काठमाडौं । प्रतिनिधिसभाको बैठक आज दिउँसो १ बजे सिंहदरबारमा बस्ने भएको छ। बैठकमा आगामी आर्थिक वर्षको बजेटमाथि छलफल सुरु हुने कार्यसूची रहेको छ।

आजको बैठकमा सभामुखले प्रधानमन्त्री तथा मन्त्रिपरिषद्को कार्यालयबाट प्राप्त कार्यभार थपसम्बन्धी पत्रको बेहोरा पढेर सुनाउने कार्यक्रम रहेको छ। साथै, कार्यव्यवस्था परामर्श समितिमा माननीय सदस्यहरूको नाम मनोनयन गरिएको जानकारी पनि सभामुखले गराउनेछन्।

त्यसैगरी, सभामुखले “वैकल्पिक विकास वित्त परिचालन विधेयक, २०८२” राष्ट्रिय सभाबाट निर्धारित अवधिभित्र फिर्ता नभएको जानकारी गराउने कार्यसूचीमा समावेश गरिएको छ।

बैठकमा आगामी आर्थिक वर्ष २०८३/०८४ को राजस्व र व्ययको वार्षिक अनुमान (बजेट) माथि सामान्य छलफल प्रारम्भ गर्ने प्रस्ताव अर्थमन्त्री डा. स्वर्णिम वाग्लेले वक्तव्यसहित प्रस्तुत गर्नेछन्। साथै, बजेटमाथि सांसदहरूले उठाएका प्रश्नहरूको जवाफ पनि अर्थमन्त्री वाग्लेले दिने कार्यसूची रहेको छ।

काठमाडौं । नेपालमा हाल उपल्लो वायुमण्डलमा सक्रिय पश्चिमी न्यून चापीय रेखा तथा स्थानीय वायुको आंशिक प्रभाव कायम रहेको छ। यसको प्रभावका कारण देशका विभिन्न क्षेत्रमा बदली, वर्षा तथा चट्याङको गतिविधि देखिएको छ।

हाल कोशी, बागमती, गण्डकी प्रदेशसहित लुम्बिनी, कर्णाली र सुदूरपश्चिम प्रदेशका हिमाली तथा पहाडी भूभागमा सामान्यदेखि आंशिक बदली रहेको छ भने अन्य क्षेत्रमा आंशिक बदली रहेको मौसमविद्ले बताएका छन्। कोशी, बागमती, गण्डकी र लुम्बिनी प्रदेशका केही स्थानमा मेघगर्जन र चट्याङसहित हल्कादेखि मध्यम वर्षा भइरहेको छ।

आज दिउँसो कोशी, मधेश, बागमती, गण्डकी र लुम्बिनी प्रदेशसहित देशका हिमाली तथा पहाडी भूभागमा सामान्य बदली रहनेछ भने सुदूरपश्चिमको तराई क्षेत्रमा आंशिक बदली रहने अनुमान गरिएको छ। कोशी, मधेश, बागमती, गण्डकी तथा लुम्बिनीका हिमाली–पहाडी क्षेत्रका केही स्थानमा तथा कर्णाली र सुदूरपश्चिमका हिमाली–पहाडी क्षेत्रका एक–दुई स्थानमा मेघगर्जन, चट्याङसहित मध्यम वर्षाको सम्भावना रहेको छ। उच्च हिमाली क्षेत्रमा हिमपात पनि हुन सक्ने मौसम पूर्वानुमान छ।

यस्तै, बागमती, गण्डकी, लुम्बिनी र सुदूरपश्चिमका तराई क्षेत्रमा केही स्थानमा गर्मी बढेर तातो दिनको अवस्था रहने सम्भावना रहेको छ।

