काठमाडौं। दोस्रो संस्करणको नेपाल प्रिमियर लिग (एनपीएल)मा सुदूरपश्चिम रोयल्सले आजको दोस्रो खेलमा जनकपुर बोल्ट्सलाई ६ विकेटले पराजित गर्दै प्लेअफमा आफ्नो स्थान सुरक्षित गरेको छ।
१४६ रनको लक्ष्य पछ्याएको सुदूरपश्चिमले १७.४ ओभरमा ४ विकेट गुमाएर जित दर्ता गर्यो। इशान पाण्डेले ३५ बलमा ५६ रनको उत्कृष्ट अर्धशतक प्रहार गरे। बिनोद भण्डारीले ४२ तथा हरमित सिंहले २५ रनको योगदान दिए। जनकपुरका माज सदाकतले २ विकेट लिएका थिए।
यसअघि त्रिवि क्रिकेट मैदानमा टस जितेर पहिला ब्याटिङ गरेको जनकपुर बोल्ट्सले २० ओभरमा ८ विकेटको क्षतिमा १४५ रन जोडेको थियो। संजय कृष्णमूर्तीले ५० रनको अर्धशतक बनाए। बलिङतर्फ सुदूरपश्चिमका अभिनाश बोहोराले ४ विकेट र स्कट कुग्गेलिनले ३ विकेट लिए।
जितसँगै सुदूरपश्चिम ५ खेलमध्ये सबै जित्दै १० अंकसहित तालिकाको शीर्ष स्थानमा पुग्दै प्लेअफमा प्रवेश गर्ने पहिलो टोली बनेको छ। चारै खेलमा पराजित जनकपुर भने लिग चरणमै बाहिरिने जोखिममा रहेको छ।
