काठमाडौँ । धनुषाको लालगढबाट सशस्त्र प्रहरीका एक जना इन्स्पेक्टरलाई अख्तियार दुरुपयोग अनुसन्धान आयोगको टोलीले घुससहित पक्राउ गरेको छ । पक्राउ पर्नेमा इन्स्पेक्टर बिकिल अधिकारी रहेका छन्।
शुक्रबार उनलाई अख्तियारको क्षेत्रीय कार्यालय बर्दिबासबाट खटिएको टोलीले पक्राउ गरेको हो । पक्राउको क्रममा उनको साथबाट घुस बापत लिएको ४० हजार रुपैयाँ नगद बरामद गरिएको अख्तियारका एक जना अधिकृतले जानकारी दिए।
इन्स्पेक्टर अधिकारीमाथि कमला–ढल्केबर–बागमती सडक खण्ड अन्तर्गत माटो तथा ग्राभेल फिलिङ कार्यमा प्रयोग हुने सवारी साधन रोकेर अवरोध सिर्जना गर्दै घुस मागेको आरोप छ । अख्तियारले आरोपीमाथि अनुसन्धान गरिरहेको छ।
