काठमाडौं। मेडिकल व्यवसायी र राजसंस्था पुनर्स्थापनाका पक्षधर दुर्गा प्रसाईंविरुद्ध साइबर ब्यूरोमा फेरि अर्को उजुरी दर्ता भएको छ।
प्रसाईंले झूटा, भ्रामक, र जनमानसमा गलत धारणा फैलाउने अभिव्यक्ति दिएको भन्दै अधिकारकर्मी टिकाराम भुसालले काठमाडौंको साइबर ब्यूरोमा उजुरी दिएका हुन्।
प्रसाईंले नेपालमा समलिङ्गी विवाह युएसएडको वित्तीय सहयोगमा लागू गरिएको भन्ने झूटा अभिव्यक्ति दिएको भिडियो टिकटकमार्फत सार्वजनिक गरेपछि भुसालले उक्त विषयमा झूटा सूचना प्रवाह र अदालतको मानहानीसम्बन्धी उजुरी दिएका छन्।
उनको निवेदनमा उल्लेख छ, “टिकटकमार्फत नेपालमा समलिङ्गी विवाह युएसएडको वित्तीय सहयोगमा लागू गरिएको भन्ने अभिव्यक्ति पूर्णरूपमा झूटा, भ्रामक, र जनमानसमा गलत धारणा फैलाउने हो। यस प्रकारको गलत सूचना सार्वजनिक रूपमा प्रसारण गर्नु कानुन विपरित छ र सर्वोच्च अदालतले २०८० आषाढ १२ गते यौनिक र लैङ्गिक अल्पसंख्यक व्यक्तिहरूको विवाह दर्ता गर्न सरकारलाई आदेश दिएको निर्णयलाई अपमानित गर्ने कार्य हो।”
उनले अदालतको आदेशप्रति अपमानजनक अभिव्यक्ति दिने प्रसाईंविरुद्ध विभिन्न माग राखेका छन्।
केही दिन पहिले, सोही अभिव्यक्तिप्रति आपत्ति जनाउँदै, मायाको पहिचान नेपालका कार्यकारी निर्देशक सुनिलबाबु पन्तले पनि प्रसाईंविरुद्ध उजुरी दिएका थिए। उनले प्रसाईंले यौनिक र अल्पसंख्यक समुदायलाई लक्षित गरेर घृणा फैलाउने अभिव्यक्ति दिएको बताएका छन्।
मागहरू:
१. श्री दुर्गा प्रसाईंविरुद्ध कानुनी अनुसन्धान गरी आवश्यक कारबाही अगाडि बढाइयोस्।
२. भ्रामक अभिव्यक्तिहरू हटाउन र सार्वजनिक रूपमा माफी माग्न लगाइयोस्।
३. भविष्यमा यस्ता गलत सूचना प्रवाह नगर्न सचेत गराइयोस्।
