प्रधानमन्त्री केपी शर्मा ओलीले विश्वविद्यालयहरूले विद्यार्थीलाई आफूले चाहेका विषय अध्ययन गर्न पाउने वातावरण बनाउनुपर्ने बताएका छन्।
मंगलबार जनकपुरस्थित राजर्षि जनक विश्वविद्यालयको प्रथम दीक्षान्त समारोहलाई सम्बोधन गर्दै प्रधानमन्त्री ओलीले विद्यार्थीहरू आफ्नो प्रतिभा देखाउन सक्नेछन्, यदि उनीहरूले चाहेको विषय अध्ययन गर्न पाए भने भन्ने धारणा राखे। उनले भने, “प्रतिभा नदेखिएको होइन, तर आफूले मन पराएको विषय पढ्न नपाएर विद्यार्थीहरू असफल हुने गरेका छन्।”
प्रधानमन्त्री ओलीले विश्वविद्यालयले विद्यार्थीको अभिरुचिअनुसार शैक्षिक संरचना तयार गर्नुपर्नेमा जोड दिए। उनले राजर्षि जनक विश्वविद्यालयबाट दीक्षित भएका विद्यार्थीहरू विश्वका जुनसुकै देशका नागरिकसँग प्रतिस्पर्धा गर्न सक्षम हुने विश्वास व्यक्त गरे।
समारोहमा प्रधानमन्त्री ओलीले पश्चिमा विश्वविद्यालयहरू नेपालमा स्थापित विश्वविद्यालयहरूको तुलनामा करिब १८ सय वर्षपछि मात्र स्थापना भएको उल्लेख गर्दै नेपालमा प्राचीनकालदेखि शिक्षाको गौरवशाली परम्परा रहेको स्मरण गराए।
राजर्षि जनक विश्वविद्यालयका अनुसार विभिन्न संकाय र तहका १२५ विद्यार्थी दीक्षित भएका छन्।
