भक्तपुर: माध्यमिक शिक्षा परीक्षा (एसईई) मंगलबार सम्पन्न भएको छ। राष्ट्रिय परीक्षा बोर्ड, परीक्षा नियन्त्रण कार्यालय सानोठीमीका अनुसार देशभरका २,०७९ परीक्षा केन्द्रमा यही चैत ७ गतेदेखि सञ्चालन भएको परीक्षा मंगलबार सफलतापूर्वक सम्पन्न भएको हो।
परीक्षा नियन्त्रण कार्यालय, कक्षा १० का परीक्षा नियन्त्रक नन्दलाल पौडेलले भन्नुभयो, “यस वर्षको परीक्षा शान्तिपूर्ण र मर्यादित रूपमा सम्पन्न भयो। अयोग्य गतिविधिमा संलग्न केही निरीक्षकलाई निष्कासित गरिएको छ।”
यस वर्षको परीक्षामा ५ लाख १४ हजार ७१ परीक्षार्थी सहभागी भएका थिए। परीक्षार्थी संख्या सबैभन्दा बढी काठमाडौँमा ३९ हजार ६०० र सबैभन्दा कम मनाङमा ४३ जना रहेको थियो। साथै, जापानको एक परीक्षा केन्द्रबाट २९ जनाले एसईई परीक्षा दिएका थिए। काठमाडौँको केन्द्रीय कारागार, दैलेखका दुई कारागार, र भक्तपुरको बालसुधार गृहबाट समेत परीक्षार्थी सहभागी भएका थिए।
परीक्षा बोर्डले यस वर्षको परीक्षाफल असार ७ गतेभित्र सार्वजनिक गर्ने जनाएको छ। परीक्षामा न्यूनतम ३५ अङ्कभन्दा कम ल्याउने परीक्षार्थी अनुत्तीर्ण हुनेछन्। यस वर्ष उत्तीर्ण दर ७० प्रतिशत पु¥याउने लक्ष्य राखिएको छ, जबकि गत वर्ष २०८० सालको एसईईमा उत्तीर्ण दर ४८ प्रतिशत मात्र रहेको थियो।
