काठमाडौं: हाल देशभर पश्चिमी वायु र स्थानीय वायु प्रणालीको प्रभाव सक्रिय रहेको मौसम पूर्वानुमान महाशाखाले जनाएको छ । यस्तै, बङ्गालको खाडीबाट आएको जलवाष्पयुक्त हावाको प्रभावले पनि मौसममा परिवर्तन देखिएको महाशाखाले स्पष्ट पारेको छ ।
महाशाखाका अनुसार, आज दिउँसो देशभर आंशिकदेखि सामान्य बदलीको अवस्था रहनेछ । उच्च पहाडी तथा हिमाली क्षेत्रका केही स्थानहरूमा र देशका अन्य भागका एक-दुई स्थानमा मेघगर्जन र चट्याङसहित हल्कादेखि मध्यम वर्षा हुने सम्भावना छ ।
आज राति पनि देशभर आंशिकदेखि सामान्य बदली रहनेछ । कोशी, बागमती, गण्डकी र लुम्बिनी प्रदेशका केही स्थानहरूमा मेघगर्जन र चट्याङसहित हल्का वर्षा हुनसक्ने पूर्वानुमान गरिएको छ । साथै, उच्च पहाडी तथा हिमाली क्षेत्रका केही स्थानहरूमा हल्का हिमपात हुने सम्भावनासमेत रहेको महाशाखाले जनाएको छ ।
