काठमाडौँ: सरकारले आन्दोलनरत शिक्षकहरूलाई आ–आफ्नो कार्यस्थलमा फर्कन अनुरोध गरेको छ। मङ्गलबार बसेको मन्त्रिपरिषद् बैठकले हाल विद्यार्थी भर्ना प्रक्रिया, एसईई उत्तरपुस्तिका परीक्षण तथा कक्षा १२ को राष्ट्रिय परीक्षा सञ्चालन भइरहेकाले विरोध कार्यक्रमहरू स्थगन गरी शिक्षण कार्यमा फर्कन आग्रह गरेको हो।
शिक्षा, विज्ञान तथा प्रविधिमन्त्री विद्या भट्टराईले नेपाल शिक्षक महासङ्घको आह्वानमा भइरहेको आन्दोलनप्रति सरकार गम्भीर रूपमा ध्यानाकर्षित भएको बताउनुभयो। उहाँले सङ्घीय संसद्मा विचाराधीन ‘विद्यालय शिक्षा विधेयक’ यथासक्य चाँडो पारित गर्ने उद्देश्यले यही वैशाख १२ गतेदेखि संसद् अधिवेशन आह्वान गर्ने निर्णय मन्त्रिपरिषद्ले गरेको जानकारी दिनुभयो।
मन्त्री भट्टराईले नेपाल शिक्षक महासङ्घले उठाएका मागप्रति सरकार संवेदनशील रहेको उल्लेख गर्दै समाधानका लागि निरन्तर संवादमा रहेको स्पष्ट पार्नुभयो।
