काठमाडौं: राष्ट्रिय स्वतन्त्र पार्टी (रास्वपा)ले मंसिर ८ गतेदेखि नयाँ चरणको आन्दोलन सुरु गर्ने घोषणा गरेको छ।

आइतबार काठमाडौंमा आयोजित पत्रकार सम्मेलनमा रास्वपाले पार्टी सभापति रवि लामिछानेलाई राजनीतिक प्रतिशोधका आधारमा हिरासतमा राखिएको भन्दै आन्दोलनको दोस्रो चरण सुरु गर्ने निर्णय सार्वजनिक गर्‍यो।

पार्टीले सभापतिका साथै समसामयिक जनजीविकाका मुद्दाबारे प्रधानमन्त्रीलाई बिन्तीपत्र बुझाउन खोज्दा प्रधानमन्त्रीले समय नदिएको कारणले आन्दोलनको अर्को चरणको सुरुवात गर्नुपरेको जनाएको छ।

पत्रकार सम्मेलनमा पार्टीका कार्यवाहक प्रवक्ता मनिष झाले आन्दोलनका मुख्य एजेण्डा प्रस्तुत गर्दै, सभापति लामिछानेलाई हिरासतबाहिर राखेर निष्पक्ष अनुसन्धान गर्नुपर्ने माग गरे। साथै, सहकारी र मिटरब्याज पीडितलाई न्याय दिलाउनुपर्ने, उच्च पदस्थ व्यक्तिहरूको सम्पत्ति छानबिन गरी सार्वजनिक गर्नुपर्ने, र भ्रष्टाचार काण्डको न्यायिक छानबिनका लागि स्वतन्त्र आयोग गठन गर्नुपर्ने जस्ता माग समेत अघि सारे।

झाले संविधान परिमार्जनका लागि सर्वपक्षीय सम्मेलनको आवश्यकतामाथि जोड दिँदै, सहकारीमा ठगिएको ८७ अर्ब रुपैयाँमध्ये अधिकांश रकम राजनीतिक भ्रष्टाचारीहरूले हत्याएको आरोप लगाए। साथै, वर्तमान सरकारको प्रदर्शनलाई आक्रोश व्यक्त गर्दै उनले पहिलो र दोस्रो सरकारको गठबन्धनले देश र जनताको पक्षमा कुनै ठोस काम नगरेको आरोप पनि लगाए।

रास्वपाले उपनिर्वाचनको मनोनयनका क्रममा आफ्ना उम्मेदवारहरूलाई लक्षित गरी आक्रमणको प्रयास भएको भन्दै उपनिर्वाचन निष्पक्ष हुनेमा गम्भीर आशंका व्यक्त गरेको छ।

काठमाडौं: नेपाली कांग्रेसका वरिष्ठ नेता तथा पूर्वसभामुख दमननाथ ढुंगानाको आज ८३ वर्षको उमेरमा निधन भएको छ। बानेश्वरस्थित फ्रन्टलाइन अस्पतालमा उपचारका क्रममा आज दिउँसो १ः३० बजे उनले अन्तिम सास फेरेको स्वकीय सचिव डा. रुद्र शर्माले जानकारी दिएका छन्।

वरिष्ठ अधिवक्तासमेत रहेका ढुंगाना कलेजोसँग सम्बन्धित समस्याका कारण केही समयदेखि अस्पतालमा उपचाररत थिए। विसं २०४८ सालमा काठमाडौं क्षेत्र नं २ बाट नेपाली कांग्रेसका तर्फबाट प्रतिनिधिसभा सदस्यमा निर्वाचित भएका उनले २०४८ देखि २०५१ सम्म सभामुखको जिम्मेवारी सम्हालेका थिए।

नेपालको प्रजातान्त्रिक आन्दोलनमा आफ्नो उल्लेखनीय योगदान दिएका ढुंगाना राजनीतिक आन्दोलनका क्रममा पटक-पटक जेल परेका थिए। उनका परिवारमा श्रीमती, दुई छोरा र एक छोरी रहेका छन्। स्वकीय सचिव शर्माका अनुसार ढुंगानाको अन्त्येष्टि भोलि गरिनेछ।

काठमाडौं। सहकारी ठगी प्रकरणमा राष्ट्रिय स्वतन्त्र पार्टीका सभापति रवि लामिछानेविरुद्ध जिल्ला अदालत काठमाडौंले पनि पक्राउ पुर्जी जारी गरेको छ।