आज राति पनि कोशीसहित बागमती र गण्डकीका हिमाली तथा पहाडी भूभागमा सामान्य बदली कायम रहनेछ। मधेश प्रदेश तथा अन्य पहाडी क्षेत्रमा आंशिक बदली रहनेछ भने अधिकांश तराई क्षेत्रमा मौसम मुख्यतया सफा रहने अनुमान गरिएको छ। राति पनि कोशी, बागमती र गण्डकीका केही स्थानमा तथा मधेश र अन्य हिमाली क्षेत्रमा एक–दुई स्थानमा मेघगर्जन र चट्याङसहित हल्का वर्षा तथा हिमपातको सम्भावना रहेको छ।

विश्वभर फैलिएका नेपाली साहित्यकार, भाषा–संस्कृतिप्रेमी तथा स्रष्टाहरूलाई एउटै साझा छातामुनि
जोड्ने अन्तर्राष्ट्रिय नेपाली साहित्य समाज (अनेसास) को आगामी नेतृत्वबारे चर्चा भइरहेका बेला एक
अनुभवी, समर्पित र कर्मशील व्यक्तित्वको नाम अग्रपङ्क्तिमा देखिन्छ—सुरेन उप्रेती।
पाँचथर जिल्लाको सुभाङमा जन्मिएका सुरेन उप्रेती आज क्यानडाको भिक्टोरियामा बसोबास गर्दै आए
पनि उनको मन, मस्तिष्क र कर्म सधैं नेपाली भाषा, साहित्य, संस्कृति र समाजसेवामा समर्पित रह्यो।
समाजशास्त्रमा स्नातकोत्तर उपाधि हासिल गरेका उप्रेतीले विगत चार दशकभन्दा बढी समयदेखि
समाज, साहित्य, शिक्षा र संस्कृतिको क्षेत्रमा निरन्तर योगदान पुर्‍याउँदै आएका छन्।
उहाँको जीवनयात्रा हेर्दा नेतृत्व केवल पदको विषय नभई सेवाको निरन्तर अभ्यास हो भन्ने स्पष्ट हुन्छ।
नेपालमा समाज उत्थानका लागि सङ्गठित समूहका महासचिवदेखि महिला आधारशिला नेपालका
सल्लाहकारसम्मका जिम्मेवारी निर्वाह गर्नुभएका उप्रेतीले क्यानडामा पुगेर पनि नेपाली समुदायको सेवा
र संस्थागत विकासलाई निरन्तरता दिनुभयो। ओटावाका नेपालीहरूको सङ्गठनका बोर्ड डाइरेक्टर,
एनआरएनए क्यानडाका उपाध्यक्ष तथा एनआरएनए अन्तर्राष्ट्रिय समन्वय परिषद्का भाषा, साहित्य,
संस्कृति तथा सम्पदा सम्बन्धी विभिन्न जिम्मेवारीहरूमा रहेर उहाँले उल्लेखनीय योगदान दिनुभएको
छ।
साहित्यिक क्षेत्रमा उहाँको योगदान अझ व्यापक र प्रेरणादायी छ। अनेसास क्यानडाका संस्थापक
अध्यक्षका रूपमा उहाँले क्यानडामा नेपाली साहित्यिक गतिविधिलाई संस्थागत रूप दिनुभयो। अनेसास
केन्द्रीय महासचिव, केन्द्रीय बालसमिति संयोजक, साहित्य सागर डटनेटका प्रबन्ध सम्पादक तथा
विभिन्न साहित्यिक संस्थाका सक्रिय अभियन्ताका रूपमा उहाँले नेपाली भाषा र साहित्यको प्रवर्द्धनमा
महत्वपूर्ण भूमिका खेल्नुभएको छ।
विशेष गरी प्रवासमा जन्मिएका र हुर्किएका नेपाली मूलका बालबालिकालाई नेपाली भाषा, साहित्य र
संस्कृतिसँग जोड्ने उहाँको अभियान अनुकरणीय छ। “प्रवासमा नेपाली शिक्षा” जस्ता पाठ्यपुस्तकको
सम्पादन तथा प्रकाशन, विश्वभरका बालबालिकालाई समेटेर कविता सङ्ग्रह र कविता क्यालेन्डर
प्रकाशन, बालसाहित्य सिर्जना तथा बालप्रतिभा प्रोत्साहनका कार्यक्रमहरू उहाँको दूरदर्शी सोचका
उदाहरण हुन्।

