समाचार संस्था पीटीआईका अनुसार न्यायाधीश अरुण मोंगा र योगेन्द्र कुमार पुरोहित को डिभिजन बेन्चले आशारामलाई भारतीय दण्ड संहिताको धारा ३७६(घ) तथा पोक्सो ऐनअन्तर्गत लगाइएको सामूहिक बलात्कारको आरोपबाट सफाइ दिएको हो।
अदालतले उनलाई आपराधिक षड्यन्त्रसम्बन्धी भारतीय दण्ड संहिताको धारा १२०(ख) अन्तर्गतको आरोपबाट पनि मुक्त गरेको जनाएको छ।
यद्यपि, नाबालिग बलात्कार मुद्दामा यसअघि सुनाइएको आजीवन कारावासको फैसला यथावत् राखिएको छ। उनी हाल अस्थायी जमानतमा बाहिर रहेका छन् भने सोमबार अदालतले उनको अन्तरिम जमानत सात दिनका लागि थप गरेको थियो।
सन् १९४१ मा हालको पाकिस्तानको सिन्ध क्षेत्रस्थित बेरानी गाउँमा जन्मिएका आशारामको वास्तविक नाम आसुमल हरपलानी हो। विभाजनपछि उनको परिवार भारतको अहमदाबादमा बसाइँ सरेको थियो।
सन् १९६० को दशकमा उनले लीलाशाह लाई आफ्नो आध्यात्मिक गुरु मानेका थिए। पछि लीलाशाहले नै उनलाई ‘आशाराम’ नाम दिएका थिए।
सन् १९७२ मा अहमदाबाद नजिक साबरमती नदी किनारमा स्थापना गरिएको सानो आश्रमबाट सुरु भएको उनको धार्मिक अभियान पछि भारतका विभिन्न राज्यहरूमा फैलिएको थियो।
