काठमाडौं — विद्यालय शिक्षासम्बन्धी कानुन संशोधनको मागसहित आन्दोलनमा उत्रिएका शिक्षकहरूसँग सरकार वार्तामा बस्ने भएको छ। शिक्षा, विज्ञान तथा प्रविधि मन्त्रालयले नेपाल शिक्षक महासंघलाई वार्ताका लागि बुधबार मन्त्रालयमा उपस्थित हुन आह्वान गरेको हो।
मन्त्रालयका प्रवक्ता तथा सहसचिव शिवकुमार सापकोटाले आज एक विज्ञप्ति जारी गर्दै आन्दोलनरत सबै शिक्षक र कर्मचारीको प्रतिनिधित्व हुने गरी महासंघलाई वार्तामा सहभागी हुन आग्रह गरेका छन्। वार्ताको समय आपसी सहमतिमा तय गरिने विज्ञप्तिमा उल्लेख छ।
विद्यालय शिक्षासम्बन्धी कानुन संशोधन र एकीकरण गर्न बनेको विधेयक, २०८० यथाशीघ्र पारित गरियोस् भन्ने माग राख्दै नेपाल शिक्षक महासंघको नेतृत्वमा शिक्षकहरूको आन्दोलन जारी छ।
यसअघि पनि मन्त्रालयले चैत २१ र २२ गते आन्दोलनरत पक्षसँग छलफल तथा परामर्श गर्न आग्रह गरेको थियो। तर विभिन्न कारणले ती छलफलहरू हुन सकेका थिएनन्।
सरकारको पछिल्लो आह्वानपछि आन्दोलनरत पक्ष वार्तामा सहभागी हुने वा नहुने भन्ने विषयमा चासो बढेको छ।