उहाँले सम्पादन गरेका स्मारिका, कथा सङ्ग्रह, सांस्कृतिक तथा साहित्यिक कृतिहरूले नेपाली
डायस्पोराको इतिहास, अनुभव र पहिचानलाई अभिलेखीकरण गर्ने महत्वपूर्ण कार्य गरेका छन्। त्यस्तै
कविता, कथा, निबन्ध, बालसाहित्य, गीत र संस्मरणका क्षेत्रमा उहाँका दर्जनौँ प्रकाशित कृतिहरूले
नेपाली साहित्यलाई समृद्ध बनाएका छन्।
साहित्यिक तथा सामाजिक योगदानको कदरस्वरूप उहाँले सत्यमोहन जोशी शताब्दी महोत्सव पदक, नइ
कीर्तिरत्न सम्मान, काव्यदूत सम्मान, अनेसास हिरो सम्मानलगायत अनेक सम्मान तथा पुरस्कार
प्राप्त गर्नुभएको छ। यी सम्मानहरू केवल व्यक्तिगत उपलब्धि नभई उहाँले वर्षौँदेखि गरेको निरन्तर
सेवाको सार्वजनिक स्वीकृति हुन्।
आज अनेसास नयाँ युगको संघारमा उभिएको छ। प्रविधिको विकास, नयाँ पुस्ताको सहभागिता,
विश्वव्यापी सञ्जाल विस्तार तथा नेपाली भाषाको संरक्षण र प्रवर्द्धनका चुनौतीबीच संस्थालाई अनुभवी,
समन्वयकारी र दूरदर्शी नेतृत्वको आवश्यकता छ। सुरेन उप्रेतीको लामो संस्थागत अनुभव, साहित्यिक
योगदान, अन्तर्राष्ट्रिय सम्पर्क सञ्जाल र समावेशी नेतृत्व शैलीले उहाँलाई अनेसासको अध्यक्ष पदका
लागि एक बलियो, सक्षम र विश्वासिलो उम्मेदवारका रूपमा स्थापित गरेको छ।
अनेसास केवल एउटा संस्था होइन; यो विश्वभरका नेपाली स्रष्टाहरूको साझा घर हो। त्यस घरलाई अझ
सशक्त, समावेशी र प्रभावकारी बनाउन सुरेन उप्रेतीजस्ता अनुभवी साहित्यसेवीको नेतृत्व महत्त्वपूर्ण हुन
सक्छ।
साहित्य, भाषा, संस्कृति र समुदायप्रतिको उहाँको समर्पणले देखाएको छ—नेतृत्व पदले होइन,
योगदानले स्थापित हुन्छ। र सुरेन उप्रेतीको योगदान आफैंमा उहाँको सबैभन्दा ठूलो परिचय हो।

किन सुरेन उप्रेती ?
अनेसासको सशक्त, समावेशी र दूरदर्शी नेतृत्वका लागि
अन्तर्राष्ट्रिय नेपाली साहित्य समाज (अनेसास) आज एउटा महत्वपूर्ण मोडमा उभिएको छ। विश्वभर
छरिएका नेपाली स्रष्टा, साहित्यकार, पाठक र भाषा–संस्कृतिप्रेमीहरूलाई जोड्ने यो संस्थाले आगामी
दिनमा अझ व्यापक, समावेशी र प्रभावकारी बन्नुपर्ने आवश्यकता महसुस गरिरहेको छ। यस्ता बेला

