काठमाडौँ: जर्मनीको भ्रमणमा रहेका वन तथा वातावरणमन्त्री ऐनबहादुर शाही ठकुरीले बर्लिनमा आयोजित पिटर्सबर्ग जलवायु संवादका अवसरमा विभिन्न उच्चस्तरीय भेटवार्ता गरेका छन्।
संवादमा सहभागी हुन जर्मनी पुगेका मन्त्री शाहीले आज जर्मनीकी सङ्घीय विदेशमन्त्री अन्नालेना बेयरबोक, ब्राजिलका कोप–३० प्रमुख आन्द्रे कोर्रिया दो लागो, संयुक्त राष्ट्रसंघका महासचिवका जलवायु विशेष सल्लाहकार सेल्विन हार्ट, संयुक्त राष्ट्रसंघ जलवायु परिवर्तन सचिवालयका कार्यकारी प्रमुख साइमन स्टिल तथा चिली र संयुक्त अधिराज्यका प्रतिनिधिहरूसँग भेटवार्ता गरेका छन्।
भेटमा उनले नेपालका जलवायु परिवर्तनसम्बन्धी प्राथमिकताहरूबारे छलफल गर्नुका साथै सगरमाथा संवादका लागि औपचारिक निमन्त्रणा दिएका छन्।
पिटर्सबर्ग संवादमा सहभागी हुन मन्त्री शाही यही चैत १० गते जर्मनी प्रस्थान गरेका थिए। जर्मनी सरकारले जलवायु परिवर्तनमा बहुपक्षीय सहकार्य प्रवर्द्धन गर्न विगत १४ वर्षदेखि ‘पिटर्सबर्ग जलवायु संवाद’ आयोजना गर्दै आएको छ।
विशेष भूमिका भएका देशहरूलाई आमन्त्रित गरिने यो संवादको १५औँ संस्करणमा नेपाल सरकारको तर्फबाट वनमन्त्री शाही पहिलो पटक सहभागी भएका हुन्।
