नेपाल राष्ट्र बैंकले शनिबारका लागि विदेशी मुद्राको विनिमयदर सार्वजनिक गरेको छ। नयाँ विनिमयदरअनुसार अमेरिकी डलर एकको खरिददर १३६ रुपैयाँ ४३ पैसा र बिक्रीदर १३७ रुपैयाँ ०३ पैसा तोकिएको छ।

अन्य प्रमुख मुद्राहरूको विनिमयदर यसप्रकार छ:

युरोपियन युरो: खरिददर १५५.०५, बिक्रीदर १५५.७३

ब्रिटिस पाउन्ड (स्टर्लिङ): खरिददर १८१.६४, बिक्रीदर १८२.४४

स्विस फ्र्याङ्क: खरिददर १६४.६७, बिक्रीदर १६५.४०

अष्ट्रेलियन डलर: खरिददर ८७.०७, बिक्रीदर ८७.४५

क्यानेडियन डलर: खरिददर ९८.२८, बिक्रीदर ९८.७१

सिङ्गापुर डलर: खरिददर १०३.८१, बिक्रीदर १०४.२६

एशियाली मुद्रातर्फ:

जापानी येन (१० येन): खरिददर ९.५२, बिक्रीदर ९.५६

चिनियाँ युआन: खरिददर १८.७२, बिक्रीदर १८.८०

साउदी रियाल: खरिददर ३६.३७, बिक्रीदर ३६.५३

कतारी रियाल: खरिददर ३७.४३, बिक्रीदर ३७.५९

थाई भाट: खरिददर ४.०७, बिक्रीदर ४.०९

युएई दिराम: खरिददर ३७.१४, बिक्रीदर ३७.३१

मलेसियन रिङ्गेट: खरिददर ३१.१९, बिक्रीदर ३१.३३

साउथ कोरियन वन (१०० वन): खरिददर ९.४८, बिक्रीदर ९.५२

युरोपेली मुद्राहरूमा:

स्विडिस क्रोनर: खरिददर १४.०८, बिक्रीदर १४.१४

डेनिस क्रोनर: खरिददर २०.७७, बिक्रीदर २०.८६

खाडी मुलुकका मुद्रातर्फ:

हङकङ डलर: खरिददर १७.५९, बिक्रीदर १७.६७

कुवेती दिनार: खरिददर ४४४.९३, बिक्रीदर ४४६.८९

बहराइन दिनार: खरिददर ३६१.९५, बिक्रीदर ३६३.५४

ओमनी रियाल: खरिददर ३५४.३४, बिक्रीदर ३५५.९०

भारतीय रुपैयाँ १०० को खरिददर १६० रुपैयाँ र बिक्रीदर १६० रुपैयाँ १५ पैसा कायम गरिएको छ।

राष्ट्र बैंकले उक्त विनिमयदर आवश्यकतानुसार जुनसुकै बेला परिवर्तन गर्न सकिने स्पष्ट पारेको छ। यस्तै, वाणिज्य बैंकहरूले तोक्ने दर खुला बजारको आधारमा केही फरक हुन सक्ने र अद्यावधिक जानकारी राष्ट्र बैंकको वेबसाइटमा उपलब्ध हुने जनाएको छ।

काठमाडौँ: चन्द्रागिरि नगरपालिकाले दिगो विकास लक्ष्य (एसडीजी) को स्थानीय स्वैच्छिक मूल्याङ्कन (Voluntary Local Review – VLR) प्रतिवेदनको नेपाली संस्करण र कार्ययोजना ढाँचा सार्वजनिक गरेको छ।

नगर प्रमुख घनश्याम गिरीले उक्त प्रतिवेदन संयुक्त राष्ट्रसंघमा प्रस्तुत गरिसक्नुभएको जानकारी दिँदै नगरपालिकाले ‘राम्रो स्वास्थ्य र समृद्धि’, ‘गुणस्तरीय, समावेशी तथा समानतामूलक शिक्षा’, ‘लैङ्गिक समानता’, ‘स्वच्छ खानेपानी र सरसफाइ’ र ‘दिगो शहर र समुदाय’ भन्ने पाँच प्रमुख लक्ष्यमा प्राथमिकता दिएको बताउनुभयो।

उहाँले भन्नुभयो, “समृद्धिको आधार भौतिक पूर्वाधार मात्र होइन, आर्थिक, सामाजिक र प्रविधियुक्त संरचना हो। नगरपालिकाले यी लक्ष्यमा केन्द्रित नीति, कार्यक्रम र बजेटमार्फत सही मार्गमा अघि बढिरहेको छ।”