अनेसासलाई अनुभव, समर्पण, सिर्जनशीलता र संस्थागत नेतृत्वको अद्वितीय संयोजन भएको
व्यक्तित्वको आवश्यकता छ। यही सन्दर्भमा सुरेन उप्रेतीको नाम स्वाभाविक रूपमा अगाडि आउँछ।
सुरेन उप्रेती कुनै आकस्मिक उम्मेदवार होइनन्। उहाँ अनेसासको इतिहास, वर्तमान र सम्भावनासँग
गहिरो रूपमा जोडिएको नाम हो। संस्थापक अध्यक्षका रूपमा अनेसास क्यानडालाई स्थापित गर्ने,
केन्द्रीय महासचिवका रूपमा संस्थालाई गति दिने, बालसाहित्य अभियानलाई विश्वव्यापी बनाउने तथा
नेपाली भाषा, साहित्य र संस्कृतिको संरक्षण तथा प्रवर्द्धनमा दशकौँदेखि सक्रिय रहने व्यक्तित्व हुन्
उहाँ।
आज संसार परिवर्तन हुँदैछ। नयाँ पुस्ता डिजिटल माध्यममा छ। नेपाली भाषाको प्रयोग चुनौतीपूर्ण बन्दै
गएको छ। प्रवासमा जन्मिएका बालबालिकालाई नेपाली भाषा र संस्कृतिसँग जोडिराख्नु झन् कठिन बन्दै
गएको छ। यस्ता चुनौतीलाई अवसरमा बदल्न सक्ने नेतृत्व आवश्यक छ।
सुरेन उप्रेतीले विगतमा केवल समस्याको चर्चा गर्नुभएन; समाधानका नमूना पनि प्रस्तुत गर्नुभयो।
“प्रवासमा नेपाली शिक्षा” जस्ता पाठ्यपुस्तक प्रकाशन, विश्वभरका बालबालिकालाई समेटेर साहित्यिक
गतिविधि सञ्चालन, अन्तरमहादेशीय साहित्यिक सहकार्य, भाषा तथा संस्कृतिको संरक्षणका
कार्यक्रमहरू उहाँको कार्यक्षमताका जीवित उदाहरण हुन्।
अनेसासको नेतृत्वमा उहाँको दृष्टिकोण स्पष्ट छ—
 विश्वभरका नेपाली स्रष्टालाई एउटै साझा मञ्चमा जोड्ने।
 नयाँ पुस्तालाई अनेसाससँग जोड्ने।
 बालसाहित्य र युवा सृजनशीलतालाई प्राथमिकता दिने।
 प्रविधिमैत्री र पारदर्शी संस्था निर्माण गर्ने।
 भाषा, साहित्य, कला र संस्कृतिलाई समान महत्व दिने।
 विभिन्न देशका शाखाहरूबीच सहकार्य र समन्वय बढाउने।
 अनेसासलाई विश्व नेपाली समुदायको अझ प्रभावशाली साहित्यिक संस्थाका रूपमा स्थापित
गर्ने।

