चितवन: शिक्षा र राजनीतिमा लामो समयदेखि सक्रिय नेता तथा नेकपा (एमाले) राष्ट्रिय सल्लाहकार परिषदका केन्द्रीय सदस्य भरत प्रसाद साह औपचारिक रूपमा नेकपा (माओवादी केन्द्र)मा प्रवेश गरेका छन्।
बुधबार चितवनमा आयोजित कार्यक्रममा माओवादी केन्द्रका अध्यक्ष पुष्पकमल दाहाल ‘प्रचण्ड’को हातबाट टीका ग्रहण गर्दै साहले पार्टी प्रवेश गरेका हुन्।
बारा जिल्लाको कलैया उपमहानगरपालिका–५ निवासी साहले आफ्नो राजनीतिक यात्रा २०३५ सालमा अखिल (पाँचौं) का बारा जिल्ला अध्यक्षका रूपमा सुरु गरेका थिए। त्यसपछि २०३७ र २०३८ सालमा ठाकुरराम क्याम्पसमा दुई कार्यकाल स्ववियु सदस्यका रूपमा निर्वाचित हुँदै विद्यार्थी राजनीतिमा सक्रिय भूमिका खेलेका थिए।
२०५४ देखि २०५९ सालसम्म एमाले शिक्षक संगठन बारा जिल्ला अध्यक्षका रूपमा कार्यभार सम्हालेका साह २०६१ सालमा नेपाल शिक्षक युनियन बारा अध्यक्ष र पछि २०७१ सालमा संगठनकै केन्द्रीय अध्यक्ष पदमा पुग्न सफल भएका थिए।
राजनीतिक रूपमा स्थिर, समर्पित र अनुभवसञ्चित नेताका रूपमा परिचित साह हालसम्म एमालेको राष्ट्रिय सल्लाहकार परिषद सदस्यका रूपमा क्रियाशील थिए। तर, एमाले अध्यक्ष केपी शर्मा ओलीको कार्यशैलीप्रति असन्तुष्टि जनाउँदै उनले माओवादी केन्द्र रोजेका हुन्।
पार्टी प्रवेशपछि अध्यक्ष प्रचण्डले साहको आगमनले माओवादी केन्द्र अझ सुदृढ र सशक्त बन्ने विश्वास व्यक्त गरे। साथै, साहको प्रवेशले बारा र समग्र मधेशमा पार्टीको प्रभाव अझ विस्तार हुने अपेक्षा गरिएको छ।
