एजेन्सी । इरानको दक्षिणी प्रान्त होर्मोज्गानस्थित मिनाब नगरको शजाराह तैयबेह प्राथमिक विद्यालयमा भएको अमेरिकी क्षेप्यास्त्र आक्रमणको झन्डै तीन महिनापछि पनि पीडित परिवारहरू गहिरो शोकमा डुबेका छन्।
फेब्रुअरी २८ मा भएको उक्त आक्रमणमा १६० भन्दा बढी मानिसको मृत्यु भएको थियो, जसमा अधिकांश बालबालिका रहेका थिए। स्थानीय बासिन्दाहरूका अनुसार विद्यालयलाई लक्षित गर्दै कम्तीमा तीनवटा क्षेप्यास्त्र प्रहार गरिएको थियो।
घटनापछि विद्यालय पूर्ण रूपमा भग्नावशेषमा परिणत भएको छ। खाली कक्षाकोठामा अहिले मृतक बालबालिकाको सम्झनामा फूल र तस्बिर राखिएका छन्। ती तस्बिर हेर्दै आफन्तहरू भावुक बन्ने गरेका छन्।
आक्रमणमा आफ्ना दुई सन्तान गुमाएकी राहेलेह चमानीजादेहले विद्यालय परिसरमा पुग्दा आफ्ना बच्चाहरू खेलिरहेका पुराना दिन सम्झिने गरेको बताइन्।
उनले भनिन्, “मेरो बच्चाहरूको कक्षाकोठा यहीँ थियो। अहिले यहाँ केही पनि बाँकी छैन। जब म यहाँ आउँछु, उनीहरू खेलिरहेको दृश्य सम्झिन्छु, तर आज उनीहरूको कुनै चिन्ह छैन।”
अर्की पीडित सोमायेह कामानीले पनि आक्रमणमा आफ्ना छोरा अमिर अली हसनजादेह र श्रीमान् गुमाएको बताएकी छन्। उनले त्यो दिनको पीडा अझै भुल्न नसकेको बताइन्।
उक्त आक्रमणको अन्तर्राष्ट्रिय स्तरमा व्यापक आलोचना भएको थियो। अमेरिकाले भने नजिकै रहेको इरानी सैन्य अड्डालाई लक्षित गरिएको दाबी गरेको थियो।
स्थानीय बासिन्दाहरूका अनुसार विद्यालय भविष्यमा पुनर्निर्माण हुनसक्छ, तर त्यो दिनको त्रासदीले उनीहरूको जीवनमा बनाएको घाउ कहिल्यै नमेटिने बताएका छन्।