उहाँको नेतृत्वको अर्को विशेषता भनेको समावेशिता हो। उहाँले जीवनभर विभिन्न विचार, भूगोल, पुस्ता
र पृष्ठभूमिका व्यक्तिहरूसँग सहकार्य गर्दै आउनुभएको छ। उहाँ विभाजनको होइन, एकताको पक्षधर
हुनुहुन्छ। प्रतिस्पर्धाको होइन, सहकार्यको संस्कृतिमा विश्वास गर्नुहुन्छ।
दर्जनौँ पुस्तकका लेखक, सम्पादक, समाजसेवी, संस्थापक, अभियन्ता र अन्तर्राष्ट्रिय समन्वयकर्ताको
रूपमा उहाँले आर्जन गरेको अनुभव अनेसासको सम्पत्ति बन्न सक्छ। उहाँले प्राप्त गरेका सम्मान र
पुरस्कारहरू व्यक्तिगत गौरव मात्र होइनन्; ती नेपाली भाषा, साहित्य र संस्कृतिप्रतिको उहाँको निरन्तर
समर्पणका प्रमाण हुन्।
आजको प्रश्न केवल नेतृत्व कसले गर्ने भन्ने होइन। प्रश्न यो हो कि अनेसासलाई आगामी दशकतर्फ
कसले आत्मविश्वासका साथ डोर्‍याउन सक्छ? कसले संस्थाको गौरवशाली इतिहासलाई सम्मान गर्दै
भविष्यका सम्भावनाहरूलाई उजागर गर्न सक्छ? कसले विश्वभरका नेपाली स्रष्टाहरूलाई साझा यात्रामा
जोड्न सक्छ?
धेरै सदस्यहरूको विश्वास छ—त्यस उत्तरको एउटा सशक्त नाम हो, सुरेन उप्रेती।
सेवाको लामो इतिहास, साहित्यप्रतिको अटुट निष्ठा, संस्थागत अनुभवको गहिराइ र भविष्यप्रतिको
स्पष्ट दृष्टिका कारण सुरेन उप्रेती अनेसासको नेतृत्वका लागि सक्षम, योग्य र विश्वासिलो उम्मेदवारका
रूपमा उभिनुभएको छ।
आउनुहोस्, अनुभवलाई सम्मान गरौँ।
समर्पणलाई मूल्याङ्कन गरौँ।
भविष्यलाई सुदृढ बनाऔँ।
अनेसासको समृद्ध, सिर्जनशील र एकताबद्ध भविष्यका लागि—
सुरेन उप्रेतीलाई समर्थन गरौँ। अनेसासको आगामी अध्यक्षमा निर्वाचित गरौँ।

काठमाडौं । सरकारले आगामी आर्थिक वर्ष २०८३/८४ मा प्रदेश तथा स्थानीय तहका लागि विभिन्न चार प्रकारका अनुदानमार्फत कुल ४ खर्ब २४ अर्ब २७ करोड रुपैयाँ वित्तीय हस्तान्तरण गर्ने भएको छ।

अर्थ मन्त्रालयले सार्वजनिक गरेको अन्तर-सरकारी वित्तीय हस्तान्तरणसम्बन्धी विवरणअनुसार प्रदेश सरकारले कुल १ खर्ब ९ अर्ब रुपैयाँ तथा स्थानीय तहहरूले ३ खर्ब १४ अर्ब रुपैयाँ बराबरको अनुदान प्राप्त गर्नेछन्।

स्थानीय तहतर्फ विनियोजित कुल रकममध्ये सबैभन्दा ठूलो हिस्सा गाउँपालिकाहरूले पाउने भएका छन्। आगामी आर्थिक वर्षका लागि देशभरका गाउँपालिकाहरूलाई १ खर्ब ५२ अर्ब ७१ करोड रुपैयाँ विनियोजन गरिएको छ। त्यसैगरी नगरपालिकाहरूका लागि १ खर्ब ३८ अर्ब ६६ करोड रुपैयाँ छुट्याइएको छ। महानगरपालिकाहरूले ११ अर्ब ७३ करोड रुपैयाँ र उपमहानगरपालिकाहरूले ११ अर्ब ५० करोड रुपैयाँ अनुदान प्राप्त गर्नेछन्।

सरकारले प्रदेश र स्थानीय तहलाई वित्तीय समानीकरण, सशर्त, विशेष तथा समपूरक गरी चार शीर्षकमा अनुदान वितरण गर्ने व्यवस्था गरेको छ। वित्तीय समानीकरण अनुदानअन्तर्गत प्रदेशहरूलाई ६१ अर्ब ५० करोड रुपैयाँ र स्थानीय तहहरूलाई ९० अर्ब २० करोड रुपैयाँ उपलब्ध गराइनेछ।

सशर्त अनुदानतर्फ सबैभन्दा बढी रकम विनियोजन गरिएको छ। यसअन्तर्गत प्रदेशहरूले ३९ अर्ब ७२ करोड रुपैयाँ तथा स्थानीय तहहरूले २ खर्ब ६ अर्ब रुपैयाँ प्राप्त गर्नेछन्। विशेष अनुदानअन्तर्गत प्रदेशका लागि ३ अर्ब ८२ करोड रुपैयाँ र स्थानीय तहका लागि ९ अर्ब ४० करोड रुपैयाँ छुट्याइएको छ। त्यस्तै, समपूरक अनुदानतर्फ प्रदेशहरूका लागि ४ अर्ब ६० करोड रुपैयाँ तथा स्थानीय तहहरूका लागि ८ अर्ब ९२ करोड रुपैयाँ विनियोजन गरिएको छ।

