानेन्द्र शाहमाथि आरोप थुपार्ने प्रयास भइरहेको छ,” उनले भने।
थापाले संघीय, धर्मनिरपेक्ष गणतन्त्रात्मक व्यवस्थालाई परिवर्तन गर्न नपाउने गरी संविधान संशोधनको तयारी भइरहेको भन्दै त्यसो गरिए देश अस्थिरतामा जाने चेतावनी पनि दिए।