नगरले एसडीजीसँग मेल खाने बजेट साङ्केतिकरण अभ्यास पनि थालिएको छ, जुन एशिया–प्रशान्त क्षेत्रमा नवप्रवर्तनको उदाहरणका रूपमा लिइएको छ।

नगर सभाकक्षमा आयोजित कार्यक्रममा प्रमुख प्रशासकीय अधिकृत सुरेन्द्र थापा मगरले पनि दिगो विकासका लक्ष्य हासिल गर्न नीति, कार्यक्रम र बजेट समन्वय गरिएको जानकारी दिनुभयो। कार्यक्रममा युएन ह्याविट्याटका प्रतिनिधि प्रज्ञा प्रधानले स्वैच्छिक मूल्याङ्कन प्रतिवेदनको महत्वबारे प्रकाश पार्नुभयो।

सो कार्यक्रममा नगरका वडाध्यक्षहरू, कार्यपालिका सदस्यहरू, शाखा प्रमुखहरू तथा अन्य सरोकारवाला व्यक्तिहरूको उपस्थिति थियो। कार्ययोजना ढाँचा सम्बन्धी छुट्टै प्रस्तुति पनि गरिएको थियो।

झापा: मेचीनगर नगरपालिकाले स्थानीय बजार र सहकारीहरूको अनुगमन तीव्र बनाएको छ। बजार अनुगमनका क्रममा म्याद गुज्रिएको उपभोग्य सामग्री फेला परेपछि व्यवसायीलाई जरिवाना गरिएको छ भने सहकारीहरूलाई सचेत गराइएको छ।

नगर उपप्रमुख मीना उप्रेतीको नेतृत्वमा भएको अनुगमनमा मेचीनगर–९ स्थित पूजा फुड प्रोडक्सन उद्योगमा म्याद सकिएका पास्ता, सुजी र मैदा फेला परेको थियो। उपभोक्ताको हकमा लापरबाही गरेको भन्दै उद्योग सञ्चालक पुष्पा जैसवाल चौधरीलाई नगरपालिकाले रु ५० हजार जरिवाना गरेको प्रमुख प्रशासकीय अधिकृत अग्निप्रसाद अधिकारीले जानकारी दिए। जरिवाना तिरेपछि लापरबाही नदोहोर्‍याउने सर्तमा उद्योगको तालो खोलिएको हो।

अनुगमन टोलीले मेचीनगर–१० स्थित नन्दा फुड इन्डस्ट्रिज र मेचीनगर–१४ को सिङ्गापुर बेभरेज नेपाल प्रालिमा पनि अनुगमन गरेको थियो। सरसफाइमा कमजोरी देखिएकाले नन्दा फुड इन्डस्ट्रिजलाई सचेत गराउँदै सुधार गर्न निर्देशन दिइएको खाद्य विश्लेषक दिपेन्द्र कार्कीले जानकारी दिए।

यता, नगरपालिकाको सहकारी समन्वय समितिले मेचीनगरका १५ सहकारी संस्थामा स्थलगत अनुगमन गरेको छ। समितिका सचिवसमेत रहेका अधिकृत कार्कीका अनुसार आठ सहकारीले सहकारी मूल्य र मान्यता पालना नगरेको पाइएकाले सुधारका लागि सुझाव दिइएको हो।

अनुगमन गरिएका सहकारीमध्ये मेचीनगर–१० को लङ्कासरी महिला संवृद्धि, तारावारी शान्ति, मेचीनगर–१४ को आपसी समाज, विहानी, मेचीनगर–१२ को सामूहिक अभियान, सब्जीमण्डी कृषि, चारआली तथा मेचीनगर–१३ को आशावादी बहुउद्देश्यीय सहकारी संस्थाहरू रहेका छन्। यस्तै, मेचीनगर–१ देखि ५ सम्मका कृष्ण थुम्की, बौद्धमोड, प्रेरणा, ब्रह्माण्ड अपाङ्ग तथा महिला, पानस, साना किसान, र नकलबन्दा सहकारी संस्थाहरूको पनि अनुगमन गरिएको छ।

अनुगमनमा केही सहकारीमा सञ्चालक समिति बैठक नियमित नभएको, विना धितो ऋण प्रवाह, कर्मचारीलाई नियुक्तिपत्र नदिएको, ऋण फाइलमा आवश्यक कागजात नराखिएको, मासिक प्रतिवेदन नबनाएको, सूचना नटाँसेको, साधारणसभा नगरेको, सदस्य शिक्षा कार्यक्रम नचालिएको, र कर्जा जोखिम कोषको व्यवस्था नभएको जस्ता समस्या देखिएको थियो।

