काठमाडौँ: नेपालमा ऊर्जा क्षेत्रको विकासमा समन्वयकारी भूमिका निभाउँदै आएको विद्युत् विकास विभागले आफ्नो प्रगति विवरण सार्वजनिक गरेको छ।
ऊर्जा, जलस्रोत तथा सिँचाइ मन्त्रालयअन्तर्गत रहेको विभागले जलविद्युत् आयोजना तथा प्रसारण लाइनका लागि आवश्यक अनुमति प्रदान गर्दै आएको छ। विभागका महानिर्देशक नवीनराज सिंहका अनुसार यस आर्थिक वर्षमा विभिन्न ऊर्जा परियोजनाका लागि महत्त्वपूर्ण प्रगतिहरू हासिल भएका छन्।
विभागले जलविद्युत्तर्फ कुल सातवटा आयोजनालाई ६९.२ मेगावाट क्षमताको अनुमतिपत्र प्रदान गरेको छ। सौर्य ऊर्जामा दुई आयोजनाका लागि ४० मेगावाट क्षमताको अनुमति दिइएको छ भने वायु ऊर्जातर्फ एक आयोजनाका लागि १० मेगावाट क्षमताको अनुमतिपत्र जारी गरिएको छ। यसरी, कुल १० आयोजना मिलेर ११९.२ मेगावाट क्षमताको विद्युत् उत्पादनका लागि सर्वेक्षण अनुमतिपत्र प्रदान गरिएको हो।
चैनपुर सेती जलविद्युत् आयोजनाको २१० मेगावाट क्षमताको उत्पादन अनुमतिपत्र जारी गर्नु विभागको अर्को प्रमुख उपलब्धि हो। यसबाहेक, अन्य १२ आयोजनाका लागि ३५३.२ मेगावाट क्षमताका उत्पादन अनुमतिपत्र जारी गरिएको छ।
सौर्य ऊर्जातर्फ १७.३ मेगावाट क्षमताका दुई आयोजनालाई उत्पादन अनुमति दिइएको छ। समग्रमा, विभागले तीन सय ७०.५ मेगावाट क्षमताका १४ आयोजनाका लागि विद्युत् उत्पादन अनुमतिपत्र जारी गरेको छ।
प्रसारण लाइनतर्फको उपलब्धि
प्रसारण लाइनका लागि विभागले २२ वटा आयोजनाको सर्वेक्षण अनुमतिपत्र जारी गरेको छ। यीमा ३३ केभी क्षमताका ५६.४५ सर्किट किलोमिटर, १३२ केभी क्षमताका २१०.९५ सर्किट किलोमिटर, २२० केभी क्षमताका १२५.१ सर्किट किलोमिटर र ४०० केभी क्षमताका २९.३७ सर्किट किलोमिटर प्रसारण लाइन समेटिएका छन्।
त्यस्तै, ७ आयोजनाका लागि प्रसारण लाइनको उत्पादन अनुमतिपत्र प्रदान गरिएको छ। यी आयोजनाहरूले ३३ केभी क्षमताका २३.५ सर्किट किलोमिटर, १३२ केभी क्षमताका १९.८ सर्किट किलोमिटर, २२० केभी क्षमताका १२.१ सर्किट किलोमिटर र ४०० केभी क्षमताका पाँच सर्किट किलोमिटरको क्षमता समेट्छन्।
वितरण लाइनमा प्रगति
वितरण लाइनतर्फ ३३ केभी क्षमताका ८३ सर्किट किलोमिटर क्षेत्रफल समेट्ने सातवटा आयोजनाका लागि अनुमतिपत्र जारी गरिएको छ।
महानिर्देशक सिंहका अनुसार यी प्रयासहरूले नेपालको ऊर्जा क्षेत्रलाई थप बलियो बनाउँदै ऊर्जा उत्पादन र वितरण प्रणालीलाई विस्तार गर्ने लक्ष्यमा महत्त्वपूर्ण योगदान पुऱ्याउनेछन्।