काठमाडौं जिल्ला अदालतका न्यायाधिश शिशिरराज ढकालले आइतबार पक्राउ पुर्जी जारीका लागि अनुमति दिएसँगै कालिमाटीस्थित स्वर्णलक्ष्मी सहकारी ठगी प्रकरणमा उनीमाथि अनुसन्धानको बाटो खुलेको छ।

यस सहकारी ठगी प्रकरणमा ६४५ बचतकर्ताले प्रहरीमा जाहेरी दिएका थिए। लामिछानेसँगै नेपाल प्रहरीका पूर्वडीआईजी छविलाल जोशीविरुद्ध पनि पक्राउ पुर्जी जारी भएको छ।

काठमाडौँ: नेपाल कम्युनिष्ट पार्टी (एमाले)ले नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’द्वारा प्रधानमन्त्री केपी शर्मा ओलीको चीन भ्रमणलाई लिएर गरिएको टिप्पणीप्रति कडा आपत्ति जनाएको छ।

एमालेका सचिव तथा विदेश विभाग प्रमुख रघुवीर महासेठले शनिबार जारी गरेको विज्ञप्तिमा भारतीय अखबार द हिन्दूमा प्रकाशित प्रचण्डको अन्तर्वार्तामा प्रधानमन्त्री ओलीले ‘चिनियाँ कार्ड’ खेलेको भन्ने अभिव्यक्तिलाई आधारहीन र गैरजिम्मेवार भन्दै खण्डन गरिएको छ।

विज्ञप्तिमा भनिएको छ, “प्रधानमन्त्री ओलीमाथि ‘चीन कार्ड खेलेको’ आरोप लगाउँदै चीन भ्रमणलाई ‘अपरिपक्वताको प्रमाण’ भन्नु तथ्यविहीन, गैरजिम्मेवार र नेपालको राष्ट्रिय हित तथा परराष्ट्र नीतिको मर्मविपरीत छ। यस्ता टिप्पणीहरूले नेपालको अन्तर्राष्ट्रिय प्रतिष्ठालाई कमजोर पार्न सक्छन्।”

कूटनीतिक मर्यादाको उल्लङ्घन
एमालेको विज्ञप्तिमा दाहालका टिप्पणीहरू कूटनीतिक मर्यादाविपरीत रहेको र यसले नेपालको सार्वभौमसत्ता र राष्ट्रिय गरिमालाई अपमानित गर्ने जनाइएको छ। विज्ञप्तिमा भनिएको छ, “प्रधानमन्त्री ओलीको चीन भ्रमण नेपालको स्वतन्त्र परराष्ट्र नीतिको अभिव्यक्ति हो। यसलाई ‘कार्ड कूटनीति’ भनेर चित्रण गर्नु पूर्ण रूपमा भ्रामक र तथ्यहीन छ। यस्ता टिप्पणीहरूले भारत र चीनसँग नेपालको सन्तुलित सम्बन्धमा खलल पुर्याउने जोखिम सिर्जना गर्छन्।”

प्रधानमन्त्री ओलीले परराष्ट्र नीतिमा परिपक्वता र सन्तुलन प्रस्तुत गर्दै नेपालको राष्ट्रिय हितलाई प्राथमिकतामा राखेको एमालेले स्पष्ट पारेको छ। विज्ञप्तिमा भनिएको छ, “परराष्ट्र नीति कुनै राजनीतिक स्वार्थको विषय बन्नु हुँदैन। यसले विवेक, गम्भीरता र राष्ट्रिय जिम्मेवारीको माग गर्दछ। नेपालले असंलग्नता, शान्तिपूर्ण सहअस्तित्व, र संयुक्त राष्ट्रसंघको चार्टरका सिद्धान्तहरूलाई आत्मसात् गरेको छ।”

दाहाललाई अभिव्यक्ति फिर्ता गर्न आग्रह
एमालेले दाहाललाई गैरजिम्मेवार टिप्पणी फिर्ता लिन र नेपाली जनतासँग माफी माग्न आग्रह गरेको छ। साथै, भारत र चीन दुवैसँग सन्तुलित र सम्मानजनक सम्बन्ध कायम गर्ने आफ्नो प्रतिबद्धता दोहोर्याएको छ।

प्रधानमन्त्री ओलीको भ्रमणले नेपालका दुई छिमेकी मित्रराष्ट्रसँगको सहकार्यलाई प्रगाढ बनाएको उल्लेख गर्दै एमालेले राष्ट्रिय हितका मुद्दामा गम्भीरता अपनाउन सबै पक्षलाई अपिल गरेको छ।