काठमाडौं। आईसीसी विश्वकप लिग–२ अन्तर्गत शुक्रबार त्रिवि क्रिकेट मैदानमा भएको खेलमा नेपालले युएईलाई ६ रनले पराजित गर्दै महत्वपूर्ण जित हासिल गरेको छ।
वर्षाले प्रभावित खेलमा डकवर्थ–लुइस–स्टर्न (डीएलएस) पद्धतिअनुसार युएईले संशोधित लक्ष्य पाए पनि पूरा गर्न नसक्दा नेपाल विजयी बनेको हो। यस जितसँगै नेपालले अंक तालिकामा महत्वपूर्ण अंक थपेको छ।
टस जितेर पहिले ब्याटिङ गरेको नेपालले निर्धारित ५० ओभरमा ७ विकेट गुमाउँदै २८९ रन बनाएको थियो। नेपालको इनिङ्समा दीपेन्द्र सिंह ऐरीले उत्कृष्ट प्रदर्शन गर्दै ९४ बलमा १३ चौका र १ छक्कासहित अविजित १०० रन बनाए।
ओपनर विनोद भण्डारीले ५६ रनको योगदान दिँदा कप्तान रोहितकुमार पौडेलले ३९ रन जोडे। डेब्यू खेल खेलेका अर्जुन कुमाल भने ११ रनमा आउट भए। युएईका बलर अजय कुमार र जुनेदले समान २–२ विकेट लिए।
२९० रनको लक्ष्य पछ्याइरहेको युएईका लागि वर्षाले खेल अवरुद्ध गरेपछि ३८ ओभरमा २५५ रनको संशोधित लक्ष्य दिइएको थियो। तर युएईले ३८ ओभरमा ८ विकेट गुमाएर २४८ रन मात्र बनाउन सक्यो।
युएईका मोहम्मद शहजादले ७२ बलमा ६५ रन बनाए पनि टोलीलाई जित दिलाउन सकेनन्। तनवीरले ४९ रन र हरप्रीत सिंहले ४१ रन जोडे पनि अन्य ब्याटरले साथ दिन सकेनन्।
नेपालका लागि सन्दीप लामिछानेले ३ विकेट लिँदै निर्णायक भूमिका खेले। सोमपाल कामी र नन्दन यादवले २–२ विकेट लिएर युएईलाई दबाबमा राखे।
घरेलु मैदानमा उत्कृष्ट ब्याटिङ र कसिलो बलिङका कारण नेपालले महत्वपूर्ण जित निकालेको हो। अब नेपालले आफ्नो अर्को खेल मंगलबार ओमानसँग खेल्नेछ।