अनुगमन टोलीमा समिति सदस्य दुर्गाप्रसाद सापकोटा, बीपी भट्टराई, जगन्नाथ भट्टराई र सचिव कार्की सहभागी थिए।

प्रमुख प्रशासकीय अधिकृत अधिकारीले उपभोक्ताको अधिकार सुरक्षित गर्न बजार, सहकारी र अन्य क्षेत्रमा नियमित र प्रभावकारी अनुगमन गरिने बताए।

उपप्रमुख उप्रेतीको नेतृत्वमा गरिएको बजार अनुगमन टोलीमा राजस्व शाखा प्रमुख प्रेमप्रसाद पराजुली, खाद्य निरीक्षक सङ्गीता साह, प्रशासनका हरि खतिवडा, घरेलु तथा साना उद्योग कार्यालयका सुरेश गौतम, गुणस्तर तथा नापतौल कार्यालयका विजयनन्द चौधरी, उद्योग वाणिज्य संघका विष्णु बुढाथोकी र प्रहरी सहभागी थिए।

काठमाडौँ: सङ्घीय संसद्का दुवै सदनको अधिवेशन आज अपराह्न १ बजेदेखि प्रारम्भ हुँदैछ। संसद् अधिवेशन मन्त्रिपरिषद्को सिफारिसमा राष्ट्रपति रामचन्द्र पौडेलद्वारा आह्वान गरिएको हो।

संसद् सचिवालयले सार्वजनिक गरेको कार्यसूचीअनुसार, आजको प्रतिनिधिसभा बैठकमा राष्ट्रपति कार्यालयबाट प्राप्त सदनको अधिवेशन आह्वान र मन्त्रिपरिषद् पुनर्गठनसम्बन्धी पत्रबारे सभामुख देवराज घिमिरेले जानकारी गराउने कार्यक्रम रहेको छ।

बैठकमा प्रतिनिधिसभा नियमावली, २०७९ को नियम १० बमोजिम बैठकको अध्यक्षता गर्ने सदस्यहरूको मनोनयन गरिने सम्भावना छ। अधिवेशनको पहिलो दिन भएकाले विभिन्न राजनीतिक दलका नेताहरूलाई मन्तव्य व्यक्त गर्न समय दिइनेछ।

प्रधानमन्त्रीको निजी सचिवालयका अनुसार, प्रधानमन्त्री एवं नेकपा (एमाले) संसदीय दलका नेता केपी शर्मा ओलीले सदनलाई सम्बोधन गर्नुहुनेछ। व्यवस्थापन पक्षमा उपप्रधानमन्त्री एवं अर्थमन्त्री विष्णुप्रसाद पौडेलले ‘वैकल्पिक विकास वित्त परिचालन विधेयक, २०८१’ प्रस्तुत गर्ने कार्यक्रम रहेको छ।

यसअघि हिउँदे अधिवेशन गत चैत १८ गते अन्त्य भएको थियो। संविधानको व्यवस्था अनुसार, प्रत्येक वर्षको पहिलो अधिवेशनपछि राष्ट्रपतिले दुवै सदनको संयुक्त बैठकमा नीति तथा कार्यक्रममार्फत सम्बोधन गर्न सक्ने प्रावधान रहेको छ। यसै अनुरूप राष्ट्रपतिको सम्बोधन यही अधिवेशनमा हुनेछ।

आगामी जेठ १५ गते अर्थमन्त्रीबाट आर्थिक वर्ष २०८१/८२ को बजेट प्रस्तुत गरिने छ। त्यसअघि वैशाख १९ गते नीति तथा कार्यक्रम प्रस्तुत गरिने र ‘प्रि बजेट’ छलफल वैशाख २८ गतेदेखि प्रारम्भ हुने सम्भावना रहेको संसद् सचिवालयका एक अधिकारीले जानकारी दिनुभयो। हालको व्यवस्थाअनुसार, बजेट प्रस्तुत हुनु १५ दिनअघि नै प्रि बजेट छलफल गर्नुपर्ने कानुनी प्रावधान छ।

यस अधिवेशनमा विनियोजन विधेयकका सिद्धान्त तथा प्राथमिकतामाथि छलफल हुने र संघीय निजामती सेवा ऐन तथा विद्यालय शिक्षासम्बन्धी विधेयक पारित गर्ने प्रयास हुने सचिवालयका प्रवक्ता एकराम गिरीले जानकारी दिनुभयो। अधिवेशन सञ्चालनका लागि सबै तयारी पूरा भइसकेको उहाँको भनाइ छ।