प्रदेशगत विवरणअनुसार आगामी आर्थिक वर्षमा संघीय सरकारबाट सबैभन्दा बढी अनुदान प्राप्त गर्ने प्रदेश मधेश प्रदेश रहेको छ। मधेश प्रदेशले १७ अर्ब ५९ करोड रुपैयाँ अनुदान प्राप्त गर्नेछ। दोस्रो स्थानमा रहेको कर्णाली प्रदेशले १७ अर्ब २० करोड रुपैयाँ पाउनेछ।

त्यसैगरी, लुम्बिनी प्रदेशका लागि १४ अर्ब ४१ करोड रुपैयाँ अनुदान विनियोजन गरिएको छ। सबैभन्दा कम अनुदान प्राप्त गर्ने प्रदेश गण्डकी प्रदेश रहेको छ, जसले आगामी आर्थिक वर्षमा १२ अर्ब ७२ करोड रुपैयाँ प्राप्त गर्ने अर्थ मन्त्रालयको तथ्याङ्कमा उल्लेख छ।

anudan हस्तान्तरण 97%_bgtdwyq (1)

काठमाडौँ । प्रतिनिधि सभा सदस्य हर्क साम्पाङ्गलाई ट्राफिक प्रहरीले कानुनी कारबाही गरेको छ। ट्राफिक नियमको पालना नगरी सवारीसाधन चलाएको आरोपमा उनीमाथि कारबाही गरिएको हो

सोमबार नेपाल प्रहरी राजमार्ग सुरक्षा तथा ट्राफिक व्यवस्थापन कार्यालयले राईलाई कारबाही गरेको जनाएको छ। लापरबाहीपूर्वक सवारी चलाएको कसुरमा कारबाही गरिएको कार्यालयका प्रहरी उपरीक्षक दीपक गिरीले जानकारी दिए।

गत जेठ २२ गते एक कार्यक्रममा सहभागी हुन जाँदै गर्दा राईले मोबाइलमा भिडियो बनाउँदै सवारी चलाएको पाइएको थियो। उक्त घटनापछि ट्राफिक प्रहरीले आवश्यक कानुनी प्रक्रिया अनुसार कारबाही गरेको जनाएको छ।

काठमाडौँ । काठमाडौँको तारकेश्वरमा घरायसी विवादका क्रममा श्रीमतीमाथि धारिलो हतियार (चक्कु) प्रहार गरी हत्या गरेको आरोपमा ‘नेपाली ब्रो’ उपनामले चिनिने कुमार थापा मगरसहित थप तीन जनालाई प्रहरीले पक्राउ गरेको छ।

जिल्ला प्रहरी परिसर काठमाडौँका अनुसार जेठ २२ गते राति तारकेश्वर नगरपालिका–६, पैंयुटारमा ३८ वर्षीय कुमार थापा मगरले आफ्नी श्रीमती ईश्वरी भुजेलमाथि चक्कु प्रहार गरेका थिए।

गम्भीर घाइते भएकी भुजेललाई तत्काल तारकेश्वर सिटी अस्पताल पुर्‍याइएको थियो। त्यहाँ उपचार सम्भव नभएपछि थप उपचारका लागि त्रिभुवन विश्वविद्यालय शिक्षण अस्पताल, महाराजगञ्ज लगिएकोमा उपचारकै क्रममा उनको मृत्यु भएको प्रहरीले जनाएको छ।

