बाढी प्रभावित क्षेत्रमा निःशुल्क इन्टरनेट उपलब्ध गराउन स्टारलिंक तयार
काठमाडौं। अमेरिकास्थित स्पेसएक्सको स्याटलाइट इन्टरनेट सेवा प्रदायक Starlink ले नेपाल–चीन सीमा क्षेत्रमा आएको विनाशकारी बाढीबाट प्रभावित क्षेत्रमा उद्धार तथा राहत कार्यमा सहयोग गर्न निःशुल्क इन्टरनेट सेवा र उपकरण उपलब्ध गराउने घोषणा गरेको छ।
स्टारलिंकले सामाजिक सञ्जाल ‘एक्स’मार्फत नेपाल सरकार तथा मानवीय सहायता संस्थाबाट अनुमति प्राप्त हुनेबित्तिकै प्रभावित क्षेत्रमा सेवा सञ्चालन गर्न तयार रहेको जनाएको छ।
बाढी तथा पहिरोका कारण सडक, पुल र टेलिफोन तथा मोबाइल नेटवर्कमा क्षति पुगेका कारण प्रभावित क्षेत्रमा सञ्चार सम्पर्क कठिन बनेको छ। यस्तो अवस्थामा उद्धार टोलीबीच समन्वय गर्न, घाइतेको उपचारमा खटिएका स्वास्थ्यकर्मीलाई आवश्यक सूचना आदानप्रदान गर्न तथा आफन्तको खोजीमा रहेका परिवारलाई सम्पर्कमा जोड्न स्याटलाइट इन्टरनेट प्रभावकारी हुने स्टारलिंकको भनाइ छ।
कम्पनीका अनुसार स्टारलिंकको किट अनबक्स गरेर विद्युत् वा जेनेरेटरजस्ता पावर स्रोतमा जोड्ने र खुला आकाशतर्फ राख्नेबित्तिकै केही मिनेटमै उच्च गतिको तथा न्यून विलम्बता (लो-लेटेन्सी) भएको इन्टरनेट सञ्चालन गर्न सकिन्छ।
नेपालका सञ्चार प्रणाली तथा टेलिफोन टावरहरूमा बाढी र पहिरोका कारण ठूलो क्षति पुगेको अवस्थामा उद्धार तथा राहत कार्यलाई प्रभावकारी बनाउन स्टारलिंकले सरकारको अनुमतिको प्रतीक्षा गरिरहेको जनाएको छ।
