राजविराज (सप्तरी): नेपाली कांग्रेसका प्रवक्ता डा. प्रकाशशरण महतले नेपालमा राजतन्त्र पुनःस्थापना हुने कुनै सम्भावना नरहेको स्पष्ट गर्नुभएको छ।
नेपाल प्रेस युनियन सप्तरीद्वारा राजविराजस्थित कांग्रेस पार्टी कार्यालयमा आयोजित पत्रकार सम्मेलनमा बोल्दै उहाँले नेपाली जनताले अतीतमा राजाबाट पटक–पटक धोका पाएकाले अब राजतन्त्रको पुनरागमन सम्भव नरहेको टिप्पणी गर्नुभयो।
“नेपाली जनताले विगतका विभिन्न कालखण्डमा राजतन्त्रबाट धोका मात्र पाए, अब फेरि जनताले राजतन्त्र स्वीकार्ने छैनन्,” डा. महतले भन्नुभयो।
उहाँले हालको संघीय लोकतान्त्रिक शासन प्रणालीको विकल्प नरहेको उल्लेख गर्दै शासनको शैलीमा देखिएका कमीकमजोरीलाई सुधार गर्दै अगाडि बढ्नुपर्ने आवश्यकता औँल्याउनुभयो।
कार्यक्रममा नेपाली कांग्रेस सप्तरीका जिल्ला सभापति रामदेव साह, उपसभापति रामकुमार यादव, सचिव सनत मण्डललगायत नेताहरूको उपस्थिति थियो।
