काठमाडौँ । काठमाडौँको चन्द्रागिरी नगरपालिका–३ थानकोट खरिबोटमा घरायसी विवादका क्रममा चक्कु प्रहार हुँदा एक युवकको मृत्यु भएको छ।
प्रहरीका अनुसार शनिबार राति महोत्तरी घर भई हाल थानकोट बस्दै आएका ३८ वर्षीय समि अहमदले आफ्नै सालो पर्ने जाकिर मन्सुरीमाथि चक्कु प्रहार गरेका हुन्।
राति करिब ९:१५ बजे घरायसी विषयमा विवाद भएपछि अहमदले तरकारी काट्ने चक्कुले २०–२५ वर्षीय जाकिरमाथि आक्रमण गरेको प्रहरीले जनाएको छ।
गम्भीर घाइते भएका जाकिरलाई तत्काल सतुङ्गलस्थित अस्पताल लगिएको थियो। तर उपचारकै क्रममा चिकित्सकले उनलाई मृत घोषणा गरेका थिए।
मृतक जाकिरको स्थायी घर गौशाला नगरपालिका–५ रहेको प्रहरीले जनाएको छ।
घटनापछि खटिएको प्रहरी टोलीले आरोपी समि अहमदलाई नियन्त्रणमा लिएको छ। घटनामा प्रयोग गरिएको चक्कु पनि प्रहरीले बरामद गरेको जनाएको छ।
प्रहरी वृत्त थानकोट का अनुसार मृतकको शव पोस्टमार्टमका लागि महाराजगञ्जस्थित शिक्षण अस्पताल पठाइएको छ।
