काठमाडौं। राष्ट्रपति रामचन्द्र पौडेलले संघीय संसद्का दुवै सदनबाट पारित भई पेस भएका पाँचवटा विधेयक प्रमाणीकरण गरेका छन्।
राष्ट्रपति कार्यालयकी प्रवक्ता शैलजा रेग्मी भट्टराईले आज विज्ञप्ति जारी गर्दै संविधानको धारा ११३ को उपधारा २ बमोजिम प्रमाणीकरण गरिएको जानकारी दिएकी छन्।
प्रमाणीकरण गरिएका विधेयकहरूमा सुशासन प्रवर्द्धन तथा सार्वजनिक सेवा प्रवाहसम्बन्धी केही नेपाल ऐन संशोधन विधेयक, सहकारीसम्बन्धी केही नेपाल ऐन संशोधन विधेयक, आर्थिक कार्यविधि तथा वित्तीय उत्तरदायित्व ऐन, २०७६ संशोधन विधेयक, आर्थिक तथा व्यावसायिक वातावरण सुधार तथा लगानी अभिवृद्धिसम्बन्धी केही नेपाल ऐन संशोधन विधेयक, र निजीकरण ऐन, २०५० संशोधन विधेयक छन्।
यी विधेयक आजै संघीय संसद्का दुवै सदनबाट पारित भएका थिए।
