काठमाडौँ: स्थानीय प्रशासन ऐन, २०२८ को दफा ६(क) बमोजिम काठमाडौँ प्रशासनले शुक्रबारदेखि तीनकुने क्षेत्रमा जारी गरेको कर्फ्यु आदेश आज बिहान ७ बजेदेखि हटाएको छ।
काठमाडौँ महानगरपालिका अन्तर्गत तीनकुने आसपासका चारकिल्ला तोकी जारी गरिएको आदेश आज बिहान ७ बजेदेखि हटाइएको काठमाडौँका प्रमुख जिल्ला अधिकारी ऋषिराम तिवारीले जानकारी दिनुभयो।
हिजो तीनकुनेमा भएको झडपपछि जारी गरिएको कर्फ्यु आदेश अन्तर्गत सो क्षेत्रभित्र आवतजावत गर्न, कुनै पनि प्रकारको भेला, जुलुस, प्रदर्शन, सभा, बैठक, वा घेराउ गर्न प्रतिबन्ध लगाइएको थियो। आदेश बानेश्वर–तीनकुने क्षेत्र, गौशालादेखि एयरपोर्ट, गैरीगाउँ, तीनकुने हुँदै कोटेश्वरसम्म, कोटेश्वरदेखि जडीबुटी पुलसम्म, कोटेश्वरबाट बालकुमारी पुलसम्म, बानेश्वर चोकदेखि शङ्खमूल पुलसम्म, तथा गौशाला चोकदेखि पुरानो बानेश्वर हुँदै नयाँ बानेश्वर चोकसम्म लागू गरिएको थियो।