घटनापछि खटिएको प्रहरी टोलीले सोही राति करिब ११ बजे कुमार थापा मगरलाई नियन्त्रणमा लिएको थियो। यस घटनामा संलग्न रहेको भन्दै परेको किटानी जाहेरीका आधारमा प्रहरीले थप तीन जनालाई पनि पक्राउ गरेको जनाएको छ।

पक्राउ पर्ने अन्य व्यक्तिहरूमा ३६ वर्षीय विक्रम थापा मगर, ४० वर्षीय पुजन थापा क्षेत्री तथा जुम्ला घर भई गोकर्णेश्वर बस्दै आएकी २५ वर्षीया प्रतिक्षा आचार्य रहेका छन्।

प्रहरीले घटनाबारे थप अनुसन्धान जारी रहेको जनाएको छ।

काठमाडौँ । साताको पहिलो कारोबार दिन सोमबार नेपाल स्टक एक्सचेञ्ज (नेप्से) परिसूचक २०.२७ अंकले घटेर २७३५.१४ बिन्दुमा पुगेर बन्द भएको छ।

आजको कारोबारमा अधिकांश कम्पनीहरूको शेयर मूल्य घटेको छ। कुल ३५६ कम्पनीका ९२ लाख ३६ हजार ६७७ कित्ता शेयर किनबेच हुँदा ४ अर्ब ८ करोड ४८ लाख ९६ हजार १९० रुपैयाँ बराबरको कारोबार भएको छ।

समूहगत रूपमा फाइनान्स बाहेक सबै उपसमूहको परिसूचक ओरालो लागेको छ। अन्य र ट्रेडिङ उपसमूहमा एक प्रतिशतभन्दा बढी गिरावट देखिएको छ।

कारोबार भएका कम्पनीमध्ये ४३ वटाको शेयर मूल्य बढेको, २२१ वटाको घटेको तथा ६ वटाको मूल्य स्थिर रहेको छ।

सबैभन्दा बढी लाभ कमाउने कम्पनीमा कालिञ्चोक हाइड्रोपावर र क्रेस्ट माइक्रो लाइफ रहेका छन्। कालिञ्चोक हाइड्रोपावरको शेयर मूल्य १४.९९ प्रतिशतले बढ्दा क्रेस्ट माइक्रो लाइफको मूल्य १३.११ प्रतिशतले वृद्धि भएको छ।

कारोबार रकमका आधारमा सेन्ट्रल फाइनान्स अग्रस्थानमा रह्यो। कम्पनीको २० करोड ४६ लाख रुपैयाँ बराबरको शेयर किनबेच भएको छ।

काठमाडौँ । प्रहरी महानिरीक्षक (आईजीपी) दानबहादुर कार्कीले देशभरका २६३ स्थायी प्रहरी चौकी जीर्ण अवस्थामा रहेको बताएका छन्। राष्ट्रियसभा अन्तर्गतको संघीयता सबलीकरण तथा राष्ट्रिय सरोकार समितिको बैठकमा बोल्दै उनले जीर्ण प्रहरी चौकीहरूको पुनर्निर्माणका लागि आवश्यक बजेट अभाव रहेको बताए।

आईजीपी कार्कीका अनुसार सीमावर्ती तथा संवेदनशील क्षेत्रका कतिपय प्रहरी चौकीहरू भत्किने अवस्थामा पुगेका छन्। प्रहरी कर्मचारीहरू जोखिमपूर्ण संरचनामा काम गर्न बाध्य रहेको उल्लेख गर्दै उनले चौकी नै ढल्ने खतरा रहेको बताए।

उनले अस्थायी प्रहरी चौकीहरूको अवस्थाबारे यकिन तथ्यांकसमेत नरहेको जानकारी दिए। संघीय मामिला तथा स्थानीय तहसँगको समन्वयमा जीर्ण चौकीहरूको निर्माण हुन सके प्रहरी कर्मचारीहरूले न्यूनतम मानवीय सुविधासहित काम गर्न सक्ने अपेक्षा व्यक्त गरे।

कार्कीले अस्थायी प्रहरी चौकीहरू आवश्यकता र संवेदनशीलताको आधारमा स्थापना गरिने बताए। प्रहरीको उपस्थिति राज्यको उपस्थितिसँग जोडिने भए पनि अस्थायी संरचनाले दीर्घकालीन समाधान नदिने भएकाले तिनलाई व्यवस्थित बनाउन बजेट आवश्यक रहेको उनको भनाइ थियो।

बैठकमा उनले बाजुरा र हुम्ला जिल्लाको विवादित सीमा क्षेत्रमा प्रहरी चौकी निर्माणका विषयमा प्रहरी प्रधान कार्यालयले कुनै स्वीकृति नदिएको खुलासा गरे। उक्त क्षेत्रमा चौकी निर्माणबारे प्रहरी सङ्गठनलाई औपचारिक प्रस्ताव वा पत्राचार प्राप्त नभएको उनले बताए।

प्रदेश सरकारले बजेट विनियोजन गरी चौकी निर्माण प्रक्रिया अघि बढाएको भए पनि प्रहरीलाई जानकारी नदिइएको कार्कीले उल्लेख गरे। निर्माणाधीन अस्थायी चौकी स्थानीय विवादका कारण भत्काइएको जानकारी दिँदै उनले आवश्यक अध्ययन, समन्वय र प्रक्रिया पूरा गरेर मात्रै यस्ता संरचना निर्माण हुनुपर्ने बताए।

उनका अनुसार उक्त क्षेत्रमा सीमा विवादभन्दा पनि जडीबुटी व्यापार, ओसारपसार तथा चीनसँगको व्यापारिक पहुँचसँग सम्बन्धित विषयहरू प्रमुख कारणका रूपमा देखिएका छन्।

आईजीपी कार्कीले गत कार्तिक महिनामा पशु चराउने विषयलाई लिएर पनि दुई पक्षबीच झडप भएको स्मरण गराए। त्यस घटनामा ज्यान मार्ने उद्योगको मुद्दा दर्ता भएको र आरोपीहरू धरौटीमा छुटेको जानकारी दिए।

हालैको घटनामा संलग्न व्यक्तिहरूविरुद्ध मुद्दा दर्ता भइसकेको, पक्राउ अनुमति जारी गरिएको तथा केही आरोपी फरार रहेको उनले बताए। विवादित क्षेत्रमा नेपाल प्रहरी र सशस्त्र प्रहरी बलको संयुक्त सुरक्षा उपस्थिति बढाइएको छ। दीर्घकालीन समाधानका लागि त्यहाँ प्रहरी चौकी स्थापना गर्न सुझाव प्राप्त भएको पनि उनले जानकारी दिए।

काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेले समसामयिक राजनीतिक विषयमा छलफल गर्न सर्वदलीय बैठक आह्वान गरेका छन्।

रास्वपाका महामन्त्री कविन्द्र बुर्लाकोटीका अनुसार बैठक सोमबार बिहान ९ बजे सिंहदरबारस्थित सार्वजनिक लेखा समितिको हलमा बस्नेछ। बैठकमा वर्तमान राजनीतिक अवस्था, संसद् र लोकतान्त्रिक अभ्याससँग सम्बन्धित विषयमा छलफल हुने जनाइएको छ।

संघीय संसद्अन्तर्गत प्रतिनिधि सभा र राष्ट्रिय सभामा प्रतिनिधित्व गर्ने सबै राजनीतिक दललाई बैठकमा सहभागी हुन आग्रह गरिएको छ। छलफललाई प्रभावकारी र निर्णयमुखी बनाउन प्रत्येक दलबाट पार्टी अध्यक्ष वा सभापतिसहित दुई जना प्रतिनिधिलाई आमन्त्रण गरिएको महामन्त्री बुर्लाकोटीले जानकारी दिए।

रास्वपाले बैठकमार्फत प्रमुख राजनीतिक दलबीच संवाद, सहकार्य र साझा धारणा निर्माणमा योगदान पुग्ने अपेक्षा गरेको छ।